“АМУ МЕД КОМПЛЕКС” ХУСУСИЙ КЛИНИКАСИНИНГ ЁШ ВА БИЛИМДОН ШИФОКОРИ

Ғайратжон Тожибоев ёшлигидан шифокорлик касбига қизиқди. Ўғлининг орзуларини қўллаб-қувватлаган ота-онаси Аминбой оға билан Раъножон опа уни яхши ниятлар билан Тошкент шаҳрига кузатиб қолишди.

Синовлардан муваффақиятли  ўтиб, Тошкент Тиббиёт Академияси талабаси бўлди. 2004-2011 йилларда – 7 йил давомида Тиббиёт Академияси таҳсилини олган Ғайратжон нафақат замонавий, балки халқ табобатига оид манбалар асосида  ўз билимини бойитди. Ўзи танлаган йўналиш – отоларингология соҳасини янада пухта ўрганиш мақсадида 2011-2014 йиллар давомида Тошкент Тиббиёт Академиясининг магистратура бўлимида таҳсил олиб, юқори малакали отоларинголог магистр дипломини олди.

Дастлабки иш фаолиятини Амударё туман Тиббиёт бирлашмаси кўп тармоқли марказий поликлиникасида отоларинголог-шифокор сифатида бошлаган Ғайратжон Тожибоев қисқа фурсат ичида нафақат ҳамкасбларининг, балки халқнинг ҳам ишонч ва эътиборини қозонди.

Ҳар бир беморни синчиклаб текшириш, муолажа чораларини қўллашда Ғайратжон вақтини ҳам, билимини ҳам аямайди. Тобора ривожланиб бораётган отоларингология соҳаси янгиликларидан хабардор бўлиб бориш, ўз устида ишлаш, ўқиб-изланиш эса унинг энг севимли машғулоти. У мижозларига намунали хизмат кўрсатиш, айниқса, ёш болалар ўртасида кўп учрайдиган қулоқ, томоқ, бурун касалликларини эрта аниқлаш ва олдини олиш чораларини кўриш мақсадида 2022 йилнинг апрель ойида “Аму мед комплекс” хусусий клиникасини ташкил этди ва замонавий отоларингология хизматини йўлга қўйди.

Мамлакатимиз тиббиёт соҳасида хусусий секторни ривожлантиришга қаратилаётган эътибор ва соҳа мутахассислари учун берилаётган имтиёзлар туфайли Ғайратжон Тожибоев хусусий клиникаси ҳузурида 2022 йилнинг август ойида клиник ташхис-лаборатория хизматини ҳам йўлга қўйди. Эндиликда Амударё тумани аҳолиси қулоқ, томоқ, бурун касалликларини эндоскопик усулда аниқлаш мақсадида Нукус ва Урганч шаҳарларига қатнамайдиган бўлишди. Чунки Ғайратжон Тожибоев раҳбарлигидаги “Аму мед комплекс” хусусий клиникасида беморлар учун барча шароитлар мавжуд. Клиникада бир вақтнинг ўзида қулоқ, томоқ, бурун касалликлари эндоскопик текширувдан ўтказилиб, касалликни эрта аниқлаш ва сифатли даволаш ишлари муваффақиятли йўлга қўйилган.

Айни пайтда клиникада 5 нафар малакали ходим доимий иш билан таъминланган ва мижозлар учун зарур шарт-шароитлар яратилган.

Инсон ўзи танлаган йўналишда муваффақиятларга эришиши учун, энг аввало, унинг кўнгли хотиржам бўлмоғи жоиз. Бу жиҳатдан Ғайратжон омадли. Уни доимо тушунадиган, қўллаб-қувватлайдиган, ҳаммаслак умр йўлдоши Умидахон, ота-онаси Аминбой оға билан Раъножон опа, ширин-шакар фарзандлари, туғишганлари бор. Айниқса, Навоий вилоятининг Хатирчидай жаннатмакон туманидан келиб Ғайратжонга бўлган меҳр-муҳаббати туфайли Амударё элини ўзига Ватан қилган Умидахон ҳар бир ишида Ғайратжонга кўмакдош. ТТБ кўптармоқли поликлиникаси ревматолог-шифокори Умидахон Холиқулова ҳам ўз касби, билим ва маҳорати билан ҳамиша халқ олқишига сазовор.

Бири тиббиёт соҳасида ўз тадбиркорлик фаолиятини  йўлга қўйиб, бири халқ саломатлиги йўлида камарбаста меҳнат қилаётган ёш ва фидойи шифокорлар – Ғайратжон Тожибоев ва Умидахон Холиқуловаларни тиббиёт ходимлари куни билан табриклаймиз. Эл-юрт саломатлиги йўлида асло чарчаманг, Аллоҳ эзгу ишларингизнинг хайр-у барокатини берсин, деймиз.

Робия ЙЎЛДОШЕВА.