ИПОТЕКА КРЕДИТИДАН ФОЙДАЛАНИШДА ҚЎШИМЧА ИМТИЁЗЛАР БЕРИЛДИ
Аҳолини янги ва қулай уй-жойлар билан таъминлаш борасида мамлакатимизда кўплаб ислоҳотлар амалга оширилмоқда. Зеро, фуқароларнинг яшаш шароитларини яхшилаш, уларнинг тинч ва осойишта ўз уйларида яшашлари учун қулай муҳит яратиш давлатимизнинг олдига қўйган муҳим вазифалардан биридир.
Уй-жой шароитини яхшилашга муҳтож аҳолини қўллаб-қувватлаш, ипотека кредити механизмларидан фойдаланиш амалиётини янада такомиллаштириш ва кенгайтириш мақсадида Ўзбекистон Республикаси Президентининг “Ипотека кредитидан фойдаланишда аҳолига қўшимча қулайликлар яратиш чора-тадбирлари тўғрисида”ги Қарори қабул қилинди. Мазкур қарорга мувофиқ 2023 йил 1 январдан бошлаб, дастлабки бадалнинг ва ипотека кредити бўйича фоизларнинг бир қисмини қоплаш учун субсидия берилган фуқароларнинг уй-жойларни сотиб олиш, қуриш ёки реконструкция қилиш учун олинган ипотека кредитларини ҳамда улар бўйича ҳисобланган фоизларни тўлаш учун йўналтирилган иш ҳақи ва бошқа даромадлари жисмоний шахслардан олинадиган даромад солиғига тортилмайди.
Мазкур имтиёз қарз олувчи ва бирга қарз олувчилар даромадининг бир солиқ даврида меҳнатга ҳақ тўлаш энг кам миқдорининг 80 бараваридан ошмаган қисмига татбиқ этилади. 2023 йилдан ипотека кредитига олинган мол-мулк олинган санадан 36 ойда қайта сотилса, кредит ва фоизлар учун йўналтирилган даромад солиққа тортилади. Шунингдек, 2022 йил 1 ноябрдан “коробка” ҳолатдаги уй-жойлар учун ипотека кредитлари ҳамда субсидия ажратишга рухсат берилади. Қарор билан 2021 йилда берилган субсидия ажратиш тўғрисидаги хабарномаларнинг амал қилиш муддати 2022 йил 31 декабргача узайтирилди. “Ўзбекистон ипотекани қайта молиялаштириш компанияси” АЖга банклар томонидан аҳолига берилган ипотека кредитларини қайта молиялаштириш учун 3 йил муддатга 12 фоиз ставкада ва фоиз тўловларини ҳар 6 ойда тўлаш шарти билан 300 млрд сўмгача бюджет ссудаси ажратилади. Уй-жойлар ва ипотека кредит олишда фуқароларга қўшимча қулайликлар яратиш учун вилоятлар марказларида ипотека марказлари ташкил этилади.
Аҳолини янги уй-жойлар билан тўлиқ таъминлаш мақсадида қабул қилинаётган бу каби қарорлар фуқаролар, айниқса, ижтимоий ҳимояга муҳтож оилаларни турар жойлар билан таъминлашда муҳим аҳамият касб этмоқда.
Сарвар Ҳайтбоев, туман Адлия бўлими Давлат хизматлар маркази бўлим бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
