Амударёда фермерлар билан очиқ мулоқот: янги фармонлар қишлоқ хўжалигида янги имкониятлар эшигини очмоқда

Амударё туманида қишлоқ хўжалиги соҳаси вакиллари, фермер хўжаликлари раҳбарлари ва мутасадди ташкилотлар иштирокида муҳим учрашув бўлиб ўтди. Туман ҳокимлиги мажлислар залида ташкил этилган ушбу очиқ мулоқот Ўзбекистон Республикаси Президентининг пахта ва буғдой етиштирувчиларни қўллаб-қувватлашга қаратилган ПФ–82-сонли ҳамда лалми ва яйлов ерларидан самарали фойдаланишни рағбатлантириш бўйича ПФ–83-сонли Фармонлари мазмун-моҳиятини кенг тушунтиришга бағишланди.

Тадбирда Қорақалпоғистон Республикаси Вазирлар Кенгаши Раисининг қишлоқ ва сув хўжалиги бўйича ўринбосари, Қишлоқ хўжалиги вазири Камилжан Айтбаев иштирок этиб, фермер хўжаликлари раҳбарлари билан очиқ ва самимий мулоқот олиб борди. Учрашув давомида аграр соҳада амалга оширилаётган ислоҳотлар, давлат томонидан яратилаётган янги молиявий имкониятлар ҳамда фермерларни қўллаб-қувватлаш механизмлари атрофлича муҳокама қилинди.

Таъкидланганидек, Президентимиз томонидан қабул қилинган янги фармонлар қишлоқ хўжалиги тармоғида иқтисодий барқарорликни мустаҳкамлаш, ишлаб чиқарувчиларни рағбатлантириш ва ҳосилдорликни оширишга хизмат қилади. Айниқса, пахта ва буғдой етиштирувчиларга берилаётган молиявий имтиёзлар фермерларнинг манфаатдорлигини янада кучайтириши қайд этилди.

Фармонга мувофиқ, 2026 йил ҳосилидан бошлаб Қишлоқ хўжалиги вазирлиги ҳузуридаги Аграр соҳада тўловлар агентлиги томонидан имтиёзли кредит фоизларининг бир қисми компенсация қилинади. Хусусан, пахта етиштириш учун ажратилган кредитларни белгиланган муддатда қайтарган хўжаликларга фоиз тўловининг 2,5 фоизлик пункти, йил якунигача тўлиқ қайтарганларга эса 5 фоизлик пункти қоплаб берилади. Буғдой етиштириш учун олинган имтиёзли кредитларни 1-августга қадар тўлиқ қайтарган хўжаликлар учун эса фоиз тўловининг 4 фоизлик пункти компенсация қилинади.

Бу эса, аввало, фермерларнинг кредит юкини камайтириш, уларнинг молиявий барқарорлигини таъминлаш ҳамда янги мавсумга янада пухта тайёргарлик кўришига замин яратади.

Шунингдек, пахта-тўқимачилик кластерлари ва ип-калава ишлаб чиқарувчи корхоналар учун ҳам алоҳида енгилликлар назарда тутилган. Эндиликда пахта хомашёсини харид қилиш учун ажратилган тижорат кредитлари бўйича тўланган фоизларнинг бир қисми давлат томонидан қопланади. Бу эса ишлаб чиқариш занжирида узлуксизликни таъминлаш ва экспорт салоҳиятини оширишга хизмат қилади.

Учрашувда дизель ёқилғиси харажатларини камайтириш масаласига ҳам алоҳида эътибор қаратилди. Қайд этилишича, 2026 йил 1 апрелдан 1 июлгача биржа орқали харид қилинган ҳар бир тонна дизель ёқилғиси қийматининг 13 миллион сўмдан ошган қисми учун, бироқ 2 миллион сўмдан ортиқ бўлмаган миқдорда субсидия ажратилади. Бу имконият қишлоқ хўжалиги техникаларидан самарали фойдаланиш, мавсумий ишларни ўз вақтида бажариш ва ишлаб чиқариш харажатларини қисқартиришда муҳим аҳамият касб этади.

Тадбир давомида лалми ва яйлов ерларидан самарали фойдаланишнинг янги тартиблари ҳам батафсил тушунтирилди. Мутахассислар томонидан ушбу ер майдонларини иқтисодий айланишга киритиш, чорвачилик ва ем-хашак базасини мустаҳкамлаш, сув танқислиги шароитида самарали агротехнологияларни қўллаш бўйича тавсиялар берилди.

Фермерлар ўзларини қизиқтирган саволлар билан мурожаат қилиб, кредит олиш, субсидия ажратиш, ер майдонларидан фойдаланиш ҳамда ҳосилни реализация қилиш масалаларида мутасаддилардан батафсил жавоб олдилар. Очиқ мулоқот шаклида ўтган учрашув соҳа вакиллари учун муҳим ахборот ва тажриба алмашув майдонига айланди.

Таъкидлаш жоизки, мазкур фармонлар нафақат фермер хўжаликларини молиявий қўллаб-қувватлаш, балки қишлоқ хўжалигида самарадорликни ошириш, замонавий бошқарув тизимини жорий этиш ва озиқ-овқат хавфсизлигини мустаҳкамлашда ҳам муҳим омил бўлиб хизмат қилади.

Чарос Арслонова, туман ҳокимлигининг Ахборот хизмати раҳбари.