Қишлоқ хўжалигидаги ислоҳотларига бағишланган семинар бўлиб ўтди

Ер — бебаҳо бойлик, ризқ-рўзимиз манбаи ва келажак авлодларга қолдириладиган энг катта меросдир. Бу бойликдан унумли фойдаланиш, унинг ҳар бир қаричидан самарали ҳосил олиш ва мавжуд ресурсларни илмий асосланган ҳолда бошқариш бугунги даврнинг энг долзарб вазифаларидан бирига айланган.

Ўзбекистон қишлоқ хўжалигида амалга оширилаётган изчил ислоҳотлар, энг аввало, ердан фойдаланиш маданиятини юксалтириш ва соҳага замонавий технологияларни жорий этишга қаратилгани билан аҳамиятлидир. Ана шундай эзгу мақсадлар ижросини таъминлаш мақсадида Амударё туманида кўргазмали-амалий семинар ўтказилди. Ушбу тадбир Ўзбекистон Республикаси Президентининг 2024 йил 30 декабрдаги қарорида белгиланган вазифалар ижросини таъминлаш, шунингдек, қишлоқ хўжалиги майдонларидаги қўшимча имкониятларни ишга солишга қаратилган муҳим қадам бўлди.

Семинарда ишчи гуруҳ аъзолари, агрокластерлар раҳбарлари, фермер ва деҳқон хўжаликлари вакиллари, томорқа ер эгалари ҳамда соҳа мутахассислари иштирок этди. Асосий эътибор ушбу йўналиш бўйича қабул қилинган Президент қарорларининг мазмун-моҳиятини кенг жамоатчиликка тушунтиришга қаратилди. Зеро, давлатимиз раҳбари томонидан имзоланган ушбу ҳужжатлар замирида ердан оқилона фойдаланиш орқали халқимиз фаровонлигини ошириш, озиқ-овқат хавфсизлигини таъминлаш ва экспорт салоҳиятини янги босқичга олиб чиқишдек улуғвор мақсадлар мужассам.

Тадбир давомида алоҳида таъкидланганидек, эндиликда фақат асосий экин майдонлари билан чекланиб қолмасдан, дала четлари, каналлар, коллектор-дренаж тармоқлари ҳамда суғориш тизимлари атрофидаги бўш ётган ерлардан ҳам унумли фойдаланиш лозим. Бундай майдонларда турли хил маҳсулотлар етиштиришни йўлга қўйиш нафақат маҳсулот ҳажмини оширади, балки қишлоқ жойларида аҳоли бандлигини таъминлашда қўшимча манба бўлиб хизмат қилади. Бу, ўз навбатида, ҳар бир қарич ернинг эгаси бўлиши ва ундан даромад олинишини англатади.

Чиндан ҳам, бугунги кунда жаҳон бозорида рақобатдош бўлиш учун фақатгина маҳсулот етиштириш етарли эмас. Энг муҳими, бу маҳсулотлар халқаро стандартларга жавоб бериши ва тегишли сертификатларга эга бўлиши шарт. Семинар иштирокчиларига республика бўйича органик маҳсулотлар етиштириш ҳажмини кенгайтириш ва сертификатланган майдонларни кўпайтириш бўйича амалга оширилаётган тизимли ишлар ҳақида батафсил маълумот берилди.Хусусан, халқаро тан олинган сертификатларнинг афзалликлари алоҳида қайд этилди.

Ушбу ҳужжатлар маҳсулотнинг сифати ва хавфсизлигини тасдиқлаб, улар хорижий ҳамкорларнинг ишончини қозонишда, экспорт географиясини кенгайтиришда ва маҳсулотларни юқори нархларда сотишда беқиёс аҳамиятга эга. Импорт қилувчи давлатлар учун сертификатланган маҳсулотлар шаффофлик ва сифат кафолати демакдир, бу эса халқаро савдо жараёнларини сезиларли даражада енгиллаштиради.

Давлат томонидан деҳқон ва фермерлар учун яратилаётган имтиёзлар, ишлаб чиқаришдан тортиб, маҳсулотни қайта ишлаш, сақлаш ва экспорт қилишгача бўлган занжирни қўллаб-қувватлаш чоралари семинарнинг диққат марказида бўлди. Инфратузилма ва логистика имкониятларини кенгайтириш бўйича кўрилаётган чоралар қишлоқ хўжалиги ходимларига янги куч ва шижоат бағишлаши шубҳасиз.

Шунингдек, соҳани рақамлаштириш масаласига ҳам алоҳида тўхталиб ўтилди. Бугунги замон деҳқони замонавий ахборот технологиялари билан ҳам тиллаша олиши керак. Тадбирда ички фитосанитария сертификатларини расмийлаштириш тартиби, «Agroko‘makchi» мобил иловаси орқали электрон «Дала дафтари»ни юритиш тизими бўйича амалий кўрсатмалар берилди. Бундай инновацион ечимлар бюрократик тўсиқларни камайтиришга, иш жараёнини тезлаштиришга ва ҳар бир жараённи мониторинг қилиб боришга имкон беради.

Семинар якунида ер эгаларига қарор ижросига масъулият билан ёндашиш, дала четларидаги имкониятларни бой бермаслик ва босқичма-босқич органик деҳқончиликка ўтиш бўйича тавсиялар берилди. Зеро, бугунги интилишлар эртанги тўкинчилик ва фаровонлигимизнинг мустаҳкам пойдеворидир.