ПАХТА ЙИҒИМ-ТЕРИМ МАВСУМИ БОШЛАНИШИГА БАҒИШЛАНГАН ТАДБИР ЎТКАЗИЛДИ

Амударё туманида 2022 йил ҳосили учун етиштирилган пахта йиғим-терим мавсумининг рамзий бошланиши ҳисобланган “Оқ олтин карвони” тадбири ташкил этилди. Тадбирда туман ҳокими Султонбой Йўлдашев, сектор раҳбарлари ва қишлоқ хўжалиги соҳаси масъуллари, фермер хўжаликлар раҳбарлари иштирок этдилар.

 5 сентябрь куни бўлиб ўтган ушбу тадбирда дастлаб туман ҳокими Султонбой Йўлдашев сўзга чиқди ва пахтакорларни эрта баҳордан уруғ қадаб, агротехник тадбирларни ўз вақтида ва сифатли бажариб, ҳосилни йиғиб олиш мавсумига етиб келганликлари билан табриклади. Мавсум давомидаги пахта териш жараёнларида куч-қувват ва ғайрат-шижоат, “оқ олтин”ни нес-нобуд қилмасдан йиғиб олишда куч-қувват тилади.

Шунингдек, қишлоқ хўжалиги соҳаси вакиллари, фермер хўжалик раҳбарлари ҳам сўзга чиқиб, пахтакор-деҳқонларни баҳор-ёз ойларида барча агротехник тадбирларни ўз вақтида ва сифатли бажариб, маррага – ҳосилни йиғиб олишдек масъулиятли мавсумга етиб келганликлари билан табриклади. Шунингдек, барчани ҳосилни нест-нобуд қилмай йиғиб-териб олишга бор имкониятни сафарбар қилишга чақирди.

Маълумот ўрнида айтиш керакки, жорий йилда амударёлик пахтакорлар ўз олдиларига улкан марраларни қўйдилар. Масъулияти чекланган жамият шаклидаги “Amudaryotex” хорижий корхонаси кластери билан 351 та пахтачилик фермер хўжаликлари ўртасида шартномалар тузилиб, 13 минг 900 гектар ерга туманимиз иқлим шароитига мос серҳосил пахта навлари экилди.

Фермер хўжаликлари раҳбарлари жорий қишлоқ хўжалиги йилининг барча мавсум юмушларини агротехника қоидаларига мувофиқ ташкил этдилар. Етиштирилган пахта ҳосилини қисқа муддатларда йиғиб-териб олиш бўйича туманда терим отрядлари ташкил қилиниб, уларга ёрдамчи-теримчилар бириктирилган.

Барча пахта майдонларида дефолиация ишлари сифатли якунига етказилди. Шунингдек, мавсум бошланиши олдидан пахта йиғим-теримини кўтаринки руҳда, уюшқоқлик ва жипслик билан амалга ошириш, теримчилар ва кўнгилли ҳашарчилар учун зарур шарт-шароитлар яратиш мақсадида терилган пахтани қабул пунктларига ташиш учун транспорт воситалари, тиркама, терим суръатини бир маромда олиб боришни таъминлаш учун тарозилар тахт қилиб қўйилди.

Қабул пунктларида ҳам ёнғин хавфсизлиги қоидаларига риоя қилинган ҳолда мавсумга тайёргарлик ишлари олиб борилди ва хўжаликлардан келтирилган пахталарни ўз вақтида қабул қилиб олишга шай қилиб қўйилди. Бундан ташқари, теримчиларнинг сифатли тушлик билан мунтазам таъминланишларига алоҳида эътибор қаратилиб, фермер хўжаликлари томонидан қозон-ўчоқлар, тоза ичимлик суви сақлаш идишлари ва бошқа зарур ашёлар тайёрланди.

Тадбирда иштирок этган секторлар раҳбарлари ҳам туманимиз далаларидаги пахта хирмони баракатли бўлиб, амударёлик пахтакорлар ҳар йилгидек Республикада биринчилардан бўлиб, мўл пахта хирмони бунёд этишларида омад тиладилар. Маросимдан сўнг, қабул масканида пахта қабул қилиш ишлари бошлаб юборилди.

Туманимиздаги барча фермер хўжаликлари пахта далаларида ҳосил йиғим-терими жадал суръатларда бошлаб юборилди.

О.Худойберганова.