Туманимизнинг бир гуруҳ нуронийларининг Бухоро, Самарқанд шаҳарларига саёҳати ташкил этилди

Ўзбекистон Республикаси Вазирлар Маҳкамасининг “Кексаларни давлат томонидан қўллаб-қувватлаш тизимини янада такомиллаштиришнинг қўшимча чора-тадбирлари тўғрисида” 2020 йил 28 майда қабул қилган қарорига асосан, юртимизда ҳар йили 1 ноябрдан 30 ноябргача “Кексалар учун туризм ойлиги” ўтказилади.

Айни кунларда бутун мамлакатимизда бўлгани каби туманимизда ҳам ойлик доирасида кексалар ва ногиронларни қўллаб-қувватлаш, уларнинг вақтини мазмунли ташкил этиш мақсадида турли ижтимоий лойиҳалар амалга оширилмоқда, юртимизнинг диққатга сазовор жойларига саёҳатлар уюштирилмоқда.

Ўтказилаётган турли саёҳат, маданий-маърифий тадбирлар, учрашувлар, “Ҳар куни 5 минг қадам” шиори остида пиёда юриш машқларига кексалар, нуронийлар жуда фаоллик билан иштирок этмоқдалар ва бундан завқ олмоқдалар.

Шу йилнинг 12-14 ноябрь кунлари турли соҳаларда ишлаб, туманимиз тараққиётига муносиб ҳисса қўшган, ўзларининг ҳаёт йўли билан ёшларга ўрнак бўлаётган бир гуруҳ кексаларнинг туман Маҳалла ва оилани қўллаб-қувватлаш бўлими томонидан республикамизнинг кўҳна Бухоро ва Самарқанд шаҳарларига саёҳати ташкил этилди.

Кекса авлод вакиллари учун ташкил этилган ушбу саёҳатга бориш истагидаги кўнгиллилар рўйхати октябрь ойидаёқ шакллантирилган эди. 51 нафар фахрий  педагоглар, тиббиёт ходимлари, турли соҳаларда меҳнат қилган, ҳозирда кексалик завқини суриб яшаётган отахонлар, онахонлар саёҳатига туман Маҳалла ва оилани қўллаб-қувватлаш бўлими бошлиғининг ўринбосари Баҳодир Болтабоевлар ҳамроҳлик қилди.

Саёҳат Бухоро шаҳридаги қадимий тарихий мажмуалар, аждодларимиз томонидан қолдирилган бой тарихий ёдгорликлар, жумладан, Бухоронинг кўҳналигидан дарак бергувчи меъморий ёдгорликлари – Мағоки Аттор, Исмоил Сомоний, Чорбакр, Минораи Калон, Арк қалъаси, Лабиҳовуз, Чорминор, Баҳоуддин Нақшбанд мақбараси ва бошқа қатор обидалар билан танишишдан бошланди.

Кўҳна Бухоронинг кечки манзараларини томоша қилиш барчага завқ бағишлади.

Эртасига, яъни 13 ноябрь куни Самарқанд шаҳрига борилди. У ерда Регистон майдони билан, шунингдек, Самарқанд шаҳрининг қадимий маданий мерос объектлари билан бирма-бир танишиб чиқилди.

Шу куннинг ўзида гит бошчилигида саёҳатчилар 1417-1420 йилларда бунёд этилган Улуғбек мадрасаси, Улуғбек хонақоси ва бошқада тарихий обидалар билан  танишдилар.

Қадимий Самарқанд шаҳрининг расмий маркази Регистон майдони бўлган, бу ерда учта мадраса қад кўтарган. Улуғбек, Шердор ва Тиллакори мадрасалари. Регистон - қадимий илм, таълим муассасалари жойлашган макон бўлиб, шарқдаги шаҳар қурилиши санъатининг энг кўзга кўринарли намуналаридан бири ҳисобланади. 2001 йилда бу уч мадраса UNESCOнинг бутун дунё ёдгорликлари рўйхатига киритилган. Ушбу мадрасаларни томоша қилгандан кейин, Ўзбекистон Республикаси биринчи Президенти Ислом Каримов шарафига ўрнатилган ҳайкал пойига ҳурмат рамзи сифатида гул қўйилди.

Шунингдек, 1399-1404 йилларда бунёд етилган  Бибихоним мақбарасига ташриф буюрилди. Кейин, режа асосида Хазрати хизр мақбараси ва Шоҳи Зинда мажмуасига зиёрат қилинди.

Саёҳатчилар Амир Темур ва Мирзо Улуғбек бобокалонларимиз ҳамда Дониёр боболарнинг ўтмишда амалга оширган ишлари ва авлодлар учун қолдириб кетган бой тарихий мерослари хусусида батафсил ҳикоялар тингладилар.

Саёҳат иштирокчилари ўзларига қаратилаётган эътибордан жуда мамнун бўлиб, ташкилотчиларга миннатдорчилик билдирдилар.

Ойгул РАЖАБОВА.