ЛИЗИНГ МУНОСАБАТЛАРИ ҚОНУН ҲУЖЖАТЛАРИ АСОСИДА ТАРТИБГА СОЛИНАДИ

Бугун лизинг корхоналарнинг ишлаб чиқариш қувватини модернизация қилишга, хусусий тадбиркорликни кенгайтиришга ва унинг асосида рақобатбардош ишлаб чиқаришни ташкил қилишга инвестиция киритиш учун самарали механизм сифатида тобора ривожланиб бормоқда.

Ӯзбекистон Республикасида лизинг муносабатлари Фуқаролик кодекси ҳамда «Лизинг тӯғрисида»ги Қонун ва улар асосида қабул қилинган қонун ости ҳужжатлари билан тартибга солинган.

Фуқаролик кодексининг 587-моддасида лизинг шартномасига қуйидагича таъриф берилган: Лизинг шартномаси бўйича лизинг берувчи (ижарага берувчи) бир тараф лизинг олувчи (ижарага олувчи) иккинчи тарафнинг топшириғига биноан сотувчи учинчи тараф билан ундан лизинг олувчи учун мол-мулк сотиб олиш ҳақида келишиш мажбуриятини олади, лизинг олувчи эса бунинг учун лизинг берувчига лизинг тўловларини тўлаш мажбуриятини олади.

Истеъмол қилинмайдиган, тадбиркорлик фаолияти учун фойдаланиладиган ҳар қандай ашёлар лизинг объекти бӯлиши мумкин, ер участкалари ва бошқа табиат объектлари бундан мустасно. Эгалик қилиш ва фойдаланиш учун лизинг объектини оладиган шахс лизинг олувчи деб ҳисобланади. Лизинг берувчи лизинг объектини кимдан олаётган бӯлса, шу шахс сотувчи деб эътироф этилади.

Лизинг берувчи мол-мулкни бӯлажак фойдаланувчидан сотиб олган тақдирда ёхуд лизинг берувчи келгусида мол-мулкни сотувчига лизинг бӯйича топшириш учун ундан шу мол-мулкни сотиб олиш мақсадида уни маблағ билан таъминлаган тақдирда бир шахснинг ӯзи ҳам лизинг олувчи, ҳам сотувчи бӯлишига йул қӯйилади.

Лизинг уч тарафлама (сотувчи, лизинг берувчи, лизинг олувчи) ёки икки тарафлама (лизинг берувчи, лизинг олувчи) лизинг шартномаси бӯйича амалга оширилади. Лизинг берувчи ва сотувчи ӯртасида икки тарафлама лизинг шартномаси тузилаётганида қӯшимча равишда лизинг объектининг олди-сотди шартномаси тузилади. Лизинг шартномаси консенсуал шартномалар гуруҳига мансуб.

Шартнома ҳақ бараварига тузилади. Лизинг олувчи лизинг берувчига лизинг объектидан фойдаланганлиги учун лизинг тӯловларини тӯлайди.

Лизингнинг оддий ижарадан асосий фарқи шундаки, унда ижарага берилган асбоб-ускуналар шартнома муддати тугагандан сӯнг уларнинг қодиқ қиймати йиғиндисида сотиб олиш кӯзда тутилади.

Мамлакатимизда лизинг берувчилар ва лизинг олувчилар учун қулай бозор инфратузилмаси ва тегишли қонунчилик базаси яратилган. Амалга оширилган ишларнинг натижасида Ӯзбекситон ялпи ички маҳсулоти тузилмасида лизинг операциялари ҳажмининг йилдан-йилга ӯсишига эришилди. Бундан ташқари, лизинг бозорида иштирокчиларнинг, улар қаторида банкларнинг, лизинг компаниялари ва лизинг операциялари билан шуғулланадиган кредит уюшмаларининг сони доимий равишда ӯсиб бормоқда.

Лизинг берувчининг манфаатларини ҳимоя қилиш мақсадида «Лизинг тӯғрисида»ги Қонуннинг 20-моддасига кӯра лизинг шартномаси билан сарфланган маблағларини қайтариш кафолати сифатида лизинг берувчи лизинг олувчидан таъминотни тақдим этишни, шу жумладан, гаров, банк кафолати ёки учунчи шахснинг кафиллигини талаб қилиши мумкин.

Аммо «Лизинг тӯғрисида»ги Қонуннинг 21-моддасига мувофиқ лизинг берувчи лизинг объектини гаров сифатида лизинг олувчининг олдиндан розилигисиз ишлатишга ҳақли эмас. Ӯз навбатида лизинг олувчи лизинг объектини гаров сифатида ишлатишга  ҳақли эмас, бу эса қонунийдир.

Лизинг шартномаси бошқа айрим турдаги оддий шартномалардан фарқли равишда нисбатан юқори суммада тузилиши ва узоқ муддат амал қилиши билан ажралиб туради.

Табиийки, мазкур ҳолат ушбу шартноманинг турли сабабларга кӯра тугатиладиган ҳолатларнинг ҳам нисбатан кӯп ҳолатларда кузатилишига сабаб бӯлади.

Хусусан, «Лизинг тӯғрисида»ги Қонуннинг 15-моддасида лизинг олувчи банкрот бӯлган, унинг мол-мулки хатловга олинган ёки мусодара қилинган тақдирда, лизинг объекти лизинг олувчининг умумий мол-мулкидан ажратилади ва лизинг берувчига қайтарилиши лозим, у мол-мулкни ӯз хоҳишига кӯра тасарруф этиши мумкинлиги белгиланган.

Хулоса ўрнида шуни айтиб ўтиб жоизки, лизинг шартномаси бу шартнома иштирокчилари ӯртасидаги муносабатларни тартибга солишнинг бир тури ҳисобланиб, бу жисмоний ва юридик шахсларнинг ҳуқуқ эркинликларининг адолатли ҳимоя қилинишига қўшимча кафиллик яратади.

Б.Бекмурадов, Беруний туманлараро Иқтисодий суди судьяси.