ЎЗБЕКИСТОН ХАЛҚ ДЕМОКРАТИК ПАРТИЯСИДАН ПРЕЗИДЕНТЛИККА НОМЗОДИ КЎРСАТИЛГАН МАҚСУДА ВОРИСОВАНИНГ ИШОНЧЛИ ВАКИЛИ САЙЛОВЧИЛАР БИЛАН УЧРАШДИ
Мамлакатимизда муҳим сиёсий жараён – Ўзбекистон Республикаси Президенти сайлови ўтказиладиган сана тобора яқинлашмоқда. Барча партиялар сингари Ўзбекистон Халқ демократик партияси ҳам номзоднинг сайловолди тарғибот-ташвиқот тадбирларини ташкил этишга алоҳида эътибор қаратмоқда. Шундай тадбирлар Амударё туманида ҳам ўтказилди.
13 октябрь куни Президентликка номзод Мақсуда Ворисованинг Қорақалпоғистон Республикаси бўйича ишончли вакили Халилло Ешимбетов сайловчилар билан учрашди.
Туман маданият бўлимида бўлиб ўтган йиғилишда Ўзбекистон Халқ демократик партияси Қорақалпоғистон ва туман Кенгашлари масъуллари, маҳаллий кенгаш депутатлари, партия фаоллари, сайлов ёшидаги фуқаролар иштирок этдилар. Йиғилишни партиянинг туман Кенгаши раиси Мақсуд Саъдуллаев очди ва олиб борди.
Мақсуд Саъдуллаев мазкур учрашув Президентликка номзод – Ўзбекистон Халқ демократик партияси Марказий Кенгаши раиси ўринбосари, Ўзбекистон Республикаси Олий Мажлиси Қонунчилик палатаси депутати Мақсуда Ворисованинг фаолияти, унинг Сайловолди дастури билан таништириш ҳамда сайловчилар билан очиқ, эркин мулоқот қилиш мақсадида ташкил этилганини таъкидлаб ўтди. Шундан сўнг, номзоднинг ишончли вакили партиянинг Қорақалпоғистон Республикаси Кенгаши раиси Халлило Ешимбетов сўзга таклиф этилди.
Ишончли вакил, партиянинг Қорақалпоғистон Республикаси Кенгаши раиси Халилло Ешимбетов учрашув иштирокчиларига илк марта Сайлов кодекси асосида ўтказилаётган Ўзбекистон Президенти сайловининг мамлакат ва халқ тақдиридаги аҳамияти, партиянинг сайловга тайёргарлик жараёни хусусида маълумот берди. Маърузада асосий эътибор номзоднинг сайловолди дастурига қаратилиб, ундаги устувор йўналишлар бўйича сайловчиларга батафсил тушунтириш берилди.
Мақсуда Ворисова халқ ҳақида ғамхўрлик қилувчи, одамларнинг дард ва ташвишларини юракдан ҳис қиладиган партия арбоби сифатида танилганлиги, номзоднинг 9 та устувор йўналиш ва 115 банддан иборат Сайловолди дастурида белгиланган вазифалар, келтирилган ташаббусларни халқни қийнаб турган муаммоларнинг ечими сифатида кўриш мумкинлиги алоҳида эътироф этилди. Аҳоли манфаатларини таъминлашга қаратилган, кучли ижтимоий сиёсат юритиш асосий йўналиш қилиб олинган ушбу дастурдаги барча мақсад ва ғоялар халқ, жамият равнақига хизмат қилиши таъкидланди.
Ишончли вакил дастурда кам таъминланган, лекин, боқимандалик кайфиятида юрган фуқароларни жамиятнинг фаол иштирокчисига айлантириш, ёлғиз кексалар, ота-она қарамоғисиз қолган болалар ҳамда ўзгалар парваришига муҳтож ногиронлиги бўлган шахсларнинг ҳаётий эҳтиёжларига эътиборни кучайтириш таклиф этилганини, “Мурувват”, “Саховат” ва “Меҳрибонлик” уйлари фаолиятини янада яхшилаш, “Меҳрибонлик” уйларини битириб чиққан ёшларни уй-жой билан таъминлаш, ишга жойлаштиришнинг самарали механизмларини жорий этиш бўйича аниқ вазифалари илгари сурилганини қайд этиб ўтди.
Тадбирда сўзга чиққан Ёшлар агентлиги мутахассиси Умида Янгибоева, Ногиронлар жамияти туман бўлими раҳбари Нилуфар Холбоева, туман Кенгаши депутати Гулшод Юсупова, 31-сонли мактаб ўқитувчиси Нодира Йўлдошевалар номзоднинг Сайловолди дастурида мамлакатни ҳар томонлама тараққий эттириш, олиб борилаётган барча йўналишдаги ислоҳотларнинг ижтимоий самарадорлигини ошириш, аҳоли турмуш даражасини юксалтириш, демократик ўзгаришларни чуқурлаштириш ва фуқаролик жамиятини ривожлантиришга қаратилган энг муҳим масалалар қамраб олинганлигини эътироф этишди.
Сўзга чиққанлар Мақсуда Ворисованинг сайловолди дастурида илгари сурилган йўналишлар ва ташаббусларни қўллаб-қувватлаб, барчани бўлажак сайловда фаол иштирок этишга, Ўзбекистон халқ демократик партияси номзодига овоз беришга чақирдилар.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
