Сенатнинг Аграр ва сув хўжалиги масалалари бўйича қўмитаси раиси Тажиев Бахадир Садуллаевич Амударё туманига ташриф буюрди
8 июнь куни Амударё туманига Сенатнинг Аграр ва сув хўжалиги масалалари бўйича қўмитаси раиси Тажиев Бахадир Садуллаевич ташриф буюрди. Сенатор дастлаб туман ҳокимлигининг мажлислар залида Қорақалпоғистон Республикасини ижтимоий-иқтисодий ривожлантириш, инвестиция лойиҳалари ва давлат дастурларини амалга ошириш, аҳоли бандлигини таъминлаш, “маҳаллабай” ишлаш, “Темир дафтар”, “Аёллар дафтари”, “Ёшлар дафтари”нинг юритилиш ҳолати, фуқаролар мурожаатлари, аёллар муаммоларини тизимли ҳал этиш, уларни ижтимоий қўллаб-қувватлаш борасида белгиланган вазифалар ижроси юзасидан йиғилиш ўтказди.
Йиғилишда ҳоким ўринбосарлари, ҳокимлик масъул ходимлари, идора ва ташкилотлар вакиллари иштирок этишди.
Йиғилиш давомида кун тартибида белгиланган масалалар юзасидан мутасадди идора-ташкилот вакилларининг ҳисоботлари тингланиб, зарурий тавсия ва таклифлар берилди.
Шундан сўнг cенатор туман ҳокими ўринбосари – Оила ва хотин-қизлар бўлими бошлиғи Гўзал Сабурова ҳамроҳлигида Чойкул овулида саватчилик билан шуғулланаётган аёл-қизлар фаолияти билан танишди.
Чойкўл овулида “Аёллар дафтари”га киритилган аёл-қизларни ижтимоий қўллаб-қувватлашга алоҳида эътибор қаратилмоқда. Масъулларнинг ёрдами билан уларнинг 30 нафари касаначилик орқали юқори даромад манбаига эга бўлишган.
Чойкўллик яна бир фаол аёл – 1-босқичда “Аёллар дафтари”га киритилган Зумрад Жаббарова маҳалла фуқаролар йиғини масъулларининг ёрдами билан иссиқхона ташкил қилган. Меҳмонлар мазкур иссиқхонада бўлиб, тадбиркор аёл билан яқиндан суҳбатлашди. Дастлаб 15 млн. сўм, сўнгра яна 25 млн. сўм имтиёзли кредит олиб, иссиқхона барпо этган ва уни кенгайтирган оила бекаси бугунги кунда томорқасидаги кичик бизнеси орқасидан юқори даромад олиб, оила бюджетига даромад келтирмоқда.
Сенатор билан суҳбат давомида тадбиркор аёл иссиқхонадан кўрган даромади, сабзавотларни парваришлаб етиштириш усуллари ҳамда юқори ҳосил олиш йўллари ҳақида ўз фикрларини баён этди.
Ташриф давомида сенатор Чойкўл овулидаги “Манғит омад савдо” масъулияти чекланган жамиятига қарашли кластерда интенсив усулда барпо этилган узум боғида ҳам бўлди. Ушбу узумзорда йил якунига қадар 30 гектар узум экилиши режалаштирилган бўлиб, бугунги кунга қадар 14 гектар ерда экиш ишлари тўла якунланган. Яна 16 гектар узум куз мавсумида экилади.
Сенатор экилган узум навлари, ҳосилдорлик даражаси билан қизиқиб, деҳқонлар билан суҳбатлашди ҳамда узумчиликни янада ривожлантириш бўйича ўзининг тавсияларини бериб ўтди.
Шундан сўнг сенатор, туман ҳокими ва ҳоким ўринбосарлари ҳамроҳлигида Гулзор маҳалласи ҳудудида 15,6 млрд сўм маблағ эвазига янгидан қуриб битказилган 3 та 5 қаватли, жами 90 та хонадонли уй-жойлар массивига ташриф буюрди.
Сенатор хонадонларга янгидан кўчиб келган ёш оилалар билан суҳбатлашиб, янги уй-жой билан самимий табриклади.
Янгидан қурилган уй-жойларнинг энг муҳим афзал томони − бу биноларнинг муҳандислик-коммуникация тармоқларига уланиб, ижтимоий ва бозор инфратузилмаси объектларига яқин ҳудудда жойлашганидир. Янги массивларда қурилган ва қурилаётган автомобиль йўллари, сув, газ ва электр тармоқлари, болалар боғчалари, савдо шохобчалари, спорт майдончалари аҳолининг қулай шарт-шароитларда яшаши учун комплекс тизимни ҳосил қилмоқда.
Ташриф давомида сенатор “Амударё томорқа хизмат” масъулияти чекланган жамиятига қарашли томорқа кластери фаолияти билан ҳам яқиндан танишди.
Шундан сўнг, меҳмонлар Амир Темур номли овул ҳудудида янгидан бунёд этилган сув тозалаш қурилмасининг фойдаланишга топширилиш маросимида иштирок этишди. Амир Темур номли овулда туман ҳокимлигининг ташаббуси билан овул аҳолисини тоза ичимлик суви билан таъминлаш мақсадида сув тозалаш қурилмаси ва махсус иншоот бунёд этилди. 5 млрд. 300 млн сўм эвазига бунёд этилган мазкур сув тозалаш маркази орқали овулдаги 244 та хонадон тоза ичимлик суви билан таъминланади.
Иншоотнинг фойдаланишга топширилиш маросимида секторлар раҳбарлари, туман ҳокими ўринбосарлари, муассаса ва ташкилотлар раҳбарлари, овул аҳолиси иштирок этишди.
Маълумот ўрнида айтиш керакки, Бирлашган миллатлар ташкилотининг ҳисоботига кўра, бугунги кунда сайёрамиздаги 2 миллиард аҳоли тоза ичимлик сувидан бевосита фойдаланиш имконига эга эмас. Мутахассисларнинг таҳлилларига кўра, жаҳонда 2000 йилдан 2050 йилгача бўлган даврда сувга бўлган глобал талаб 55 фоизга ўсади. Айниқса, Ўзбекистоннинг қўшни мамлакатлардан келадиган сув таъминотига боғлиқлиги юқори даражада, яъни истеъмол қилинадиган сувнинг 80 фоизи ташқаридан келади. Шунинг учун ҳам ҳар бир юртдошимиз сувни тежашга алоҳида эътибор қаратиши керак.
Сув танқислигининг салбий оқибатларини туманнинг бошқа ҳудудларига қараганда Амир Темур номли овул ҳудудида яшовчи аҳоли айниқса кўпроқ ҳис қилмоқда. Туркманистон Республикасига чегарадош ҳудудда жойлашган Амир Темур номли овул оқар сув йўлларининг охирги қисмида, туманнинг чеккасида жойлашган. Мазкур овул ичимлик суви тармоғига ҳам уланмаган. Эндиликда янгидан бунёд этилган сув тозалаш қурилмаси ер ости сувларини 35 метр чуқурликдан, диаметри 300 миллиметр бўлган 4 дона қувурлар орқали олиб, кераксиз тузлар ва минераллардан тозалаган ҳолда аҳоли истеъмоли учун етказиб беради.
Сенатор Баҳодир Тажиев туманда амалга оширилаётган бунёдкорлик ишлари, қишлоқ хўжалиги соҳасидаги ютуқларни эътироф этди.
Туман ҳокимлигининг ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
