ОРЗУЛАРИ БИР ОЛАМ ЁШЛАР

Бундан бир неча йил аввал  таҳририят ижодий жамоаси йиғилишларида доимо  бир гапни тез-тез такрорлар эдик:

- Журналистика соҳасига қизиқувчи ёшлар кам, борлари ҳам шунчаки ёзишади.

Хўш, ёш иқтидорлиларни излаб топиш, қобилиятларини ривожлантириш, туман газетасига жойлардан мақола ва хабарлар ёзиб турадиган жамоатчи музбирлар сафини кенгайтириш учун  нима қилиш керак? Атрофимизни турли хил ахборот манбалари қуршаб  олган, айниқса интернет тармоғидан фойдаланиш имкониятлари тобора  кенгайиб бораётган бир шароитда қишлоқ ва шаҳар ёшларида туман газетасига мақола ёзиш иштиёқини уйғотиш, уларни журналистика соҳасига қизиқтириш қандай кечаркан?

Таҳририят ижодий жамоаси қарори билан "Тараққиёт кўзгуси” газетасида "Энг яхши иншо” танлови, журналистика соҳасига қизиқувчилар учун "Тараққиёт кўзгуси” газетаси ва www.amunews.uz веб-сайти таҳририятининг "Мобил мухбир” лойиҳаси эълон қилинди.

Шуни қувонч билан таъкидлаш жоизки, ҳар иккала танлов ҳам кутилганидан зиёда натижалари билан нафақат ижодий жамоамизни, балки газетамиз ва веб-сайтнинг минглаб мухлисларини қувонтирди. Йил давомида, икки босқичда, ҳар бири беш хил йўналиш бўйича ўтказилган "Энг яхши иншо” танлови газета таҳририяти учун ўнлаб жамоатчи мухбирларнинг кашф этилишига имкон  яратди. Маънавиятга, журналистика соҳасига қизиқувчи Азиза Мадраҳимова, Севара Иброҳимова, Шаҳзод Қурбонбоев, Ҳусанжон Йўлдошев, Қундузой Юсупова, Юлдуз Мададова, Ирода Ердошева, Юлдуз Юсупова, Муҳайё Раҳимбоева сингари ёш мухбирлар бугун ўз мақола ва шеърлари орқали туманимиз халқига яхши таниш. Ўз ижод услубига, шахсий фикрига ва мулоҳазаларини дадил айта олиш қобилиятига эга бўлган бу ёшларнинг ҳар бир мақоласи, шеър ва ҳикоясида мустақиллик ғоялари, она Ватанга меҳр-муҳаббат туйғулари уфуриб туради.

Ўз тенгдошларидан ибрат олишга интилиб, ижод майдонига кириб келаётган ёшлар сафи бугунги кунда қувонарли даражада ўсди. Улардан бири "Ўрта қалъа” овулининг "Оқбошқалъа” маҳалласидан Чинорой Ўринбоева. Чинорой "Энг яхши иншо” танловининг фаол иштирокчиси, таҳририят ҳузуридаги "Жайхун илҳомлари” ННТ аъзоси, дилбар шеърлар муаллифи. Унинг бири-биридан ўқишли, мунозараларга бой мақолалари кишини ўйлашга, фикрлашга ундайди. Айниқса, она Ватан мавзуси Чинорой ижодида етакчи ўрин тутади.

Жамила Янгибоева ҳам "Энг яхши иншо” танлови ғолиби сифатида тенгқурларига, газета мухлисларига яхши таниш. Куюк кўпир овули "Ўзбекистон” маҳалласи аҳлининг турмуш тарзи, интилиш ва орзулари, мустақиллик йилларида ўзи туғилиб-ўсган маҳаллада олиб борилган бунёдкорлик ишлари ҳақида тўлқинланиб ҳимоя қилувчи Жамила фикрлари теран, дунёқараши кенглиги билан ажралиб туради.

