Амударёда эмлаш режасига киритилган аҳолининг 21,4 фоизи эмланди

Аҳолининг жорий этилган карантин қоидаларига риоя этмасликлари, ўрнатилган тартиб-интизомга беписандлик билан қараши натижасида COVID-19 касаллигига чалиниш ҳолатлари кундан-кунга купаймоқда. Қасаллик билан зарарланганларнинг аксарияти беморлар билан мулоқотда бўлиб, юқтириб олганликлари аниқланмоқда.

Мамлакатимиз бўйлаб коронавирус инфекцияси билан касалланганлар сони тобора ортаётганлиги туфайли касалликка қарши вакцина билан эмлаш ишлари янада кучайтирилмоқда. Аҳолини оммавий эмлаш коронавирус тарқалиши кучайишининг олдини олиши, аҳоли саломатлигини тиклашда асосий восита эканлигини инсонларга тушунтириш-тарғибот ишлари олиб борилмоқда. Амударё туманида ҳам  COVID-19га қарши аҳолини оммавий вакцинация қилиш борасида самарали ишлар қилинмоқда.

Хусусан, туман Санитария-эпидемиологик осойишталик ва жамоат саломатлиги бўлими ва туман Тиббиёт бирлашмаси томонидан Ўзбекистан Республикаси Соғлиқни сақлаш вазирлигининг “Коронавирус инфекциясига қарши оммавий эмлашни ўтказиш тўғрисида"ги буйругига асосан COVID-19 касаллигига қарши эмлашни ташкил қилиш ва эмлаш жараёнларини назоратга олиш штаби тузилди. Туманимизда оммавий эмлаш жараёнларини ўтказишга даволаш профилактика муассасаларда жами 23 та эмлаш бригадалари, шундан 10 таси стационар ва 13 таси мобиль бригадалар ташкил қилинди. Ташкил қилинган бригадаларга аҳолини COVID-19 касаллигига қарши сифатли ва хавфсиз эмлаш жараёнини амалга ошириш бўйича тажрибали мутахассислар бириктирилди.

Вакцинацияни оммавий тарзда амалга оширишни жадаллаштириш мақсадида ташкил этилган мобил бригадалар корхона-ташкилотлар ходимларини иш жойининг ўзида эмлаш жараёнларини ташкил этиб келишмоқда. Хусусан, туман ИИБ ходимларини эмлаш ишлари бўлимнинг ўзида олиб борилди. Туман ИИБда 90 нафарга яқин ходимлар фаолият юритаётган бўлиб, ходимларнинг барчаси вакцина билан эмлаш жараёнларида фаол иштирок этдилар. Ходимларни коронавирусга қарши эмлашдан олдин уларнинг қон босимлари ҳамда тана ҳароратлари мутахассис шифокорлар томонидан текширилди. Кўрсаткичлар меъёрий даражада эканлигига ишонч ҳосил қилингач, бўлим ходимлари COVID-19 га қарши эмланди.

Короновирус инфекциясига қарши эмлаш мақсадида Республикамизга олиб келинган Astra Zeneca, ZF-UZ-VAC 2001, Sputnik V вакциналари билан туманимиз аҳолисини касалликка қарши эмлаш ишлари олиб борилмоқда.

Қайд этиш керакки, туман аҳолисининг 18 ёшдан ошган, эмлаш режасига киритилганлар сони 118 минг 545 нафарни ташкил этади.  Шу кунга қадар улардан 25 минг 422 нафари, яъни 21,4 фоизида эмлаш ўтказилди.

Олимларнинг таъкидлашича, касаллик юқишининг эпидемик жараёни занжирини узиш учун ахолининг камида 70 фоизида иммунитет мавжуд бўлиши керак. Бунинг учун ахолини COVID-19 га қарши эмлаш ва иммунитетни ҳосил қилиш энг муҳим вазифа ҳисобланади. Эмлаш-пандемияни енгишдаги ягона чора эканлигини тўғри англаб етган, ўзи ва яқинлари саломатлигига бефарқ бўлмаган юртдошларимиз белгиланган тартибда короновирус инфекциясига қарши вакцинация жараёнларида фаол қатнашмоқдалар.

Шу ўринда юртдошларимиздан белгиланган тартиб-қоидаларга қатъий амал қилган ҳолда, никоб тақишларини, антисептик воситалардан фойдаланишларини, шахсий гигиенага риоя этиб, жамоат жойларида ижтимоий масофани сақлашларини ҳамда касалликка қарши вакцина билан эмланишларини сўраймиз.

Шуни унутмангки, ўз саломатлигингиз ва яқинларингиз саломатлиги учун, энг аввало, ўзингиз масъулсиз!

Т.Бабаниёзов, Амударё тумани Санитария-эпидемиологик осойишталик ва жамоат саломатлиги бўлими бўлимининг олий тоифали санитария врачи.