Туманимизда чигит экиш ишлари бошлаб юборилди

Айни кунларда юртимиз бободеҳқонлари қуёш нурларининг тафти замин узра таралаётган илиқ кунларда, ернинг тобида етилганидан фойдаланиб, даладаги ишларини ҳамжиҳатликда, тезкорлик билан олиб боришмоқда.

Ердан мўл ва сифатли ҳосил етиштиришда агротехник тадбирларни ўз вақтида, маромига етказиб бажариш, мавжуд ресурслар, минерал ва маҳаллий ўғитлар ҳамда сувдан унумли фойдаланиш муҳим аҳамият касб этади.

Айниқса, апрель ойи пахтакорларимиз учун чигит экиш ва тўлиқ кўчат олишдек масъулиятли тадбирлари билан ғанимат давр саналади. Шу мақсадда айни кунларда барча фермер хўжаликлари баҳорнинг илиқ кунларидан унумли фойдаланган ҳолда экиш ишларига киришмоқдалар.

Бу борада олдинда турган муҳим вазифалар ва жорий қишлоқ хўжалиги йилининг ўзига хос жиҳатлари ҳақида деҳқон ва фермерларга тушунчалар бериш мақсадида 1 апрель куни Амударё туманида кўргазмали семинар ташкил қилинди.

Семинарда Қорақалпоғистон Республикаси Вазирлар Кенгаши Раиси Қаҳрамон Сариев, Ўзбекистон Республикаси Қишлоқ хўжалиги раисининг 1-ўринбосари Шуҳрат Тешаев, Қорақалпоғистон Республикаси Вазилар Кенгаши Раисининг ўринбосари Дарябай Қайпов ҳамда Қорақалпоғистон Республикаси прокурори Фарҳод Алламберганов, шунингдек, соҳага алоқадор вазирлик ва муассасалар масъуллари иштирок этди.

Меҳмонлар туман ҳокими Султонбой Йўлдашев, сектор раҳбарлари ҳамда қишлоқ хўжалиги масъуллари ҳамроҳлигида туманимизнинг Тош ёп овули ҳудудида жойлашган “Бекман Аллаберганов” фермер хўжалигида бўлиб, чигит экиш бўйича кўргазмали семинарда қатнашишди.

Семинар аввалида Қорақалпоғистон Республикаси Вазирлар Кенгаши Раиси Қаҳрамон Сариев чигит экиш ишларини қисқа муддатларда ва уюшқоқлик билан якунлаш, чигитни мақбул муддатларда, тез ва сифатли экиб, текис ниҳол олишга эришиш – мўл ҳосил етиштиришнинг гарови эканини таъкидлаб ўтди.

Дарҳақиқат, чигит белгиланган муддатларда экилса, эртаги, бир текис ва соғлом кўчат олинади. Бунга уруғ юмшоқ, нам ва ҳарорати етарли бўлган тупроққа қадалган пайтдагина эришилади.

Шунингдек, семинар давомида Ўзбекистон Республикаси Қишлоқ хўжалиги вазирининг 1-ўринбосари Шуҳрат Тешаев томонидан қишлоқ хўжалиги мутахассисларига чигит экишда эътибор қаратиш лозим бўлган муҳим жиҳатлар ҳақида батафсил маълумотлар берилди. Мутахассислар чигит экиш ишларини қисқа муддатларда ва сифатли якунлаш, экин мосламаларини ростлаш, ерни экишга тайёрлаш каби муҳим масалалар бўйича зарур тавсиялар бердилар.

Маълумот учун айтиб ўтиш керакки, туманда 2022 йил пахта ҳосили учун 352 та фермер хўжаликларининг 13 минг 900 гектар майдонига чигит экилади. Уруғлик чигитлари фермер хўжаликларга 16 та чигит тарқатиш шахобчалари томонидан етказиб берилади. Туман бўйича чигит экиш учун 37 млрд 421 млн. сўмлик моддий ресурслар зарур бўлиб, бу харажатлар тўлиқ молиялаштирилган.

Семинарнинг назарий қисми якунлангач, меҳмонлар ва нуроний отахонлар иштирокида “Бекман Аллаберганов” фермер хўжалигининг даласига чигит сочилди. Далада чигит экиш амалиёти намойиш қилиниб, бу борада муҳим тавсиялар берилди.

Ушбу фермер хўжалигининг умумий ер майдони 139,4 гектар бўлиб шундан 61 гектарига чигитнинг “Султон” нави экилади. Жорий йилнинг кузида ушбу фермер хўжалиги раҳбарияти 214 тонна пахта ҳом-ашёсини етиштиришни мақсад қилган.

Семинар давомида сўзга чиққанлар ғўза навлари олимлар белгилаб берган агротехник талаблар даражасида экилиб, парваришланса ҳамда маъданли ва маҳаллий ўғитлар билан ўз вақтида озиқлантириб борилса, албатта кутилган натижаларга эришилишини таъкидлади.

Айтиш жоизки, пахтадан юксак хирмон бунёд этиш орқали мамлакатимиз иқтисодиёти ривожланиши билан бирга, фермер хўжаликларининг иқтисодий аҳволи яхшиланишига ва ишчиларнинг моддий манфаатдорлиги ошишига замин яратилади.

Туман ҳокимлигнинг Ахборот хизмати