Ҳоким ёрдамчилари фаолиятининг натижадорлигига бағишланган очиқ мулоқот бўлиб ўтди

2. 27 июль куни Амударё тумани ҳокимлигининг Ахборот хизмати томонидан “Аҳоли бандлигини таъминлаш ҳамда камбағалликни қисқартириш бўйича ҳоким ёрдамчилари томонидан 1-ярим йиллик даврида амалга оширилган ишлар” мавзусида очиқ мулоқот ташкил этилди.

Унда туман ҳокимининг биринчи ўринбосари Рашид Салаев, Амударё тумани Маҳаллабай ишлаш ва тадбиркорликни ривожлантириш маркази директори Жасур Давлетов, тумандаги ҳоким ёрдамчилари ҳамда оммавий ахборот воситалари вакиллари иштирок этишди.

 Дасталаб, туман ҳокимининг биринчи ўринбосари Рашид Салаев ҳоким ёрдамчилари фаолиятининг 6 ойлик натижадорлиги бўйича ҳисобот берди. Шундан сўнг, журналистлар иштирокчиларга саволлар билан мурожаат қилдилар.

 Жумладан, ҳозирги кунда фуқаролор томонидан энг кўп талаб келиб тушаётган оилавий тадбиркорликни ривожлантириш дастурлари доирасида имтиёзли кредитларнинг ажратилиши айнан қайси йўналишларда, қандай мезонлар асосида амалга оширилаётгани бўйича журналист Азиза Мадраҳимова савол берди.

 Келтирилишича, Амударё туманига 68,7 млрд. сўм ресурслар ажратилган бўлиб ҳар бир маҳаллага аҳоли сонидан келиб чиқиб ресурслар тақсимланган. Бугунги кунга келиб оилавий тадбиркорликни ривожлантириш дастури асосида 2 минг 673 нафар фуқаролар томонидан кредит олиш учун аризалар юборилган бўлиб, шундан 1 минг 859 таси мақсадли деб топилиб, ҳоким ёрдамчилари томонидан тавсияномалар берилган ва ҳозирда 1 минг 635 нафар фуқароларга дастур доирасида жами 34,9 млрд. сўмлик кредитлар ажратилган.

Шунингдек, журналистлардан Маҳмуджон Шомурадов мамлакатимизда аҳолининг ижтимоий-иқтисодий қатламига кўрсатилаётган моддий ёрдамлар, бу борада ҳоким ёрдамчилари томонидан амалга оширилаётган ишлар, субсидия қандай ҳолларда ажратилиши бўйича саволлар билан мурожаат қилди.

 Таъкидланганидек, Ўзбекистон Республикаси Вазирлар Маҳкамасининг 2022 йил 11 майдаги 252-сонли қарорига асосан, субсидиялар Маҳаллабай ишлаш ва тадбиркорликни ривожлантириш агентлигининг Аҳолини тадбиркорликка жалб қилиш жамғармаси маблағлари ҳисобидан ажратилиши белгилаб қўйилган.

Бунда ҳоким ёрдамчилари 12 турдаги тадбиркорлик йўналишлари учун субсидиялар ажратилиши учун тавсиянома беришлари мумкин.

Тадбиркорликни бошлаш учун субсидия олиш истагини билдирган фуқаролар биринчи навбатда ҳоким ёрдамчисига учрашишлари керак бўлади. Ҳоким ёрдамчиси фуқароларга onlinemahalla.uz сайти орқали ариза юборишда кўмаклашади. Кейинчалик юборилган аризанинг скоринг баҳолаш тизимидан қандай натижа билан ўтишига қараб ҳоким ёрдамчиси тавсиянома беради ёки уни рад этади.

Маълумот ўрнида айтиш керакки, бугунги кунда тумандаги ҳоким ёрдамчилари ташаббуси билан фуқароларнинг таморқада ўзини-ўзи банд қилиш мақсадида 270 млн. сўм субсидия маблағлари эвазига 95 нафар фуқарога енгил конструкцияли иссиқхона ҳамда 5 нафар фуқарога суғориш тизимлари қуриб берилган.

Шунингдек, касб-ҳунарга ўқитиш ва асбоб-ускуна харид қилиш учун “Раҳимбоева Саломат” ишлаб чиқариш кооперативи томонидан Хитой, Беш овул, Тош қалъа ва Юқори қишлоқ овул ва маҳаллаларида тикувчилик кооперациясини ташкил қилиш эвазига 49 нафар фуқароларнинг бандлигини таъминлаш мақсадида 132,1 млн. сўм субсидия маблағлари ажратилган.

Қипчоқ овули ҳудудидаги “Amudaryo outlet” ишлаб чиқариш кооперативига 15 нафар хотин-қизларни аъзо қилган ҳолда 60 млн. сўм субсидия маблағлари ажратилган. Бундан ташқари, 10 нафар ишсиз фуқарога 2,7 млн. сўм миқдорида субсидиялар ажратилган.

Очиқ мулоқот давомида журналистлар ҳоким ёрдамчилари фаолияти бўйича ўзларини қизиқтирган саволлар билан мурожаат қилиб, тегишлича жавоблар олдилар.

Туман ҳокимлигининг Ахборот хизмати