МАКТАБДА СОҒЛОМ ТУРМУШ ТАРЗИ АФЗАЛЛИГИНИ ТАРҒИБ ЭТИШГА БАҒИШЛАНГАН ДАВРА СУҲБАТИ ЎТКАЗИЛДИ

Бугунги кунда аҳоли, айниқса ёшлар орасида соғлом турмуш тарзи маданиятини шакллантириш тиббиёт ходимларининггина эмас, таълим муассасалари, спорт муассасалари ва барча жамоат ташкилотлари билан бир қаторда оммавий ахборот воситаларининг ҳам вазифасидир. Соғлом турмуш турзи маданиятини шакллантиришдек улуғвор мақсаднинг амалга оширилишига Амударё туманининг ижтимоий-сиёсий нашри – “Тараққиёт кўзгуси” газетаси таҳририяти ходимлари ҳам баҳоли қудрат ҳисса қўшиб келишмоқда.

Таҳририят Ўзбекистон Республикаси Олий Мажлиси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат Фонди томонидан эълон қилинган грант танловида ўзининг “Соғлом турмуш тарзи – фаровон ҳаёт асоси” деб номланган лойиҳаси билан қатнашиб, ғолиб бўлди ва 2021 йил декабрь ойидан лойиҳани амалга ошириш бошланди.

Шу кунгача лойиҳа доирасида соғлом яшашга тарғиб этиш, ҳаётимиздан ўрин олган зарарли одатлар ва уларнинг оқибатлари хусусида, жисмоний фаолликнинг аҳамияти, спорт – соғлик гарови эканлиги хусусида “Амударё ТВ” телеканали, amunews.uz веб-сайти ва “Тараққиёт кўзгуси”, “Менинг оилам” газеталарида кўплаб турли жанрларда материаллар бериб борилмоқда.

Бундан ташқари, овул ва маҳаллаларда, таълим муассасаларида ўқувчи-ёшлар билан давра суҳбатлари ўтказиб келинмоқда. 14 сентябрь куни Қиличбой овулида фаолият юритаётган 15-сонли мактабда “Ёшлар ўртасида соғлом турмуш маданиятини шакллантириш” мавзусида ўтказилган тадбир ҳам шуларнинг биридир.

Давра суҳбатини мактаб директори ўринбосари Искандар Искандаров очди ва ўқувчиларга тадбир мақсадини тушунтирди. “Тараққиёт кўзгуси” газетаси махсус мухбири Ойгул Ражабова ёшларни соғлом турмуш тарзига амал қилиб яшаш, зарарли одатлардан тийилишга даъват этди ва бунинг ёшлар соғлом бўлиб камолга етишидаги аҳамияти ҳақида, шунингдек, соғлом яшаш қоидалари ҳақида тушунчалар берди.

Давра суҳбатида Амударё туман Тиббиёт бирлашмаси шифокори Матёқуб Эрназаров соғлом яшаш қоидалари ҳақида батафсил маълумотлар берди.

Таъкидландики, соғлом турмуш тарзи узоқ умр кўриш гарови эканлиги бугунги кунда кўпчиликка аён. Бироқ шу қоидаларга амал қилишга кўпинча эътиборсиз бўламиз. Аслида соғлом турмуш тарзи бу ҳар кимнинг ўз соғлиғи ҳақида қайғуриши, кексайган чоғида ҳам ҳеч кимнинг ёрдамига муҳтож бўлмай, эмин-эркин яшашга замин ҳозирлашидир. Бунинг учун ҳар ким ўз саломатлигига хавф солувчи зарарли одатлардан тийилиб, жисмоний фаол яшашга одатланмоғи лозим.

Шунингдек маърузачи бу борадаги қоидаларга ҳам кенг тўхталди.

Тадбир сўнгида ўқувчилар соғлом турмуш тарзига оид ўзларини қизиқтирган саволларга шифокордан батафсил жавоблар олдилар.

Грант лойиҳаси доирасида ўқувчилар билан ўтказилган давра суҳбатида иштирокчилар ёшлар саломатлигига салбий таъсир кўрсатувчи омиллар ва улардан сақланишнинг аҳамияти ҳақида кенг тушунчага эга бўлдилар.

М.Шомуродов