ЎзЛиДеП туман Кенгаши аппарати раҳбари тадбиркорлар фаолияти билан танишди

Тадбиркорлар ва ишбилармонлар ҳаракати – Ўзбекистон Либерал демократик партияси Амударё тумани Кенгаши томонидан партия электоратини қўллаб-қувватлаш, партиянинг мақсад ва вазифаларини кенг жамоатчиликка етказиш, айни кундаги олиб бораётган фаолияти ҳақида хабардор қилиш мақсадида бир қанча ишлар амалга оширилмоқда.

Жорий йилнинг 2 февралида партия туман Кенгаши аппарат раҳбари Мадамин Казаков Қиличбой овулида бўлди ва овул фуқаролар йиғини раиси Баҳром Қодиров билан ҳудуддаги тадбиркорлик субъектлари билан учрашди, тадбиркорлар учун яратилаётган имкониятлар ҳақида маълумот бериб, уларнинг муаммо ва таклифларини тинглади.

Дастлаб масъуллар тадбиркор Жўшқин Жумамуродовнинг ишлари билан танишдилар. У шифер, тунукафон маҳсулотлари ишлаб чиқариш билан бирга маиший техникалар билан савдо қилувчи дўкон фаолиятини ҳам йўлга қўйган, яъни ўзлари ишлаб чиқарган маҳсулотларни ўз дўконларида сотадилар. Бу билан тадбиркор 8 нафар ҳамқишлоғини иш билан таъминлади.

Ҳудуддаги яна бир тадбиркор Дилбар Бегмуродова нон ва нон маҳсулотлари ишлаб чиқариш билан  шуғулланади. Овулдаги барча ошхоналар, мактабгача таълим ташкилотлари, аҳолини иссиқ ва хуштаъм нон, буханка, патир каби нонлар ва нон маҳсулотлари билан таъминлаётган тадбиркорнинг ҳам, у жалб этган ёрдамчиларнинг ҳам қўли-қўлига тегмайди. Буюртмалар ҳам шунга яраша бўлаяпти.

Нонвойхона фаолияти билан танишган масъуллар тадбиркорга фаолиятини кенгайтириши мумкинлиги, бунинг учун имтиёзли кредитлар мавжудлиги, тадбиркорлик қилиб халқимизнинг корига яраб келаётганлар учун яратилаётган имкониятлар ҳақида тушунтирдилар, партиянинг туман Кенгаши уларни доимо қўллаб-қувватлашини билдирдилар.

Ҳудуддаги яна бир тадбиркор Қўчқорбой Норимов ўз томорқасида иссиқхона ташкил этиб, қишда ҳам ёз неъматларини етиштираяпти. Ўзбекистон Либерал демократик партияси туман Кенгаши аппарат раҳбари Мадамин Казаков, овул фуқаролар йиғини раиси Баҳром Қодировлар иссиқхонада айни кунда барра пиёз етиштирилиб, бозорларимизга  чиқарилаётгани, бу билан томорқачи эл дастурхони тўкинлигига муносиб ҳисса қўшаётганини таъкидлашди.

Етиштирилган ҳосил сотиб бўлингач, ўрнига ҳозирда уй шароитида экиб қўйилган эртаги сабзавотлар кўчириб ўтқазилади ва парвариш қилинади. Иссиқхона фаолияти билан танишган одам агар хоҳиш бўлса, меҳнат қилинса, иссиқхона улкан даромад манба эканлигини англайди. Чунки иссиқхонада етиштириладиган бодринг, помидор, булғор қалампири каби эртаги экинлар кўчатларига доимо харидор топилади. Бу билан тадбиркор ўз оиласи фаровонлигини таъминлабгина қолмай, бозорларимиз тўкинлигига ҳам муносиб ҳисса қўшади.

Тадбиркор – юртимизга мададкор, деган ибора бежиз айтилмаган. Ўз меҳнатлари билан ўзларининг турмушини обод этиб, юртимиз тараққиётига ҳам муносиб ҳисса қўшаётган ишбилармонлар туманимизда кўп. Уларга муносиб шароитлар яратиш, қўллаб-қувватлаш, янада улкан марраларга рағбатлантиришда тадбиркорлар ва ишбилармонлар ҳаракати Ўзбекистон Либерал демократик партияси туман Кенгаши доимо бош-қош бўлмоқда.

Ойгул Ражабова