1-сонли мактаб ўқувчилари Хотира ва қадрлаш кунини кенг нишонлашди

Шу кунларда мамлакатимизнинг барча ҳудудларида бўлгани каби Амударё туманида ҳам ўз Ватани озод, ҳур ва обод бўлиши учун курашган инсонлар хотирасига бағишлаб турли маънавий-маърифий тадбирлар ўтказилиб, миллий қаҳрамонларимизнинг хотирасига ҳурмат-эҳтиром кўрсатилмоқда. Ўтганларни, уларнинг хайрли ишларини ёдга олмоқ, жасоратлари ҳақида бугунги ёшларни хабардор қилмоқ халқимизга хос эзгу фазилатлардандир.

Айниқса Иккинчи жаҳон урушида ҳалок бўлган юртдошларимизни хотирасини адабийлаштириш, оловли жанггоҳларда бемисл азоб-уқубатларни сабр-бардош билан енгиб, элимизга омон қайтиб, яримжон ҳолида ҳам юртимиз равнақи учун турли соҳаларда меҳнат қилган уруш қатнашчиларини эсга олиш ҳам улкан тарбия мактабидир. Чунки бугунгидай дориломон кунлар ўз-ўзидан келмаган. Бугунги бахтиёр замонамиз ота-боболаримиз заҳматли меҳнатлари, машаққатлари мевасидир.

Шу йилнинг 6 май санасида туманимиздаги 1-сонли умумий ўрта таълим мактабининг 3-А синфида ташкиллаштирилган “Хотира – муқаддас, қадр – улуғ” деб номланган тадбирда ҳам шу ҳақда батафсил сўз борди.

Тадбирга мазкур синф ўқувчиларидан ташқари мактаб директорининг маънавий-маърифий ишлар бўйича ўринбосари Санобар Муродова, илмий ишлар бўйича ўринбосари Шоҳида Жабборберганова, ижодий-маданий ишлар бўйича тарғиботчиси Зулфия Оллаёрова ва фан ўқитувчилари, туманимизда жойлашган 92-02 ҳарбий қисм хизматчиси Шерзод Отабоев, ўқувчиларнинг ота-оналари иштирок этдилар. Бошловчилар ўзбек ва рус тилларида иштирокчиларга салом бериб, 9 май – Хотира ва қадрлаш кунига бағишланган тадбир бошланишини эълон қилдилар. Кўнгилларда фахр, жўшқинлик уйғотиб давлатимиз мадҳияси янгради.

3-А синф раҳбари, тадбир ташкилотчиси Гулнора Йўлдошева, 92-02 ҳарбий қисм хизматчиси Шерзод Отабоев, мактаб ижодий-маданий ишлар бўйича тарғиботчиси Зулфия Оллаёровалар юртимизда кенг нишонланаётган 9 май – Хотира ва қадрлаш куни байрами моҳияти ҳақида, Иккинчи жаҳон уруши, фронт орти меҳнат фахрийларига кўрсатилаётган ғамхўрликлар ҳақида гапирдилар. Ачинарлиси, жанггоҳлардан омон қайтиб урушдан кейинги оғир тикланиш йилларида ҳам мардона меҳнат қилган инсонлар сафи тобора камайиб бораяпти, ўша машъум уруш қаҳрамонларининг кўпчилиги дунёдан ўтиб кетишди. 1-сонли мактаб ҳудудида ҳам уруш қатнашчилари бор эди.

Тадбирда ўқувчилар даврага уларнинг портретларини олиб чиқишиб, ҳар бири ҳақида маълумотлар айтишди. Урушни лаънатловчи, тинчлик-осойишталикни улуғловчи шеърлар, қўшиқлар ижро этишди.

Тадбир барчада улкан таассуротлар қолдирди, кўнгилларида бугунгидай ҳур ва бахтиёр замонамизга, тинчлик-осойишталигимизга ҳурмат ҳиссини юксалтирди, доимо огоҳ ва ҳушёр яшашга чорлади.

Ойгул РАЖАБОВА.