Депутатлар жамият ҳаётида фаол иштирок этишмоқда

Айни кунларда бутун мамлакатимиз бўйлаб пахта йиғим-терими қизғин давом этмоқда. Мавсум давомида теримчилар астойидил меҳнат қилиб, оилавий бюджетига ҳамда юртимиз иқтисодиёти ривожига ўз ҳиссаларини қўшиб келмоқдалар.

Пахта мавсуми давомида мажбурий меҳнатга ва болалар меҳнатига йўл қўймаслик, теримчилар учун қулай шарт-шароитлар яратилишига алоҳида аҳамият берилмоқда. Ҳар куни теримчилар учун дала бошида иссиқ овқат ва чой ташкил этилиб, терим пуллари ўз вақтида бериб борилмоқда. Шунингдек, илғор теримчилар сектор раҳбарлари, масъулияти чекланган жамият шаклидаги “Amudaryotex” хорижий корхонаси масъуллари томонидан рағбатлантирилмоқда.

Кузнинг гоҳ иссиқ, гоҳ совуқ об-ҳавосига қарамасдан меҳнат қилаётган теримчиларга ёрдам бериш мақсадида кўнгилли равишда депутатлар, корхона-ташкилот масъуллари ҳам ҳашарлар ташкил этишмоқда.

Мана шундай ҳашарларнинг яна бири 7 октябрь куни Амударё туманининг Чойкўл овули ҳудудида жойлашган Арслан Махсудов раҳбарлик қилаётган фермер хўжалигининг пахта далаларида бўлиб ўтди.

Ҳашарда тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари туман Кенгаши депутатлари, сиёсий партияларнинг туман Кенгаши раҳбарлари иштирок этишди.

Далаларда оппоқ бўлиб очилган пахтани теришнинг ҳам ўзгача завқи бор. Пахта қут-барака рамзи, мўл даромад манбаидир. Буни чуқур англаган юртдошларимиз бугун далага ошиқишмоқда, пешона тери билан “оқ олтин” хирмонларининг юксалишига муносиб ҳисса қўшишмоқда.

Шу куни Қорақалпоғистон Республикасида хизмат кўрсатган маданият ходими Хонимжон Ражабова, Қорақалпоғистон Республикаси Жўқорғи Кенгеси депутати Санобар Хўжамуратова ҳамда туман Маҳалла ва нуронийларни қўллаб-қувватлаш бўлими қошида ташкил этилган “Бувижонлар мактаби”, туман Оила ва хотин-қизлар бўлими қошида ташкил этилган “Оқила аёллар” ҳаракати аъзолари Хизир эли маҳалласи ҳудудида жойлашган 46-сонли умумий ўрта таълим мактабининг 10-11 синф ўқувчи қизлари билан учрашиб, давра суҳбати ташкил этишди.

Давра суҳбатида туман “Баркамол авлод” болалар мактаби директори Хонимжон Ражабова қизларни уй-рўзғор ишларига ўргатиш, қизларнинг ота-она, ака-ука олдидаги вазифалари қандай бўлиши лозимлиги ҳақида ўз насиҳатларини бериб ўтди.

Қорақалпоғистон Республикаси Жўқорғи Кенгеси депутати Санобар Хўжамуратова эса Ўзбекистон Республикаси Президентининг 2022 йил 31 август кунги “Қорақалпоғистон Республикасида тадбиркорлик, инновацион техналогиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари” тўғрисидаги фармонининг мазмун-моҳиятини батафсил тушунтириб берди.

Давра суҳбати давомида сўзга чиққанлар бугуни кунда ёшлар учун яратилаётган имкониятлар, шарт-шароитлар ҳақида гапириб, ёшларни янада шижоат билан билим олишга, олға интилишга ундашди.

 Шунингдек, қизларга вақтдан унумли фойдаланиб, касб-ҳунар эгаллаш, Олий ўқув юртларига кириш учун астойидил ҳаракат қилишлари лозимлиги айтиб ўтилди. Давра суҳбати давомида ўқувчи қизлар сўзга чиқиб, учрашувдан олган таассуротлари ҳақида гапирдилар.

Шундан сўнг, масъуллар Хизир эли маҳалласида узоқ йиллар давомида ёш авлодга таълим ва тарбия бериб нафақага чиққан 5 нафар ўқитувчининг ҳолидан хабар олишди. Уларга эсдалик совғаларини топширишди.

Яқиндагина нишонланган Ўқитувчи ва мураббийлар куни байрами муносабати билан “Кексалар ҳафталиги” доирасида ўтказилган мазкур учрашувлар таълим фахрийларига катта қувонч бағишлади. Меҳмонлар фахрий ўқитувчиларнинг узоқ йиллар давомида қилган меҳнатларини эътироф этиб, бугун ҳам ёш авлод тарбиясида уларнинг панду насиҳатлари, ҳаётий йўл-йўриқлари муҳим аҳамият касб этишини таъкидладилар.

Шунингдек, масъуллар Ражабов Омон фермер хўжалигининг пахта далаларида меҳнат қилаётган илғор теримчилар билан ҳам учрашиб, уларга яратилган шарт-шароитлар билан танишди.

Мазкур ҳудуддан сайланган Қорақалпоғистон Республикаси Жўқорғи Кенгеси депутати Санобар Хўжамуродова теримчилар билан мулоқот қилиб, юртимизда қишлоқ хўжалигига бозор механизмларининг жорий қилингани, пахта-тўқимачилик кластерларини ташкил қилиш орқали фермерларнинг манфаатдорлиги ошгани, терим пулларининг кўпайганини таъкидлаб ўтди. Натижада мажбурий меҳнат, айниқса болалар меҳнатининг ҳар қандай шаклларига барҳам берилиб, аҳоли моддий манфаатдорлик учун пахта йиғим-теримида иштирок этаёгани эътироф этилди.

Депутатлар дала бошида теримчиларга иссиқ овқат ва чой ташкил этилиб, терим пуллари ўз вақтида ҳисоб-китоб қилинаётганлигининг гувоҳи бўлдилар ҳамда илғор теримчларга эсдалик совғаларини топширдилар.

Туман ҳокимлигининг Ахборот хизмати.