“КЕКСАЛАР ҲАФТАЛИГИ” ДОИРАСИДА НАЗАРХОНЛИК КЕКСАЛАР ЧУҚУРЛАШТИРИЛГАН ТИББИЙ КЎРИКДАН ЎТКАЗИЛДИ

Амударё  туманидаги Назархон овул фуқаролар йиғинида ҳам “Кексалар ҳафталиги” доирасида ижтимоий-маънавий тадбирлар амалга оширилмоқда. Ногиронлиги бўлган, якка-ёлғиз кексалар ҳолидан хабар олиниб, уларнинг саломатлигини яхшилаш чоралари кўрилмоқда. Хусусан, 7 октябрь куни Назархон ОФЙ аҳолисига хизмат кўрсатувчи Амударё туман Тиббиёт бирлашмасига қарашли  Бердақ оилавий шифокорлик пунктида чуқурлаштирилган  тиббий кўрик ўтказилди. 

Чуқурлаштирилган тиббий кўрикни ўтказишда Амударё туман Тиббиёт бирлашмаси бошлиғининг ташаббуси билан ташкил қилиниб, оила шифокори, невролог, кардиолог, окулист, терапевт, стоматолог, отоларинголог шифокорлари иштирокида, ультратовуш, электрокардиограмма, ва лаборатор таҳлиллари ўтказилди.

Кўрик  давомида тиббий автобус билан Назархон ОФЙ нинг Сайкўл, Белсенди, Дербент, Жипек жоли ҳудудларига борилиб,  66 нафар қариялар тўлиқ тиббий кўрикдан ўтказилди.

Тиббий кўрик натижасида 44 нафар фуқарода турли хилдаги касалликлар  аниқланиб, уларнинг 41 нафарига амбулатор  шароитда, 3 нафар беморга касаллик турларига қараб, стационар даволаниш  ва соғломлаштириш   бўйича тавсиялар берилди.  3-4-гуруҳга кирувчи, уйда ётиб қолган беморлар ҳолидан хабар олиниб, меҳр-мурувват ёрдами кўрсатилди ва бепул  дори-дармонлар берилди.

Тиббий кўрикдан ўтказилган фуқароларга шифокорлар ҳамда  Тиббиёт бирлашмасининг Аҳолининг соғлом турмуш тарзини қўллаб-қувватлаш ва жисмоний фаоллигини ошириш бўлими томонидан касалликларнинг олдини олиш борасида  тўғри овқатланиш, жисмоний фаоллик, зарарли одатларга берилмаслик, руҳий осойишталик, шахсий ва жамоат гигиенаси, кун тартиби, тиббий маданият тушунчалари тўғрисида маслаҳатлар берилди ҳамда ушбу мавзуларга оид 35 хилдаги эслатма ва буклетлар тарқатилди.

Робия ЙЎЛДОШЕВА.