3-сектор раҳбарияти томонидан Қизилчоли маҳалласида сайёр қабул ўтказилди

Инсон манфаати – энг олий қадриятдир. Мамлакатимизда амалга оширилаётган ислоҳотлар негизида айни мақсад устувор ўринга қўйилаётгани жойлардаги ўзгаришларда яққол сезилмоқда. Бинобарин, одамларни рози қилиш, уларнинг ҳуқуқ ва манфаатлари ҳимояси йўлидаги саъй-ҳаракатлар амалий натижасини бермоқда.

Айниқса, аҳоли муаммоларини ечишнинг мутлақо янги, самарали тизимини яратиш мақсадида давлат органлари ва корхона-ташкилот раҳбарларининг халқ орасига киришини таъминлайдиган сайёр қабуллар одамлар ҳаётида муҳим ўрин тутмоқда. Буни Амударё туманидаги сектор раҳбарлари томонидан ўтказиб келинаётган сайёр қабуллар мисолида ҳам кўришимиз мумкин.

19 май куни туманнинг Қизилчоли маҳалласи ҳудудидаги 9-сонли умумий ўрта таълим мактаби биносида 3-сектор масъулларининг навбатдаги сайёр қабули бўлиб ўтди.

Унда туман 3-сектор раҳбари, туман Ички ишлар бўлими бошлиғи Улуғбек Худойберганов, туман Халқ қабулхонаси бўлими мудири Эркин Ражабов ҳамда тегишли корхона ва ташкилот масъуллари иштирок этди.

Дастлаб, туман Ички ишлар бўлими бошлиғи Улуғбек Худойберганов томонидан маҳалла институтининг устунлари ҳисобланган маҳалла раиси, ҳоким ёрдамчиси, хотин-қизлар фаоли ва ёшлар етакчисининг фаолият йўналишлари таҳлил қилинди.

Шунингдек, мазкур лавозим эгаларига маҳаллаларда “хонадонбай” ва “фуқаробай” ишлаш бўйича тавсиялар бериб ўтилди.

Шундан сўнг, туман Халқ қабулхонаси бўлими мудири Эркин Ражабов маҳаллаларда янгидан жорий қилинган ҳоким ёрдамчиси, ёшлар етакчиси муаммоларни жойида ҳал қилаётганлигини эътироф этиб, бунинг натижасида туман Халқ қабулхонасига келиб тушаётган мурожаатлар сезиларли даражада камайганлигини айтиб ўтди. Шу баробарида Халқ қабулхонасига келиб тушаётган бирорта ҳам мурожаат ҳеч қачон эътибодан четда қолмаслигини, иложи борича ижобий ечим топишини таъкидлади.

Шунингдек, туманимизда истиқомат қилаётган ҳар бир фуқаро учун, туман Халқ қабулхонаси эшиклари доимо очиқлиги, ҳар бир фуқаро ўз муаммолари билан бемалол мурожаат қилишлари мумкинлигини айтиб ўтди.

Шундан сўнг, аҳолининг муаммо ва таклифларидан иборат мурожаатлари тингланди.

Учрашув давомида аҳолидан келиб тушган ҳар бир мурожаат атрофлича ўрганилиб, тегишли соҳавий ташкилот раҳбарларига мурожаатларни ўз вақтида, адолатли ва холис кўриб чиқиш юзасидан аниқ топшириқлар берилди ҳамда ижроси сектор раҳбари томонидан назоратга олинди.

Бундай учрашувларнинг ўтказилиши аҳолининг турмуш фаровонлигини янада яхшилаш, энг муҳими муаммоларни ижобий ҳал этиш орқали халқни рози қилиш учун хизмат қилиши билан алоҳида аҳамият касб этади.

Зеро, халқ билан мулоқот, уларнинг дарду ташвиши билан яшаш энг асосий мақсад бўлиб, унинг рўёби юртимиз равнақига, унинг янада гуллаб-яшнашига, фуқароларнинг тинч, осуда, фаровон ҳаёт кечиришларини таъминлашга хизмат қилиб келмоқда.

Туман ҳокимлигининг Ахборот хизмати.