“КИТОБ – БИЗНИ БИРЛАШТИРАДИ” ТАДБИРИДА ЁШ ИЖОДКОРНИНГ ИЛК ШЕЪРЛАР ТЎПЛАМИ ТАҚДИМОТ ЭТИЛДИ

Амударё тумани халқ таълими бўлимига қарашли 3-сонли умумтаълим мактабида Президентимиз бошлаб берган 5 та муҳим ташаббус доирасида ёшлар китобхонлигини ривожлантириш, ижодкор ёшларни янада рағбатлантириш, уларнинг истеъдодларини юзага чиқариш, қўллаб-қувватлашга қаратилган амалий тадбирлар туфайли мактаб ўқувчилари орасидан алоҳида иқтидорга эга ёш ижодкорлар етишиб чиқмоқда. Бунда мактаб кутубхонаси кутубхоначиси  Тозахон Қдирниёзова томонидан амалга оширилаётган маънавий-маърифий давра суҳбатлари, таниқли шоир ва ёзувчилар билан учрашувлар, китобхонлик тарғиботига бағишланган тадбирлар  муҳим аҳамият касб этмоқда.

Жорий йилнинг 14 апрель санасида мактаб кутубхонасида ўтказилган “Китоб бизни бирлаштиради” адабий-мусиқий тадбирда ҳам мактаб ўқувчилари орасида илмга интилувчан, қалблари ижодкорликка мойил ҳаваскор-ёшлар, кўплигига ишонч ҳосил қилдик. Хусусан, Айнура Сарсенбоева, Қамар Оринбоева, Умида Отажонова, Дилшодбек Муродбоев, Нафиса Казакбоева, Жанар Парахатова, Албина Сапарбаева, Молдир Аманбаева, Сандугаш Даулетбаева, Жазира Базарбоева, Улуғбек Сағинбоев, Ерназар Калмуратов, Нурлан Назарбаев каби бири-биридан эпчил, билимдон ва ҳозиржавоб ўқувчилар ўзларининг чиқишлари билан ҳақиқий китобхон эканликларини намойиш этдилар.

 “Китоб – бизни бирлаштиради” шиори остида ўтказилган тадбир давомида китобхон ўқувчилар ўзбек, қорақалпоқ, қозоқ, рус мумтоз ва ҳозирги замон адабиёти намоёндалари ижодидан намуналар ўқидилар. Жаҳон адабиётининг дурдона асарлари ҳақида ўз фикрлари ушбу асарлардан олган таассуротлари ҳақида тўлқинланиб сўзладилар.

Тадбирда мактаб кутубхонаси кутубхоначиси Тозахон Қдриниязова Президентимизнинг беш муҳим ташаббуси доирасида амалга оширилаётган китобхонлик тарғиботига бағишланган тадбирлар ҳақида тўхталиб, китоб мутолааси туфайли бир-бирлари билан самимий мулоқот ўрнатаётган ўқувчилар, уларнинг қизиқишлари, ижодий изланишлари ҳақида фахрланиб сўз юритди.

Дарвоқе, китобхон ёшлардан Шаҳзода Жўллибоева, Муҳаббат Оринбосарова, Навбаҳор Сарсенбоеваларнинг шеърлари туман ва Республика матбуотида чоп этилибгина қолмай, Шаҳзода Жўллибоева билан Муҳаббат Оринбасарованинг илк шеърий тўпламлари нашрдан чиқди. Мактабнинг яна бир иқтидорли ўқувчиси Навбаҳор Сарсенбаеванинг шеърлар тўплами ва бир гуруҳ ижодкор ўқувчилар шеърларидан иборат гала тўплам нашрга тайёрланмоқда.

Биз ижодий жамоамиз билан мазкур мактабда бўлган кунимиз “Китоб – бизни бирлаштиради” маънавий-маърифий тадбир давомида Муҳаббат Оринбасарованинг “Ҳақ ниетлер” деб номланган илк шеърлар ва ҳикоялар тўпламининг тақдимоти ҳам ўтказилди. Тошкент шаҳридаги “Муҳаррир” нашриётида чоп этилган Муҳаббат Оринбасарова қаламига мансуб мазкур китобдан унинг она Ватан, дўстлик, тинчлик, меҳр-оқибатни тараннум этувчи шеърлари ва ҳикоялари ўрин олган.

Китоб тақдимоти муносабати билан тадбир меҳмонлари – “Жайхун илҳомлари” ННТ раиси, Ўзбекистон Журналистлари ижодий Уюшмаси аъзоси, шоирЎрозали Рейимов, Ўзбекистон Ёзувчилар Уюшмаси аъзоси, Қорақалпоғистон Республикасида хизмат кўрсатган журналист, “Тараққиёт кўзгуси” газетаси махсус мухбири Робия Йўлдошевалар ёш ижодкор қиз Муҳаббат Оринбасаровани катта шеърият сари қўяётган илк қадами билан муборакбод этишиб, ёш қаламкашга ижодий парвозлар тиладилар. Шунингдек, Муҳаббат Оринбасарованинг онаси ва устози Алмагул Бекмуратова, маънавий-маърифий ишлар бўйича мактаб директорининг ўринбосари, Гулчеҳра Алламбекова, она тили ва адабиёти фани ўқитувчиси Фарида Ендирбаева, қорақалпоқ тили фани ўқитувчиси Жулдузхан Турғанбаевалар ўзларининг самимий тилакларини билдирдилар.

Бўлиб ўтган тадбир ўқувчи-ёшларнинг иқтидорларини ривожлантириш орзу-интилишларини қўллаб-қувватлашга қаратилгани билан муҳим аҳамият касб этди.

Р.АНАРОВ, М.ШОМУРОДОВ лавҳаси.