Халқ билан бирга: O‘zLiDePдан амалий ташаббуслар ва хайрли ишлар

Бугунги шиддат билан ўзгараётган замонда мамлакатимизда амалга оширилаётган кенг кўламли ислоҳотлар жамият ҳаётининг барча соҳаларини қамраб олиб, янги тараққиёт босқичини бошлаб бермоқда. Ушбу жараёнлар нафақат давлат бошқаруви, балки сиёсий институтлар, хусусан, сиёсий партиялар зиммасига ҳам улкан масъулият юкламоқда. Бугунги куннинг устувор талаби — аҳоли билан яқин мулоқот ўрнатиш, одамларни қийнаётган муаммоларга тезкор ва энг муҳими, амалий ечим топишдан иборатдир. Ана шундай эзгу мақсад йўлида Тадбиркорлар ва ишбилармонлар ҳаракати — Ўзбекистон Либерал-демократик партияси томонидан илгари сурилган “Халқ билан бирга” умуммиллий дастури мамлакатимиздаги янгиланишлар жараёнини янада чуқурлаштиришга хизмат қилаётган муҳим ташаббус бўлмоқда.

Юртимизнинг барча ҳудудларида ушбу дастур доирасида тарғибот ва амалий ишлар изчиллик билан олиб борилмоқда. Энг эътиборли жиҳати шундаки, дастур қабул қилинганидан сўнг унинг ижросига зудлик билан киришилди. Бу эса партиянинг сўздан амалиётга ўтиш тамойилига қатъий амал қилаётганидан далолат беради. Бугун O‘zLiDeP фаоллари, депутатлар ва кўнгилли волонтёрлар маҳаллабай ишлаш тизими асосида энг чекка ҳудудларга, ҳар бир хонадонга кириб бормоқда.

Хусусан, Амударё туманида ҳам “Халқ билан бирга” дастури доирасида амалга оширилаётган ишлар алоҳида эътиборга лойиқ. Туманнинг Беруний ва Дурунки маҳаллаларида “Фаровонликка томон илк қадам” мавзусида ўтказилган муҳокамалар аҳоли билан очиқ ва самарали мулоқотнинг ёрқин намунаси бўлди.

Мазкур тадбирларда партия вакиллари, депутатлар ва жамоатчилик фаоллари иштирок этиб, ёшлар ва хотин-қизларни қийнаётган масалаларни атрофлича таҳлил қилдилар. Учрашувда партиянинг Қорақалпоғистон Республикаси Кенгаши масъуллари, туман Кенгаши аппарат раҳбари, халқ депутатлари туман Кенгаши депутати Яхшимурод Аҳмедов, партиядан сайланган Қорақалпоғистон Республикаси Жўқорғи Кенгеси депутати Илҳом Полвонов ҳамда маҳаллий кенгаш депутатлари Мадамин Казаков ва Сайёра Жумамуротовалар иштирок этиб, фуқароларнинг мурожаатларини тингладилар.

Муҳокамалар давомида асосий эътибор ҳар бир маҳалланинг ўзига хос хусусиятларидан келиб чиқиб, мавжуд муаммолар харитасини шакллантиришга қаратилди. Мулоқотлар давомида аҳолининг касб-ҳунарга ўқишига тўсқинлик қилаётган омилларни бартараф этиш, уларни тадбиркорликка йўналтириш ва қайта тайёрлаш бўйича аниқ чора-тадбирлар белгилаб олинди. Шунингдек, ижтимоий масалалар ҳам эътибордан четда қолмади. Масалан, Ўрта қалъа овулида истиқомат қилувчи аҳоли томонидан болалар майдончаси қуриш ва ички йўлларни таъмирлаш каби долзарб масалалар кўтарилди.

Партиянинг инсон капиталига бўлган эътибори Дурунки маҳалласидаги 56-сонли мактабда ўтказилган учрашувда яна бир бор намоён бўлди. Тадбирнинг энг қувонарли жиҳати шундаки, мактаб ўқувчилари учун “Депутат стипендияси” жорий этилди. Ушбу ташаббус орқали аъло баҳоларда ўқиётган, бироқ ижтимоий ҳимояга муҳтож бўлган оилалар фарзандларини қўллаб-қувватлаш ва уларни билим олишга янада руҳлантириш мақсад қилинган. Учрашувда сўзга чиққан Жўқорғи Кенгес депутати Илҳом Полвонов ва бошқа халқ вакиллари ёшлар таълими келажак тараққиётининг мустаҳкам пойдевори эканини алоҳида таъкидладилар. Бу каби хайрли ишлар партиянинг нафақат сиёсий, балки ижтимоий масъулиятни ҳам теран ҳис этишини кўрсатади.

Шунингдек, партия ташаббуси билан ҳаётга татбиқ этилаётган “Бир оила — бир ҳомий” акцияси доирасидаги ишлар ҳам юртдошларимиз томонидан мамнуният билан кутиб олинмоқда. Акция доирасида депутат Илҳом Полвонов Тош ёп овулида яшовчи ижтимоий ҳимояга муҳтож оила ҳолидан хабар олди. Оиланинг эртанги кунга бўлган ишончини ошириш мақсадида, хонадон соҳибларининг қизи — Малоҳатнинг тиббиёт соҳасида таълим олиш орзуси қўллаб-қувватланди. Депутат талаба қизнинг контракт тўловини тўлаб бериш вазифасини ўз зиммасига олди. Бундай олижаноб қадамлар фақатгина моддий ёрдам бериш эмас, балки инсонларнинг билим олиши ва касб-ҳунар эгаллашига шароит яратиш орқали уларнинг ҳаётда ўз ўринларини топишларига кўмаклашишдек хайрли мақсадларга хизмат қилади.

Хулоса қилиб айтганда, “Халқ билан бирга” умуммиллий дастури доирасида қилинаётган ҳар бир иш O‘zLiDePнинг халқ манфаатларини устувор деб билишининг амалий тасдиғидир. Партия томонидан кўрсатилаётган бу каби ташаббуслар ҳар бир фуқаронинг ҳаётида ижобий ўзгаришлар ясашга, жамиятда ижтимоий адолатни қарор топтиришга хизмат қилади. Зеро, халқ билан тиллаша олган, унинг дардига малҳам бўла олган сиёсий кучгина жамиятнинг чинакам таянчига ва етакчисига айланади. Бундай изчил саъй-ҳаракатлар нафақат партиянинг нуфузини оширади, балки мамлакатимизнинг янада гуллаб-яшнаши ва фаровонлигига қўшилган салмоқли ҳисса бўлиб қолади.