Спорт мактаби биринчилигида Амударё тумани боксчилари фахрли 1-ўринни қўлга киритишди

Мамлакатимизда болалар спортини ривожлантириш борасида амалга оширилаётган саъй-ҳаракатлар туфайли спортнинг олимпия турлари билан шуғулланувчилар сафи йил сайин ошиб бормоқда. Бугунги кунда Президентимиз томонидан илгари сурилган “Беш муҳим ташаббус” доирасида ўтказилаётган турли кўрик-танловлар, спорт мусобақалари тобора кўпроқ ёшларни қамраб олаётгани фикримизнинг яққол исботидир.

Амударё туманида ҳам ўсиб келаётган ёш авлодни жисмонан ва ақлан етук инсонлар қилиб тарбиялаб, вояга етказиш, уларни қизиқиш ва интилишлари асосида турли хил тўгаракларга жалб этиш, пировардида бўш вақтларини мазмунли ўтказишга эришиш мақсадида амалга оширилаётган чора-тадбирлар эътиборга молик.

Туманда ўқувчи-ёшларнинг бўш вақтларини мазмунли ўтказишлари учун барча шароитлар мавжуд. Айниқса, спортнинг олимпия турлари бўйича спортчилар учун яратилган шароитлардан унумли фойдаланаётган ёшлар мазкур спорт турлари бўйича сезиларли ютуқларга эришмоқдалар. Албатта, бунда туман ва республика миқёсида ўтказилаётган спорт мусобақалари муҳим аҳамиятга эга.

Жорий йилнинг 27-30 сентябрь кунлари Амударё тумани мезбонлик қилган бокс спорти мусобақаларида ҳам туманимизнинг ёш спортчилари ўзларининг тенгсизлигини намоён этдилар.

Амударё туман Болалар ва ўсмирлар спорт мактабига қарашли бокс спорти залида ўсмирлар ва ёшлар ўртасида бўлиб ўтган спорт мактаби очиқ биринчилиги мусобақаларида Хоразм вилояти ва Қорақалпоғистон Республикасининг Қўнғирот, Нукус, Хўжайли, Бўзатов, Тахиатош, Беруний ҳамда Амударё туманларининг бокс жамоалари иштирок этдилар.

205 нафар чарм қўлқоп усталари иштирок этган мазкур мусобақа уч кун давомида бири-биридан қизиқарли таассуроларга бой, муросасиз ва дўстона беллашувлар асосида ўтди.

20 та вазн тоифасида ўзаро куч синашган спортчилардан энг кучлилари якуний – финал босқичида беллашдилар. Мусобақани ҳалоллик ва адолат тамойиллари асосида ўтказиш мақсадида бокс бўйича тажрибали тренер бош ҳакам Жасур Нуримбетов раҳбарлигидаги ҳакамлар ҳайъати томонидан ҳар бир спортчининг куч ва имкониятларига муносиб баҳо берилди.

Қизғин беллашувлар асосида ва дўстона вазиятда ўтказилган мусобақада амударёлик чарм қўлқоп усталари умумжамоа ҳисобида фахрли 1-ўринни эгалладилар. Амударёлик спортчилар 8 та олтин, 4 та кумуш ва 4 та бронза, жами 16 та медаль билан мусобақанинг юқори поғонасидан жой олдилар.

Мусобақа якунида ғолиб спортчилар, 1-2-3-ўринни эгаллаган бокс жамоалари Амударё спорт мактаби маъмурияти ва ҳомий ташкилотлар томонидан ғолиблик дипломлари, медаллар ва эсдалик совғалари, ташаккурномалар билан тақдирланди.

Амударёлик спортчи-ёшларни эришган ушбу ғалабаси билан чин дилдан муборакбод этамиз ва келгуси мусобақаларда ҳам фаол иштирок этишиб, Амударё тумани, қолаверса, Қорақалпоғистон Республикаси ҳамда Ўзбекистон шуҳратини оламга ёйиб, она Ватан байроғини баланд кўтаришларида куч-қудрат, омад тилаймиз.

Робия Йўлдошева