Сенат томонидан мақъулланган қонун ҳужжатлари мазмун-моҳиятига бағишланган йиғилиш бўлиб ўтди

Жорий йилнинг 13 июль санасида туман ҳокимлигининг мажлислар залида Ўзбекистон Республикаси Олий Мажлиси Сенати аъзоси Ботир Матмуратов иштирокида йиғилиш бўлиб ўтди. Йиғилишни туман ҳокими Султонбой Йўлдашев очди ҳамда олиб борди. Унда туман ҳокимлиги масъул ходимлари, секторлар раҳбарлари, Халқ депутатлари туман Кенгаши депутатлари, ҳоким ўринбосарлари, бўлимлар бошлиқлари, корхона-ташкилот раҳбарлари, маҳалла фуқаролар йиғини раислари ҳамда оммавий ахборот воситалари вакиллари иштирок этдилар.

Мазкур йиғилиш Ўзбекистон Республикаси Олий Мажлиси Сенатининг ўн олтинчи ялпи мажлисида маъқулланган қонунлар ва кўриб чиқилган бошқа масалалар юзасидан аҳоли ўртасида тарғибот ишларини амалга ошириш, юқори палатанинг тегишли қарорларида белгиланган топшириқлар ижросини ўрганиш, ушбу масалаларда халқ депутатлари маҳаллий Кенгашларига амалий ёрдам кўрсатиш ҳамда фуқаролар мурожаатлари билан жойида ишлаш мақсадида ўтказилди.

Йиғилиш кун тартибидаги Ўзбекистон Республикаси Президенти томонидан имзоланган “Виждон эркинлиги ва диний ташкилотлар тўғрисида”ги Қонуннинг мазмун-моҳияти бўйича туман Адлия бўлими бошлиғи Мўминжон Матюсупов маъруза қилди.

Таъкидланганидек, ушбу Қонун фуқароларнинг динга ёки шунга мос эътиқодга ўз муносабатини белгилаш ва ифодалаш ҳамда ҳеч қандай қаршиликсиз динга эътиқод қилиш ва диний расм-русумларни бажариш ҳуқуқларини таъминлайди. Шунингдек, мазкур ҳужжат ижтимоий адолат ва тенгликни, фуқароларнинг динга муносабатидан қатъи назар, уларнинг ҳуқуқ ва манфаатлари ҳимоя қилинишини кафолатлайди ҳамда диний ташкилотларнинг фаолияти билан боғлиқ муносабатларни тартибга солиб туради.

Сўнгра “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги Президент қарори мазмун-моҳияти ҳамда аҳамияти юзасидан туман прокурори Жавлон Муфтуллаев маъруза қилди.

Маърузада таъкидланганидек, мазкур қарор мамлакатимизда коррупцияга қарши курашиш ва коррупциявий ҳолатларнинг барвақт олдини олиш тизими самарадорлигини ошириш, ушбу жараёнга жамоатчиликни кенг жалб этиш ва коррупцияга нисбатан муросасиз муносабатда бўлиш муҳитини шакллантириш мақсадида қабул қилинган.

Қарор билан 2021 йил 1 сентябрдан бошлаб давлат ҳокимияти ва бошқаруви органлари, давлат унитар корхоналари ва муассасалари, давлат улуши 50 фоиздан юқори ташкилотларда ишга қабул қилишни очиқ танлов асосида амалга ошириш ҳамда танлов доирасида ўтказиладиган синов тадбирларини интернет тармоғи орқали реал вақт режимида кузатишни назарда тутувчи тартиб жорий этилиши белгиланди.

Йиғилиш кун тартибидаги масалалар юзасидан сенатор Ботир Матмуратов ўз фикр-мулоҳазаларини билдирди. Сенатор ўз сўзида Ўзбекистон Республикаси Президенти томонидан имзоланган “Виждон эркинлиги ва диний ташкилотлар тўғрисида”ги Қонун ва “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги қарорининг имзоланиши мамлакатимизда олиб борилаётган янги босқичдаги ислоҳотларнинг амалий ифодаси эканини қайд этди.

Шу билан бирга, мамлакатимизда давлат органлари ва ташкилотларининг фаолиятида очиқлик, ошкоралик ва шаффофликни таъминлаш ҳамда мансабдор шахсларнинг аҳоли олдидаги ҳисобдорлигини йўлга қўйиш орқали давлат бошқарувида самарали ва таъсирчан жамоатчилик назоратини амалга ошириш учун зарур шароитлар яратилганлиги таъкидланди.

Шу мақсадда коррупциявий хавфларни аниқлаш ва тизимли таҳлил қилиш, уларни келтириб чиқарувчи омилларни бартараф қилиш учун масъул бўлган алоҳида орган — Коррупцияга қарши курашиш агентлиги ташкил этилганлиги ҳамда давлат ҳокимияти органлари ва йирик хўжалик юритувчи субъектларда коррупцияга қарши ички назорат тузилмалари фаолияти йўлга қўйилаётганлиги коррупцияни бартараф қилишнинг муҳим омилларидан эканлигини айтди.

Йиғилиш иштирокчилари мазкур қонун ҳужжатлари юзасидан фикр-мулоҳазаларини билдирдилар, ўзларини қизиқтирган саволлар билан мурожаат қилдилар ҳамда тегишли жавоблар олдилар.

Чарос Арслонова, туман ҳокимлигининг Ахборот хизмати раҳбари.