Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳаитов Амударё туманида бўлди

20 август куни Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳайитов, Боғдорчилик ва иссиқхона хўжалигини ривожлантириш агентлиги бошлиғи Ҳусниддин Каримовлар Амударё тумани ҳокими Султонбой Йўлдашев ҳамроҳлигида туманнинг Дўрман ҳамда Холимбег овулларидаги фермер хўжаликларида бўлди.

Ташриф давомида дастлаб меҳмонлар Дўрман овулининг фермер хўжаликларидаги ғўза майдонларини кўздан кечирди.

Кўпни кўрган, тажрибали деҳқонлар ёз чилласидаги ҳарорат ғўза ниҳолларининг ривожланишида ва мўл ҳосил етиштиришда муҳим ўрин тутишини яхши биладилар. Амударёлик фермерлар ҳам ғўза экилган 2 минг 200 гектар майдонларда агротехника тадбирларини ўз вақтида амалга ошириб, вегетация давридаги тадбирларни оптимал вариантларда ва сифатли ўтказишга бор куч ва ресурсни сарф этмоқдалар.

Учрашув давомида Актам Ҳайитов ғўза парваришида белгиланган агротехник тадбирларни ўз вақтида амалга ошириш, касаллик ва зараркунандаларга қарши самарали курашиш, озиқлантириш ишларини якунлаш ва ушбу майдонларни шарбат усулида пешма-пеш суғориш ҳамда культивация қилиш ишларининг ташкил этилиши бўйича таклифларини бериб ўтди.

Шундан сўнг, Холимбег овулида истиқомат қилувчи ака-укалар Турсунбой ҳамда Эркинбой Тоғаевларнинг хонадонларига ташриф буюрилди. Ўзлариниг ихчамгина томорқасидан унумли фойдаланиб, турли полиз экинларини етиштириб катта даромад манбаига эга бўлаётган ака-укалар етиштирган маҳсулотларини бозор расталарига чиқариб, аҳолини арзон ҳамда сифатли маҳсулотлар билан таъминлашга ҳисса қўшмоқдалар.

Дарҳақиқат, томорқа — ризқ-насиба, мўмай даромад манбаи. Унинг дастурхонимиз файз-у баракаси, аҳоли турмуш фаровонлиги, юрт ободлигини таъминлашдаги ўрнининг эса қиёси йўқ. Ҳамма гап ундан нечоғли оқилона фойдалана олишда.

Ташриф давомида меҳмонлар Холимбег овулида истиқомат қилувчи, ўзларининг тадбиркорлик фаолиятини қишлоқ хўжалиги маҳсулотларини етиштириш орқали йўлга қўйган фуқароларнинг далаларида ҳам бўлдилар.

Ушбу фуқаролар ҳоким ёрдамчиси Акмалбек Холмуратовнинг кўмаги билан e-auksion тизими орқали 25 сотихдан ижарага ер олишиб, ер майдонларида етиштирилган экинларни агротехника қоидаларига риоя қилган ҳолда парваришлаб, сифатли полиз маҳсулотларини етиштирди.

Экинларнинг дастлабки ҳосилидан 15 млн. сўм атрофида соф даромад кўрган фуқаролар бугунги кунга келиб ўз далаларига такрорий экинлар экишган.

Актам Ҳайитов ҳамда Ҳусниддин Каримовлар бир қарич ердан ҳам унумли фойдаланаётган пахта далаларидаги миришкор деҳқонларимиз, томорқасида оиласининг йиллик эҳтиёжини қоплаш билан бирга қўшимча даромад топаётган туманимиз аҳолисининг ишларига омад тиладилар.

Туман ҳокимлигининг Ахборот хизмати.