“ЭРМАНОВ ЎРОЗБОЙ” ФЕРМЕР ХЎЖАЛИГИДА ЙИҒИМ-ТЕРИМ АВЖИДА

Шу кунларда юртимизнинг барча ҳудудларида пахта йиғим-терими авж паллага кирган. Йиғим-терим жараёнларида фермер хўжаликлари ва кластер корхоналари ишчи-хизматчилари билан бирга қўшимча даромад топиш истагидаги иш билан банд бўлмаган меҳнатга лаёқатли аҳоли ҳам ихтиёрий равишда фаол иштирок этиб, пахта хирмонлари юксалишига муносиб ҳисса қўшишмоқда.

Амударё туманидаги Ўрта қалъа овулидаги Гулимбат Аҳмедов раислик қилаётган “Эрманов Ўрозбой” фермер хўжалигида ҳам 110 гектар ерга маҳаллий иқлимга мос, серҳосил “Султон” навли чигит экилиб, астойдил парвариш қилинди. Пахта далаларида 62 нафар ишчи ва пудратчиларнинг баҳор-ёз ойлари давомида қилган тинимсиз ва машаққатли меҳнатлари эвазига мўл кўсак етиштирилиб, ҳосилдорлик гектаридан 32 центнерга етказилди.

Ҳозирги кунда теримчиларнинг ғайрати билан кунига 10-12 тонна пахта териб топширилмоқда. Мавсум давомида режада белгиланган 367 тонналик пахта хирмонини бунёд этишни ўз олдиларига мақсад қилган хўжалик пудратчилари ва кўнгилли теримчилар, айни кунгача 240 тоннадан ортиқ “оқ олтин” териб улгуришди.

“Эрманов Ўрозбой” фермер хўжалиги ҳисобида 172 гектар ер майдони мавжуд. Кўп тармоқлига айлантирилган ушбу хўжалик ер майдонларининг 110 гектарига пахта экилган бўлса, 31 гектарида шу кунларда униб чиққан буғдой парвариш қилинмоқда. Қолган қисмида эса чорва учун озуқабоп, сабзавот, полиз экинлари етиштирилади. Хўжаликда асаларичилик, чорвачилик ва балиқчилик йўналишлари ҳам ташкил қилинган бўлиб, айни пайтда асаларилар оиласи 32 тага, чорва моллари 15 тага етди. Ҳудудда ташкил қилинган кўлда эса йилига 4-5 тонна балиқ етиштирилади.

Фермер хўжалигида иккиламчи экин экиш ишларига ҳам алоҳида эътибор қаратилади. Жумладан, ғалладан бўшаган майдонга картошка, сабзавот, дуккакли ва озуқабоп экинлар экилади. Турли мевали дарахтлар етиштирилган мевазор боғда ҳам ҳосил тўкин. Бу эса қўшимча даромад олиш имконини бермоқда.

Пахта ҳосилини нест-нобуд қилмасдан йиғиб олиш муҳим масалалардан бири ҳисобланади. Бунинг учун ҳудудлардаги каби туманимизда ҳам жиддий тайёргарлик кўрилди ва пахта теримига сентябрь ойи бошлариданоқ қизғин киришилди. Жорий йилда қўлда терилган пахтанинг ҳар бир килограмми учун биринчи теримда 1500 сўмдан, иккинчи теримда 1800 сўмдан кам бўлмаган миқдорда ҳақ тўланиши белгилангани эса терим суръатини оширишда асосий омил бўлиб хизмат қилмоқда.

Йиғим-терим тобора қизғин тусга кираётган айни пайтда дала меҳнаткашлари учун қулай иш ва дам олиш шароити яратилгани “Эрманов Ўрозбой” фермер хўжалиги теримчиларига ҳам ғанимат кунлардан унумли фойдаланишда муҳим аҳамият касб этмоқда.

Теримчи, ишчи ва ҳашарчиларга ҳар куни тушлик маҳали иссиқ овқат, чой берилади. Терим пулларининг ўз вақтида бериб борилаётгани, илғор теримчиларга рағбат сифатида тақдим этилаётган турли совғалар уларнинг ғайратига ғайрат қўшмоқда. Хўжалик ишчилари даладаги мўл ҳосилни қолдирмасдан териб, белгиланган режадан зиёд пахта топшириш, кўпроқ даромад топиш мақсадида янада жадал ҳаракат қилишмоқда.

Юртимизда пахта хирмонининг юксалишига ҳисса қўшиш оилага фойда, рўзғорга барака келтирадиган даромад манбаига айланиб бормоқда. Пахта йиғим-теримида фаол иштирок этиб, турли совғаларга эга бўлаётган, маблағ топиб, рўзғорига барака киритаётган теримчилар буни ўз ҳаётларида яққол ҳис этишмоқда.

Озода Худойберганова.