49-СОНЛИ МАКТАБДА ФАН ОЙЛИГИ ДОИРАСИДА “ОНА ТИЛИ – МИЛЛАТ КЎРКИ” ДЕБ НОМЛАНГАН ТАДБИР ЎТКАЗИЛДИ

Ўзбек тилига давлат мақоми берилганининг 33 йиллиги юртимизда кенг нишонланди. Ушбу кунга бағишлаб барча ҳудудларда, жумладан умумтаълим мактабларида турли маънавий-маърифий тадбирлар ўтказилди.

Сана муносабати билан Амударё туманидаги 49-сонли мактабда ҳам “Она тили – миллат кўрки” деб номланган тадбир ташкил этилди. Мактабнинг она тили ва адабиёт фани ўқитувчилари Матлуба Бердимақова ҳамда Нилуфар Абдуллаевалар томонидан тайёрланган ушбу тадбирни мактаб директори Шукурбой Айимбетов очиб берди ва барчани тил байрами билан табриклади. Шунингдек, она тилининг давлат тили сифатидаги ўрни ва аҳамиятини янада кучайтириш, уни фақатгина расмий тил сифатида эмас, балки, миллий маданият, маънавият тимсоли сифатида янада бойитиш ҳамда софлигини сақлашга барча бирдек масъул эканини таъкидлаб ўтди.

Тадбирда сўзга чиққан фан ўқитувчилари тил – давлат тимсоли, мулки, руҳи, миллатнинг маданий ва маънавий бойлиги, халқнинг маданияти, урф-одати, унинг турмуш тарзи, тарихи эканлигини, тилимизни эъзозлаш, унинг давлат тили сифатидаги мақоми, жамиятдаги мавқеини юксалтириш, ёш авлодни она тилига ҳурмат руҳида тарбиялаш ҳамиша долзарб маънавий бурч бўлиб қолишини эътироф этишди.

Миллат тил билан барҳаёт бўлишини, тилнинг мўътабар бўлган онага қиёсланиши бежиз эмаслигини, инсон онасиз, унинг меҳрисиз, соф муҳаббатисиз яшай олмаганидек, ўз онасидек бўлган тилсиз ҳам ҳаёт кечириши асло мумкин эмаслигини айтиб ўтишди.

Тадбир мактаб ўқувчилари томонидан тайёрланган маърифий-мусиқий дастур билан давом эттирилди. Тадбир давомида мактабнинг 5-, 6-синф ўқувчилари тил ҳақидаги шеърлар, мақоллар айтиб беришди. “Она тили тарққиёти” ҳақида мактабнинг 11-синф ўқувчиси Руслан Болтабоевнинг маърузаси тадбир иштирокчиларига жуда манзур бўлди.

Шунингдек, 8-синф ўқувчилари соф ўзбек тилида ўз ижод намуналарини яратиб, унинг ривожига ҳисса қўшган, уни улуғлагани учун тазйиқ-таъқиқларга учраган, “халқ душмани” деган тамға билан юртдан қувғин қилинган адиблар ҳаётини саҳна кўринишларида намойиш этиб, ҳамманинг олқишини олишди. Тилдан ўринли фойдаланишга жалб этувчи, бу борадаги муаммо ва камчиликларни ифодаловчи саҳна кўринишини намойиш этган мактабнинг 7-синф ўқувчиларининг ижролари ҳам барча ўқувчиларда катта таассуротлар қолдирди.

 Ундан ташқари, 7-синф ўқувчилари Ўзбекистон Республикасининг “Давлат тили ҳақида”ги қонунида тилга муносабатни ифода этувчи моддалар таснифини айтиб беришди. Тумандаги ижодкорларни қўллаб-қувватловчи “Жайхун илҳомлари” нодавлат нотижорат ташкилоти аъзоси Фарҳод Авезов ҳам она тили фанининг таълимдаги ўрни, фан ўқитувчиларининг тил ривожига қўшаётган ҳиссалари ҳақида тўхталди.

 Тадбирга ташриф буюрганлар 9-синф ўқувчилари ижросидаги дилрабо рақсларни кўтаринки кайфият билан томоша қилдилар. Ўзбек тилининг ҳуқуқий мақомини белгилашда енгиб ўтилган қийинчиликлардан тортиб, ҳозирги кунда тилимизнинг бой имкониятларидан кенг фойдаланиш учун яратилган шарт-шароитлар ҳамда давлат тилини янги поғонага олиб чиқиш борасида қилинаётган саъй-ҳаракатлар тасвирланган видеороликдан эса кўплаб маълумотларга эга бўлдилар.

Фан ойлиги доирасида ўтказилган ушбу тадбир барчага бирдек манзур бўлди ва унутилмас таассуротлар қолдирди.

О.Худойберганова.