Шимоли-ғарбий ҳарбий округида «Очиқ эшиклар куни» тадбири ўтказилди
Шимоли-ғарбий ҳарбий округининг Маънавият ва маърифат марказида «Очиқ эшиклар куни» тадбири ўтказилди. Ёшларнинг бўш вақтини мазмунли ташкил этиш, уларнинг қалбида Ватанга бўлган чексиз муҳаббат ва садоқат туйғуларини уйғотиш мақсадида ўтказилган ушбу тадбир ёшлар учун ҳақиқий жасорат ва матонат мактабига айланди.
Тадбирнинг асосий мақсади — ёш авлодни ҳарбий хизматнинг машаққатли ва шарафли йўли билан яқиндан таништириш, уларда миллий армиямиз билан фахрланиш ҳиссини шакллантиришдан иборат бўлди.
Марказ ҳудудида ташкил этилган ҳарбий техника ва замонавий қурол-яроғлар кўргазмаси ёшлар учун шунчаки қизиқарли томоша эмас, балки уларга мамлакатимизнинг мудофаа қудрати ва ҳарбий салоҳиятини ўз кўзлари билан кўриш учун ажойиб имкониятин бўлди. Ҳар бир замонавий қурол ортида Ватан тинчлигини кўз қорачиғидек асраётган мард ўғлонларнинг кучи, билими ва жасорати мужассам эканини ёшлар теран ҳис этдилар. Талаба-ёшлар ҳарбий техникаларнинг имкониятлари билан танишар экан, юрт ҳимоячиси бўлиш нақадар юксак масъулият эканини яна бир бор англаб етдилар.
Тадбирнинг энг ҳаяжонли ва таъсирли лаҳзаларидан бири — ҳарбий хизматчилар томонидан намойиш этилган қўл жанги усталарининг чиқишлари бўлди. Ҳар бир ҳаракатдаги аниқлик, тезкорлик ва юксак интизом томошабинларни ҳайратга солмай қўймади. Бу чиқишлар шунчаки жисмоний машқ эмас, балки йиллар давомида тўпланган тажриба, ирода ва букилмас матонат маҳсулидир. Ёшлар бу чиқишларни кузатар экан, кучли бўлиш, ўз устида мунтазам ишлаш ва ҳар қандай вазиятда Ватан ҳимоясига тайёр туриш каби олийжаноб мақсадларни қалбларига туккан бўлса ажаб эмас.
Ҳарбий оркестр садолари остида янграган куйлар ва истеъдодли ёшлар ижросидаги Ватанни мадҳ этувчи қўшиқлар тадбирга байрамона руҳ ва кўтаринкилик бағишлади. Бу куй-қўшқиқлар ҳар бир тингловчининг юрагига кириб бориб, ўз юрти, муқаддас тупроғи ва ҳилпираб турган байроғи билан фахрланиш туйғусини янада мустаҳкамлади. Ватанпарварлик нафақат сўзда, балки мана шундай куйларда, инсон руҳиятини жунбушга келтирувчи оҳангларда ҳам акс этади. Бундай маданий чиқишлар ҳарбий соҳа ва жамият ўртасидаги маънавий кўприкни янада мустаҳкамлашга хизмат қилди.
Таъкидлаш жоизки, «Очиқ эшиклар куни» доирасида Қорақалпоғистон Республикасидаги барча олий таълим муассасалари талабалари, кенг жамоатчилик вакиллари ва ёш ҳарбий хизматчилар ўртасидаги мулоқотлар жуда самимий руҳда кечди. Кўргазмали машғулотлар ва ташкил этилган давра суҳбатлари орқали ёшлар ҳарбий хизматнинг назарий ва амалий жиҳатларини, унинг инсон шахсиятини шакллантиришдаги аҳамиятини чуқурроқ англадилар. Бу ерда тўпланган ёшлар нафақат янги билимларга эга бўлишди, балки ўзларини қизиқтирган саволларга соҳа мутахассисларидан батафсил жавоблар олдилар. Бундай бевосита мулоқот ёшларнинг ҳарбий касбга бўлган қизиқишини оширишда муҳим омил бўлиб хизмат қилади.
Шимоли-ғарбий ҳарбий округида ўтказилган ушбу маънавий-маърифий тадбир келажак поспонларини тарбиялайдиган чинакам мактаб вазифасини ўтди. Зеро, Ватан ҳимояси — бу нафақат ҳарбийларнинг вазифаси, балки шу азиз тупроқда яшаётган ҳар бир фуқаронинг муқаддас бурчидир. Ушбу тадбирдан кўзланган мақсад битта — тинчликни асраш, халқ фаровонлигини таъминлаш ва ёшларни Ватанга садоқат билан хизмат қилишга даъват этиш. Зеро, мард ва жасур ўғлонлари бор юртнинг келажаги ҳамиша нурафшон бўлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
