6 минг гектардан ортиқ майдонда кузги буғдой сифатли парвариш қилинмоқда

Амударё туманида 2022 йил ҳосили учун 344 та  фермер  хўжаликлари ва қишлоқ хўжалиги корхоналари томонидан 6000 гектар майдонга кузги буғдой экиш режалаштирилган  бўлиб, айни пайтда 1-сектор ҳудудидаги хўжаликларда 1610 га, 2-сектор ҳудудида 1720 га, 3-сектор бўйича 1963 га, 4-сектор ҳудудидаги хўжаликларда эса 707 га майдонга кузги буғдой сифатли қилиб экилди.

Ғалла экиш ишларини уюшқоқлик билан ўтказиш мақсадида  18 та отряд ташкил қилиниб, отрядлар раҳбарлигига ҳудудий агрономлар бириктирилди ва ҳар бир ҳудуднинг ер, сув билан таъминланганлик шароити ҳисобга олинган ҳолда навлар танланиб, экилди.

Хусусан, туманнинг иқлим шароити ва ерларнинг мелиоратив ҳолатидан келиб чиқиб, 2022 йил  ҳосили  учун сифат  кўрсаткичлари  юқори  бўлган навлар танланди.

Экиш мавсумида талаб этиладиган уруғлик миқдори олдиндан ҳисоб-китоб қилинди ва жорий йилда гектарига ўртача 250 кг.дан  жами 1500 тонна уруғлик тахт қилиб қўйилгани кузги буғдойни ўз вақтида, сифатли экиш имконини берди.

Айни пайтда туманда  2 та  ғаллачилик  кластери  фаолият  юритиб келмоқда. Хусусан, “Qipchoq g`alla klaster” масъулияти чекланган жамияти тасарруфидаги 312 та  фермер  хўжаликларида 4969 гектар майдонда, “Amu Rich Xarvest” масъулияти чекланган жамияти тасарруфидаги 32 та фермер  хўжаликларида 1031 гектар ердаги кузги буғдойзорларни озиқлантириш ишлари олиб борилмоқда.

Ғаллачилик кластерлари тасарруфидаги фермер хўжаликлари томонидан буғдойзорларда кузги-қишки муҳим агротехник тадбирларни амалга ошириш, яъни, суғориш учун ҳар беш гектарга биттадан ҳандақлар тайёрлаш, далалар бошига ҳар гектарга 3 тоннадан, 18000 тонна маҳаллий ўғит жамғариш, аҳоли ихтиёридаги қорамоллар тушиши  хавфи бўлган буғдойзорларнинг 16,7 км. қисмини иҳоталаш ишлари сифатли  амалга оширилмоқда. Бугунги кунда туманимиз ғаллачилик хўжаликларида буғдойзорларни кузги қишки сув билан суғориш тўлиқ амалга оширилиб, бу борадаги режа 106 фоизга  бажарилди.

Тўлқин овулидаги Азамат Маткаримов раҳбарлик қилаётган “Аму соҳили” фермер хўжалигида ҳам 2022 йил ҳосили учун ғалла экиш ўз вақтида амалга оширилди. Хўжалик далаларида униб чиққан кузги буғдой ниҳолларини азотли  минерал ўғитлар ва биостимуляторлар орқали баргидан озиқлантиришга алоҳида эътибор қаратилди. Натижада айнан шу усулда озиқлантирилган буғдойзорлар тўлиқ туплаш палласига кирган ва бир текис ривожланмоқда.

Тажрибали ва омилкор деҳқон Азамат Маткаримов ғалла экиш жараёнида ерни тобида ҳайдаш, лазерли қурилма орқали текислаш, шунингдек, ҳар гектар ҳисобига камида 400 кг.дан фосфорли ўғит билан ишлов беришга алоҳида эътибор қаратиб, хўжалик ерларининг мелиоратив ҳолатини ҳисобга олган ҳолда шўрланишга ва қурғоқчиликка чидамли “Алексеевич” навини танлади.

Уруғлик сарфига  ҳам алоҳида эътибор қаратди ва ҳар гектар ҳисобига 170-180 кг.дан сеялка ёрдамида ғалла экди. Пухта режа асосида  бажарилган ишлар ўз натижасини берди. Айни кунларда “Амударё соҳили” фермер хўжалигининг буғдойзорлари кўзларни қувонтиргудай даражада ривожланмоқда.

Хўжалик ишчилари дала бошида жамғариб қўйилган маҳаллий ўғит билан ғаллазорларни озиқлантириш, шунингдек, ҳар  беш гектар экин майдони учун биттадан хандақ қазиш ишларини якунига етказиб, буғдойзорларни яна бир марта қишги сув билан қондириб суғоришга тахт қилиб қўйишди.

Робия ЙЎЛДОШЕВА.