ШИФОКОРЛАР КЕКСАЛАР ҲАФТАЛИГИ ДОИРАСИДА ҚАРИЯЛАРНИ ТИББИЙ КЎРИКДАН ЎТКАЗИШДИ

“Кексаларни эъзозлаш, уларга ҳурмат-эҳтиром кўрсатиш – халқимизга хос эзгу фазилат” деган ғоя остида ўтказилаётган “Кексалар ҳафталиги” доирасида туман Тиббиёт бирлашмаси томонидан саломатлик тадбирлари ташкил этилмоқда. Ҳафталик доирасидаги тадбирларни юқори савияда ташкил этиш мақсадида тузилган ишчи гуруҳ  томонидан ҳудудларда кенг аҳоли қатламига қарияларни қадрлаш, эъзозлаш, уларнинг соғлигига эътиборли бўлиш, саломатликни сақлаш имкониятлари ҳақида маълумотлар берилмоқда.

4-5 октябрь кунлари Оқ олтин овули ҳудудидаги 3-сонли, Дўрман овулидаги 2-сонли оилавий поликлиникаларда Тиббиёт бирлашмаси тор мутахассислари, яъни кардиолог, лор, окулист, жарроҳ шифокорлар ва ҳамширалар билан биргаликда кексалар учун чуқурлаштирилган тиббий кўрик ташкил этилди. Хонадонларига борилиб, кексаларнинг ҳол аҳволидан, соғлиғидан хабар олинди. Ҳар бири алоҳида тиббий кўрикдан ўтказилиб, бепул дорилар тарқатилди.

Чордара, Олмазор маҳаллаларида ҳам катта ёшлилар, қариялар ҳолидан хабар олинди ва валеолог-шифокорлар Т.Саидова, М.Эрназаров, умумий амалиёт шифокори Т.Нурмагамбетовалар соғлом овқатланиш, жисмоний фаоллик ҳақидаги мавзуларда суҳбатлар ўтказишди.

Тиббий кўрикдан ўтказилган қарияларга саломатликларига доим эътиборли, жисмонан фаол бўлиш, тўғри овқатланиш тартибига риоя қилиш кераклиги тушунтирилиб, муҳим тиббий маслаҳат ва тавсиялар берилди.

Жумабой Явкашев, ТТБ валеолог шифокори.