Амударё туманида энергия ресурслари назорати кучайтирилмоқда
Бугунги кунда "Энергия самарадорлиги — фаровон ҳаёт гарови" деган тамойил нафақат шиор, балки ҳар бир фуқаронинг, ҳар бир масъул раҳбарнинг кундалик ҳаётий қоидасига айланиб улгурган. Зеро, табиий газ, электр энергияси ва обиҳаётнинг ҳар бир қатраси бебаҳо неъмат бўлиб, уларни асраб-авайлаш ҳамда мақсадли йўналтириш бутун жамият барқарорлигини белгилаб беради. Айнан шу мақсадларни ҳаётга татбиқ этиш, жойларда кузатилаётган муаммоларни тезкорлик билан бартараф қилиш ҳамда қонун устуворлигини таъминлаш мақсадида Амударё туманида ҳам кенг кўламли назорат тадбирлари изчил давом эттирилмоқда.
Ушбу жараёнларнинг узлуксизлигини таъминлаш ҳамда соҳада тартиб ўрнатиш мақсадида Амударё туман прокурори Баҳром Машарипов бошчилигида эрталабки йиғин ўтказилди. Мазкур йиғинда туманнинг газ, электр ва ичимлик суви таъминоти корхоналарининг масъул ходимларидан иборат махсус ташкил топган ишчи гуруҳ аъзолари иштирок этди.
Тадбирда ҳар бир соҳа вакилининг олдида турган долзарб вазифалар аниқ ва қатъий белгилаб берилди. Хусусан, ишчи гуруҳ аъзоларига биринчи галдаги вазифа сифатида аҳоли хонадонлари ва тадбиркорлик субъектлари томонидан энергия ресурсларидан фойдаланиш маданиятини ўрганиш ва тафтиш қилиш топшириғи қўйилди. Жойларда электр энергияси, табиий газ ва энг азиз неъмат бўлган ичимлик сувидан ноқонуний фойдаланиш, тармоқларга ўзбошимчалик билан уланиш, ўғирлик ва талон-торож қилиш каби салбий ҳолатларнинг олдини олиш, уларни ўз вақтида аниқлаш ҳамда зудлик билан бартараф этиш бўйича рейд тадбирларини кескин кучайтириш чораларини кўриш юзасидан қатъий кўрсатмалар берилди. Бу каби тадбирлар нафақат давлат мулкини асраш, балки инсофли истеъмолчиларнинг ҳақ-ҳуқуқларини ҳимоя қилишга ҳам хизмат қилиши алоҳида таъкидлаб ўтилди.
Албатта, замонавий тизимларни жорий этишда рақамлаштириш ва автоматлаштиришнинг ўрни беқиёс. Бугунги кунда истеъмолчиларга ўрнатилган замонавий ҳисоблагичларнинг узлуксиз ишлаши тизимдаги шаффофликни кафолатлайди. Шу боис, рейд тадбирлари доирасида ишчи гуруҳ аъзолари томонидан алоқага чиқмаган, яъни марказлашган тизимга маълумот узатишда узилишлар кузатилган истеъмолчиларнинг электр ва табиий газ ҳисоблаш ускуналари жойига чиққан ҳолда бирма-бир кўздан кечирилмоқда. Ўрганишлар давомида ҳисоблагичларнинг ишдан чиққан, носоз эҳтиёт қисмлари зудлик билан янгисига алмаштирилиб, мавжуд техник камчиликлар тўлиқ бартараф қилинмоқда. Амалга оширилган бундай тезкор чора-тадбирлар натижасида ҳисоблагичларнинг марказий база билан қайта алоқага чиқиши ва маълумотларни аниқ узатиши таъминланмоқда. Бу эса, ўз навбатида, истеъмол қилинган энергия ресурсларининг аниқ ҳисобини юритиш ва сунъий йўқотишларнинг олдини олишда муҳим омил бўлиб хизмат қилади.
Ресурсларни тежашнинг яна бир муҳим йўналиши бу — эскирган инфратузилмани янгилашдир. Айниқса, аҳолини табиий газ билан барқарор таъминлаш, қувурлардаги йўқотишларни камайтириш мақсадида туманда кенг кўламли модернизация ишлари олиб борилмоқда. Жумладан, туманнинг Дурунки маҳалласи ҳудудида жойлашган, узоқ йиллар давомида фойдаланилиб келинган ва бугунги кун талабларига жавоб бермай қолган эски газ қувурларини янгилаш жараёнлари масъулларнинг диққат марказида бўлди. Ишчи гуруҳ аъзолари томонидан ушбу ҳудуддаги диаметри 100 миллиметр бўлган ўрта босимли эски газ қувурларини замонавий ва чидамлиларига алмаштириш ишлари бевосита жойига чиққан ҳолда кўздан кечирилди ва назоратга олинди. Бу каби амалий ишлар табиий газнинг истеъмолчигача бўлган йўлдаги техник йўқотишларини бартараф этиш билан бирга, ҳудуд аҳолисининг хонадонларига зангори оловнинг бир маромда ва хавфсиз етиб боришини таъминлайди.
Амударё туманида ҳуқуқни муҳофаза қилувчи органлар ва коммунал соҳа ходимлари ҳамкорлигида олиб борилаётган бу каби тушунтириш, назорат ва таъмирлаш ишлари аҳоли турмуш фаровонлигини юксалтириш, иқтисодиёт барқарорлигини таъминлаш ҳамда қонун устуворлигини қарор топтиришдек эзгу мақсадларга хизмат қилиши шубҳасиз. Энергия самарадорлигига эришиш ва ресурслардан оқилона фойдаланиш эса келажак авлодларнинг фаровонлиги учун қўйилган энг муҳим қадамдир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