Иншолар танлови ва "Мобил мухбир” лойиҳаси иштирокчиларидан Манғит иқтисодиёт коллежи ўқувчиси Феруза Йўлдошева, Амударё академик лицейи ўқувчиси Динора Каримбоева, 71-сонли мактаб ўқувчиси Озода Тўлибоева, Мафтунахон Кенжабоева, Муқаддасхон Янгибоева, 38-сонли мактаб ўқувчиси Жавоҳир Йўлдошевлар бугунги кунда ўз ижод намуналари билан газета мухлислари эътиборини қозонган жамоатчи мухбирлар сифатида шаклландилар. Айнан ана шу ёш ижодкорларимизнинг фаолликлари боис, бугунги кунда туманимизнинг энг чекка қишлоқ ва маҳаллаларида "Тараққиёт кўзгуси” газетасининг ўз жамоатчи мухбирлари, журналистика соҳасига қизиқувчи ёшлар ижод майдонига дадил кириб келишмоқда. Озода Тўлибоева, Чинорой Ўринбоеваларнинг ўз овуллари аҳолиси турмуш тарзи, ёшларнинг кийиниш маданияти, муоамала маданиятига оид, шунингдек, Феруза Йўлдошева, Муқаддас Янгибоева, Мафтунахон Кенжабоева ҳамда Жамила Янгибоеваларнинг эрта турмуш, оммавий маданиятга, диний-экстремизмга қарши, огоҳликка давъат мавзуларидаги мақолалари ҳар бир кишини ўйлашга, фикрлашга, мулоҳаза билан иш тутишга ундаши билан кўпчиликка манзур.

Шуни алоҳида мамнуният билан таъкидлашни истардимки, туман матбуотида бетакрор қобилиятли янги авлод вакиллари, келажагига ишонгудек салоҳиятли ижодкор-ёшлар шаклланмоқда. Қадамлари дадил, фикрлари ўктам бу ижодкор-ёшларнинг иштироки туфайли "Тараққиёт кўзгуси” газетаси саҳифаларида "Тенгдошларга гапим бор”, "Ота-оналарга гапим бор”, "Тенгдош - тенгдошга”, "Биз – келажак ворисларимиз”, "Биз эрта турмушга қаршимиз” "Ёшлар фикр билдиради” каби рукнлар пайдо бўлдики, бу рукнлар остида берилаётган мақолалар, аввало ўзига хослиги, ҳозир-жавоблиги, замон тараққиётига ҳамоҳанглиги билан муштарийлар эътиборига сазовор бўлмоқда.

- Менинг орзуларим бир олам, - дейди Амударё академик лицейи ўқувчиси Динора Каримбоева. – Ижод билан ошнолик ҳаётимга кўплаб янгиликлар олиб кирди. 2013 йилда "Жеткеншек” газетаси таҳририятининг "Обод маҳаллам” кўрик-танловида "Обод  маҳаллам – Жумур овулим” мақолам билан иштирок этиб, танлов ғолиби бўлдим. 2014 йилда "Яшил чироқ - 2014” танловида Ўзбекистон Республикасида фахрли 2-ўринни эгалладим. 2015 йилда эса "Ораста қизлар” кўрик-танловининг Қорақалпоғистон Республикаси ғолиби сифатида танловнинг мамлакат босқичига йўлланма олдим ва "Энг зукко қиз” йўналишида ғолибликни қўлга киритдим. Энг муҳими, "Орзуларим бир олам” шеърлар тўпламим нашр этилди. Менинг барча ютуқларимда севимли "Тараққиёт кўзгуси” ва "Менинг оилам” газеталарининг, amunews.uz веб-сайтининг ўрни катта.

Туман ёшлари ўртасида энг фаол маънавият тарғиботчиларига айланган бу ёш ижодкорларнинг ижод намуналарини кўриб, қалбимизда ғурур ва ишонч туйғулари уйғонади. Бирининг жўшқин шеърий сатрлари, бирининг кишини фикрлашга, мулоҳаза юритишга ундовчи ҳикоялари, яна бирларининг ҳаёт қувончлари ва ташвишлари ҳақидаги фикрлари, истиқлолдан ранг олган она Ватан манзаралари, буюк ўзгаришлардан сўз айтгувчи мақолаларини ўқиб, қалбимизда хотиржамлик уйғонади.

Бу хотиржамлик – туман матбуотида келажак уфқлари ёрқин янги авлод шаклланаётганига ишонч ҳамда салоҳиятли, билимдон ва зукко, маънавий мерос қадрини баланд тутадиган интеллектуал мулк эгалари вояга етаётганидан далолатдир. Зеро, 82 йиллик тарихга эга Амударё туман матбуотининг бугуни ҳам, келажаги ҳам маънавиятли, салоҳиятли, қалбларида орзулари бир олам ижодкорлар ижоди билан янада ривож топаверади. Қалблари эзгу орзуларга тўла ёш ижодкорларга:

- Орзу уфқларингиз янада ёрқин, ижод йўлларингиз ойдин бўлсин, халқимизга маънавият улашишдек сермашаққат ва гаштли ҳаётингиз оппоқ нурларга тўлсин! – деймиз.

Робия ЙЎЛДОШЕВА,

Қорақалпоғистон Республикасида хизмат кўрсатган журналист.