Ёшлар ўртасида ҳарбий-спорт мусобақаларининг туман босқичи ўтказилди

Ватан – муқаддас тушунча. Унинг тинчлиги ва осойишталигини асраш, сарҳадларимиз дахлсизлигини таъминлаш ҳамда осмонимиз мусаффолигини сақлаш ҳар бир фуқаронинг, айниқса, келажагимиз эгалари бўлган баркамол ёшларнинг энг олий бурчи саналади. Шу сабабли ҳам бугунги кунда мамлакатимизда ёш авлодни жисмонан соғлом, маънан етук, интеллектуал жиҳатдан салоҳиятли ва энг муҳими, юксак ҳарбий-ватанпарварлик руҳида тарбиялаш давлат сиёсатининг устувор йўналишларидан бирига айланган. Айнан шу эзгу мақсад йўлида жойларда турли маънавий-маърифий тадбирлар, спорт мусобақалари, ҳарбий хизматчилар ва ёшлар учрашувлари мунтазам равишда юқори савияда ташкил этиб келинмоқда.

Хусусан, Амударё туманида ҳам ўсиб келаётган ёш авлод қалбида она юртга муҳаббат, фидойилик, мардлик ва жасурлик туйғуларини юксалтириш мақсадида кенг кўламли ишлар амалга оширилмоқда.

Яқинда Амударё тумани Мудофаа бўлими ташаббуси билан мудофаага кўмаклашувчи “Ватанпарвар” ташкилоти билан ҳамкорликда умумтаълим мактаблари ўқувчилари ўртасида ҳарбий-ватанпарварлик руҳини ошириш, уларни чақириққа қадар бошланғич тайёргарлик фанлари бўйича олган назарий билим ва кўникмаларини амалиётда, реал ҳаётий вазиятларда қўллашга ўргатиш мақсадида ҳарбий-спорт мусобақаларининг туман босқичи кўтаринки руҳда ўтказилди.

Мусобақа давомида тумандаги умумтаълим мактабларидан ташриф буюрган, кўзларида ўт чақнаб турган ёшлар ўзларининг чаққонлиги, мерганлиги, куч ва иродасини турли синовлардан ўтказдилар. Майдонда ҳукм сурган соғлом рақобат муҳити, иштирокчиларнинг ғалабага бўлган интилиши ва иштиёқи мазкур спорт тадбирининг қанчалик аҳамиятли ҳамда ҳаяжонли эканлигини яққол намоён этди.

Спартакиада дастуридан ўрин олган шартлар ёшларнинг нафақат жисмоний имкониятларини, балки интеллектуал салоҳиятини, тезкор фикрлашини ҳам синовдан ўтказишга қаратилди. Иштирокчилар белгиланган масофага тезлик билан югуриш, турникда тортилиш, арқон тортишиш, автоматни қисмларга ажратиш ва йиғиш ҳамда бошқа шартлар асосида билимларни, жисмоний имкониятларини намойиш этишди.

Ҳар бир шарт ўқувчилардан юксак масъулиятни, чаққонликни ва албатта, чинакам ўзаро ҳамжиҳатликни талаб этди. Тадбирни катта қизиқиш билан кузатиб борган томошабинлар, устоз-мураббийлар ва ота-оналар ўз фарзандларининг, шогирдларининг шиддатли ҳаракатларидан, уларнинг эртага эл-юртга камарбаста бўладиган ватан ҳимоячиси деган шарафли номга муносиб бўлиб вояга етаётганидан чексиз ғурурландилар. Ҳакамлар ҳайъати эса иштирокчиларнинг ҳар бир чиқишини одилона, холис ва қатъий мезонлар асосида баҳолаб борди.

Албатта, ҳар қандай спорт мусобақасида бўлгани каби, бу галги спорт ва ёшлик байрамида ҳам энг кучлилар, энг чаққон ва билимлилар сараланди. Натижаларга кўра, фахрли учинчи ўринни ўзининг тезкорлиги ва жамоавий жипслиги билан кўпчиликнинг эътиборини тортган, номига монанд ҳаракат қилган 19-сонли умумтаълим мактабининг "Қалқон" жамоаси қўлга киритди. Иккинчи ўрин эса барча шартларда бирдек барқарор натижаларни қайд этган, иродали ва билимдон ўқувчилардан ташкил топган 12-сонли мактабнинг "Ватанпарвар" жамоасига насиб қилди. Энг юқори – фахрли биринчи ўрин эса мусобақа давомида чинакам етакчилик қобилиятини намоён этган, жисмоний ва маънавий жиҳатдан бошқалардан тенгсиз эканлигини яққол исботлаган 40-сонли мактабнинг "Юрт посбонлари" жамоасига насиб қилди.

Ғолиб ва совриндор жамоалар туман Мудофаа бўлими ҳамда тадбир ташкилотчилари томонидан махсус дипломлар, фахрий ёрлиқлар ҳамда қимматбаҳо эсдалик совғалари билан тақдирландилар. Бу каби кенг қамровли мусобақалар нафақат ўсмирларнинг жисмоний чиниқишига, балки уларда жамоа бўлиб ишлаш, қийин ва ностандарт вазиятларда тўғри қарор қабул қилиш, сабр-матонатли бўлишдек энг муҳим инсоний хусусиятларини шакллантиришда муҳим аҳамият касб этади.