Нукусда Амир Темур таваллудининг 690 йиллиги муносабати билан тантанали ҳарбий пиёда юриш ва байрам тадбири ўтказилди

9 апрель санаси ҳар йили юртимиз тарихида ўчмас из қолдирган Соҳибқирон Амир Темур таваллуд топган кун сифатида ушбу буюк тарихий сиймога чексиз ҳурмат ва эҳтиром билан кенг нишонланди. Буюк давлат арбоби ва енгилмас саркарда таваллудининг 690 йиллиги муносабати билан Нукус шаҳрида тантанали ҳарбий пиёда юриш ва байрам тадбири ўтказилди. Ушбу тадбир шунчаки байрам эмас, балки миллий ғурур ва ватанпарварлик руҳининг юксак ифодасига айланди.

Ҳарбий юриш Ислом Каримов кўчасидан бошланиб, пойтахтнинг марказий нуқтаси — Мустақиллик майдонига қадар давом этди. Кўча бўйлаб Амир Темур байроғининг мағрур ҳилпираши, Соҳибқирон даврига оид қурол-аслаҳалар ва тарихий либосларнинг намойиш этилиши томошабинларга тарих саҳифаларини жонли тарзда ҳис этиш имконини берди. Бу манзара айниқса ёш авлод қалбида аждодларга садоқат, миллий ўзликни англаш ва Ватанга бўлган чексиз муҳаббат туйғуларини янада мустаҳкамлашга хизмат қилди.

Соҳибқирон Амир нафақат улкан салтанат асосчиси, балки илм-фан, маданият ва маънавият ҳомийси сифатида ҳам дунё тамаддунига беқиёс ҳисса қўшган шахс ҳисобланади. Ўзбекистон ўз мустақиллигини мустаҳкамлаб, янги тараққиёт босқичига қадам қўяр экан, Амир Темурнинг давлатчилик анъаналари, адолат ва куч бирлиги ҳақидаги ўгитлари биз учун маёқ бўлиб хизмат қилмоқда. Унинг ҳаёти ва фаолиятига назар ташлар эканмиз, марказлашган давлат барпо этиш йўлидаги машаққатли курашлари ва бу йўлдаги юксак салоҳияти ҳар қандай даврда ҳам ибрат мактаби бўла олишига амин бўламиз.

Соҳибқироннинг тарихий хизмати шундаки, у ўнлаб майда ва тарқоқ вилоятларни ягона байроқ остида бирлаштирди. Бу бирлашув нафақат ҳарбий қудратни, балки иқтисодий ва маданий юксалишни ҳам таъминлади. У асос солган давлат Шарқий Туркистон, Ҳиндистон ва Ироқдан тортиб, Кичик Осиё ва Кавказгача бўлган улкан ҳудудларни қамраб олиб, жаҳон сиёсий харитасида янги мувозанатни вужудга келтирди.

"Куч — адолатдадир" деган улуғвор тамойилни давлатчилик асоси қилиб белгилаган Соҳибқирон, ўз салтанатида қонун устуворлигини таъминлашга интилди. Унинг машҳур "Темур тузуклари" асари нафақат ўша давр, балки бугунги сиёсатшунослик ва ҳуқуқшунослик учун ҳам қимматли қўлланма ҳисобланади.

Амир Темур — фақатгина ўтмиш сиймоси эмас, балки миллий ўзлигимизнинг ажралмас қисмидир. Унинг қатъияти, узоқни кўра билиш қобилияти ва Ватан равнақи йўлидаги фидоийлиги биз учун ҳамиша ибрат бўлиб қолади.

Мустақиллик майдонида ташкил этилган тантаналар ҳам ҳақиқий маънавий байрам тусини олди. Майдон бўйлаб янграган ҳарбий оркестрнинг жўшқин куйлари ва саф тортиб келаётган аскарларнинг қадамлари байрамга ўзгача салобат бағишлади. Театрлаштирилган саҳна кўринишлари орқали Соҳибқирон ҳаёти ва фаолиятидан лавҳалар жонлантирилганида, гўёки тарих ғилдираги ортга айланиб, Темур тузган буюк салтанатнинг қудрати кўз ўнгимизда намоён бўлди. Фахрий қоровулнинг маҳорат билан ижро этган чиқишлари ва қурол билан амалга оширилган мураккаб ҳаракатлар йиғилганларда катта қизиқиш уйғотди.

Тадбир давомида қўл жанги усталарининг намойиш этган маҳоратлари аскарларинг нақадар кучли ва матонатли эканини яна бир бор исботлади. Ҳарбий оркестрнинг бадиий чиқишлари эса томошабинларга завқ бағишлаб, ватанпарварлик руҳини янада юксалтирди. Хушовоз хонандалар ижросидаги она ватанни, аждодлар жасоратини тараннум этувчи куй-қўшиқлар байрам руҳини юқори нуқтага олиб чиқди. Бу каби тадбирлар халқимизнинг ўз тарихига бўлган юксак ҳурматини кўрсатиш билан бирга, миллий армиямизнинг салоҳияти ва қудратини намойиш этишда муҳим аҳамият касб этади.

Соҳибқирон Амир Темур таваллудининг 690 йиллигига бағишланган ушбу тантанали юриш ва маданий тадбирлар мажмуаси халқимизнинг маънавий бирлигини янада жипслаштирди. Буюк бобокалонимизнинг «Куч — адолатдадир» деган улуғвор ғояси бугунги кун аскарлари ва ёшлари учун ҳаётий шиорга айланганини Нукус шаҳридаги байрам тантаналари яққол исботлаб берди. Чиндан ҳам, тарихини улуғлаган элнинг келажаги ҳамиша нурафшон бўлади.