Қиличбой овулидаги 34–сонли мактабда “Беш ташаббус” доирасида тадбир бўлиб ўтди

Маълумки, жорий йил 5 апрель куни Муҳтарам Президентимиз Шавкат Мирзиёев раислигида халқ таълими соҳасида амалга оширилаётган ислоҳотлар натижадорлигининг таҳлили юзасидан видеоселектор йиғилиши ўтказилган эди. Йиғилиш давомида Президентимиз томонидан таълим тизимини ислоҳ қилиш бўйича бир қатор вазифалар белгилаб берилди. Мазкур вазифалар ижросини таъминлаш мақсадида Қиличбой овулидаги 34-сонли умумий ўрта таълим мактабда “Беш ташаббус” доирасида тадбир бўлиб ўтди.

Унда туман ҳокими Султонбой Йўлдашев, Ўзбекистон Республикаси Халқ таълими вазирлиги бўлим бошлиғи Отабек Ибрагимов, Қорақалпоғистон Республикаси Халқ таълими вазирлиги бўлим бошлиғи Шарафаддин Тажимуратов ҳамда туман Халқ таълими бўлими масъул ходимлари иштирок этишди.

Тадбир аввалида меҳмонлар мактаб ўқувчиларининг ижод намуналари ва уларнинг қўл меҳнатлари билан яратилган маҳсулотларни ўзида жамлаган кўргазмани томоша қилдилар. Кўргазмада ўқувчиларнинг “Беш ташаббус” доирасида китобхонлик, ахборот технологиялари, спорт, маданият билан қай даражада шуғулланаётгани меҳмонлар эътиборига ҳавола қилинди.

Шундан сўнг меҳмонлар “Яшил макон” умуммиллий лойиҳаси доирасида мактаб ҳудудида янгидан барпо қилинаётган яшил ҳудудга мевали ва манзарали дарахт кўчатларини экдилар.

Сўнгра тадбир иштирокчилари синфхоналарга, мактаб кутубхонаси ва мусиқа хонасига кириб, мактабда таълим-тарбия жараёнининг қай даражада ташкил қилингани ва ўқувчиларнинг “Беш ташаббус” доирасидаги тадбирларга қанчалик қамраб олингани билан яқиндан танишдилар. Ўқувчилар иштирокида ўтказилаётган интеллектуал ўйинлар, техник ижодиётга қизиқувчи ёшлар томонидан ишланган турли макетлар ва ишланмалар меҳмонларда катта таассуротлар қолдирди.

Туман ҳокими Султонбой Йўлдашев мактабларда маънавий муҳитни тубдан яхшилаш учун энг аввало, ўқувчиларда ёшлигидан ўзининг маҳалласи ва қишлоғи ҳаётига бефарқ бўлмаслиги, ўқиб ўрганиб билим олишлари бўш вақтини мазмунли ўтаказишлари лозимлигини таъкидлаб ўтди.

Шунингдек, Халқ таълими вазирлиги масъуллари томонидан маънавият тадбирларини мунтазам ўтказиш лозимлиги ва бунда маънавий-маърифий ишлар бўйича директор ўринбосари ва ижодий масалалар бўйича тарғиботчилар бирдек масъул эканлиги алоҳида таъкидланди.

Маҳаллалардаги ёшлар етакчилари, Маънавият ва маърифат масалалари бўйича директор ўринбосарлари, ижодий масалалар бўйича тарғиботчилар шунингдек, мактаб психологлари ўртасидаги фаол ҳамкорлик бу борадаги ишлар самарадорлигини янада ошириши алоҳида қайд қилинди. Қолаверса, мактаб маъмуриятига илм ва санъат вакиллари, зиёли ва нуронийлар, илғор тадбиркорлар билан доимий учрашувларни ташкил қилиш бўйича тавсиялар бериб ўтилди.

Шундан сўнг тадбир “Беш ташаббус” доирасидаги чиқишларга уланиб кетди. Тадбир давомида иқтидорли ўқувчилар томонидан ижро қилинган куй-қўшиқлар янгради. Туман ҳокими Султонбой Йўлдошев ва меҳмонлар ўқувчилар билан самимий суҳбатлашиб, уларни илм-фан сирларини пухта эгаллаб, замонавий касб-ҳунар эгаси бўлишга ҳамда Ватанимизга хизмат қилишга чорлашди.

Шунингдек, китобхонлик мушоираси, киберспорт, тикиш-бичиш, рассомчилик йўналишларида турли мусобақалар ташкил этилиб, унда ўқувчилар фаол қатнашдилар.

Шу ўринда айтиш керакки, “Беш ташаббус” доирасида ўтказилаётган тадбирлардан кўзланган мақсад − ёшларга эътиборни кучайтириш, уларни маданият, санъат, жисмоний тарбия ва спортга кенг жалб этиш, уларда ахборот технологияларидан фойдаланиш кўникмаларини шакллантириш, ёшлар ўртасида китобхонликни тарғиб қилишдан иборатдир.

Тадбир якунида мусобақаларда фаол қатнашиб ўз иқтидорини намоён қилган барча ўқувчилар тақдирланди. Шунингдек, мактабда ташкил этилган “Баркамол авлод” тўгараги аъзоларига тикувчилик касбини пухта ўрганишлари учун 2 та тикув машинаси, мусиқага ошно бўлган болажонларнинг санъат сирларини пухта эгаллашлари учун доира ва рубоб совға қилинди.

Айниқса, ушбу тадбирларнинг эндигина униб-ўсиб келаётган ёш авлод ҳаётида жорий қилиш улардаги ижодкорлик қобилиятларини эрта аниқлаш ва шакллантиришга хизмат қилади.

Туман ҳокимлигининг Ахборот хизмати