САЙЁР СУД МАЖЛИСИДА ЛИЦЕНЗИЯСИЗ АВТОТРАНСПОРТ ХИЗМАТИ КЎРСАТИШ БЎЙИЧА ҲУҚУҚБУЗАРЛАР ЖАЗОЛАНДИ

Ўзбекистон Республикаси Маъмурий жавобгарлик тўғрисидаги Кодексининг 176-моддаси, 3 бандига мувофиқ аҳолига лицензиясиз автотранспорт хизматини кўрсатганлиги учун бундай хизмат тури билан шуғулланган фуқароларга базавий ҳисоблаш миқдорининг 20 бараваридан 100 бараваригача, агар бу ҳуқуқбузарлик ҳолати мансабдор шахслар томонидан содир этилса, базавий ҳисоблаш миқдорининг 50 бараваридан 150 бараваригача жарима жазоси қўлланилиши белгиланган.

Юқорида кўрсатиб ўтилган Ўзбекистон Республикаси Маъмурий жавобгарлик тўғрисидаги Кодексда белгиланган маъмурий ҳуқуқбузарлик бўйича жазо чоралари қўлланилганидан сўнг, бир йил давомида қайта ҳуқуқбузарлик содир этилганда фуқароларга базавий ҳисоблаш миқдорининг 10 бараваридан 20 бараваригача, мансабдор шахсларга нисбатан эса базавий ҳисоблаш миқдорининг 20 бараваридан 30 бараваригача жарима жазоси тайинланади.

Шундай бўлса-да, баъзи автомотранспорт воситаларини бошқарувчи шахслар томонидан бу борадаги мавжуд қонун-қоидаларга, Низом талабларига риоя қилмасдан, махсус лицензияга эга бўлмай туриб, халққа хизмат кўрсатиш ҳолатлари учрамоқда. Махсус лицензияга эга бўлмай туриб аҳолига автотранспорт хизмати кўрсатиш қоидалари бузилишининг олдини олиш мақсадида Қорақалпоғистон Республикаси Транспорт вазирлигининг автомобилларда йўловчи  ташиш хавфсизлигини таъминлашни назорат қилиш бўйича бўлими томонидан мунтазам равишда рейдлар ўтказилиб, бу борадаги камчиликлар вақтида аниқланмоқда ва зарур чоралар кўрилмоқда.

Хусусан, жорий йилнинг август ойи бошидан шу кунга қадар Республика ҳудудларида 141 та рейд тадбирлари ўтказилди. Ушбу рейд тадбирлари жараёнида мавжуд қонун-қоидаларга амал қилмаслик ҳолатлари аниқланиб, ҳуқуқбузар фуқароларга нисбатан баённомалар расмийлаштирилиб, жарима жазолари қўлланилди. Бир неча автотранспорт воситалари эса вақтинчалик жарима майдончаларига қўйилди.

Жорий йилнинг 10 август санасида Амударё туман Давлат Солиқ инспекцияси маъмурий биносида Жиноят ишлари бўйича Амударё туман суди раиси вазифасини вақтинча бажарувчи Арман Кошанов раислигида бўлиб ўтган сайёр суд мажлисида Ўзбекистон Республикаси Маъмурий жавобгарлик тўғрисидаги Кодексда белгиланган қонун талабларига риоя қилмасдан, махсус лицензияга эга бўлмай туриб, аҳолига автотранспорт хизмати кўрсатган шахсларга қонунда белгиланган талаблар асосида жарима жазоларини тайинлаш бўйича тўпланган маъмурий ишлар кўриб чиқилди.

Унга кўра, махсус лицензиясиз, зарур ҳужжатларни расмийлаштирмасдан аҳолига автотранспорт хизмати кўрсатиб, ўз хатти-ҳаракатлари билан мавжуд қонун талабларини бузган 17 нафар шахс қаршисига тўпланган ишлар бирма-бир муҳокама этилиб, уларга нисбатан қонунда белгиланган тегишли жазо чоралари қўлланилди.

Сайёр суд мажлисида мамлакатимизда қонун устуворлигини таъминлашда нафақат ҳуқуқни муҳофаза қилиш органлари, балки фуқаролар ҳам масъул эканлиги таъкидланиб, фуқаролар орасида ҳуқуқбузарликлар содир бўлишининг олдини олишда уларнинг ҳуқуқий саводхонлигини ошириш муҳим аҳамиятга эга эканлиги таъкидланди.

Робия ЙЎЛДОШЕВА.