Амударёда “Ёшлар куни” доирасида учрашувлар ўтказилди

Юртимизда ёшлар масаласи давлат сиёсатининг энг устувор йўналишларидан бири сифатида қаралмоқда. Зеро, ҳар бир давлатнинг эртанги куни, тараққиёти ва фаровонлиги айнан ёш авлоднинг билимли, салоҳиятли ва ватанпарвар бўлиб вояга етишига боғлиқ. Шу боис мамлакатимизда ёшларнинг ҳар томонлама ривожланиши, таълим олиши, касб-ҳунар эгаллаши, бандлигини таъминлаш ҳамда бўш вақтини мазмунли ташкил этиш борасида кенг кўламли ишлар амалга оширилмоқда.

Ўзбекистон Республикаси Президентининг жорий йил 24 февраль куни ёшлар билан ўтказган учрашуви давомида ҳам бу масалаларга алоҳида эътибор қаратилиб, ёшлар билан ишлаш тизимини янги босқичга олиб чиқишга қаратилган муҳим вазифалар белгилаб берилди. Мазкур учрашувда илгари сурилган ташаббуслардан бири сифатида эндиликда ҳар пайшанба куни “Ёшлар куни” деб эълон қилинди. Бу эса жойларда ёшларнинг муаммоларини ўрганиш, уларнинг таклиф ва ташаббусларини қўллаб-қувватлаш ҳамда иқтидор ва қобилиятини рўёбга чиқариш учун муҳим имконият яратмоқда.

Мазкур ташаббус ижроси доирасида 5-март куни Амударё тумани ҳокими Собир Хўжаметов бошчилигидаги туман раҳбарлари Қипчоқ шаҳарчаси ҳудудида жойлашган 1-сон техникум фаолияти билан яқиндан танишди. Ташриф давомида таълим масканида олиб борилаётган ўқув жараёнлари, ўқувчилар учун яратилган шарт-шароитлар, замонавий касб-ҳунарларни ўргатиш бўйича амалга оширилаётган ишлар ҳамда ёшларнинг қизиқишлари асосида ташкил этилган турли тўгараклар фаолияти ўрганилди.

Техникумда ёшларнинг назарий билимларини амалий кўникмалар билан мустаҳкамлашга алоҳида эътибор қаратилаётгани, ўқувчиларга замонавий касб-ҳунарларни пухта эгаллашлари учун зарур шароитлар яратилгани алоҳида қайд этилди. Шунингдек, ёшларнинг бўш вақтини мазмунли ташкил этиш мақсадида йўлга қўйилган спорт тўгараклари фаолияти ҳам кўздан кечирилди.

Хусусан, волейбол ҳамда миллий кураш тўгараклари машғулотлари билан танишиш жараёнида ёшларнинг спортга бўлган қизиқиши, уларнинг жисмоний саломатлигини мустаҳкамлаш, соғлом турмуш тарзини тарғиб қилиш борасида амалга оширилаётган ишлар эътироф этилди. Спорт билан мунтазам шуғулланиш ёшларнинг нафақат жисмонан чиниқиши, балки иродаси ва интилишларини мустаҳкамлашда ҳам муҳим омил экани таъкидланди.

Шунингдек, ташриф давомида ҳудуддаги 21-сонли болалар мусиқа ва санъат мактабида ёшлар билан очиқ мулоқот ташкил этилди. Учрашув аввалида мактабда таълим олаётган иқтидорли ёшларнинг ижодий ишлари ва санъат намуналари намойиш этилди.

Ёш ижодкорлар томонидан ижро этилган бетакрор куй-қўшиқлар, миллий чолғу асбобларида ижро этилган мусиқий композициялар ҳамда ёш рассомларнинг ранг-баранг ижод намуналари йиғилганларда катта таассурот қолдирди. Ёшларнинг санъатга бўлган қизиқиши, уларнинг истеъдоди ва ижодий салоҳияти барчани қувонтирди.

Шундан сўнг ёшлар билан самимий мулоқот ташкил этилиб, уларнинг фикр-мулоҳазалари, таклиф ва ташаббуслари тингланди. Учрашув давомида ёшлар томонидан бандликни таъминлаш, тадбиркорлик фаолиятини йўлга қўйиш, имтиёзли кредитлардан фойдаланиш, ер майдонлари ажратиш ҳамда касб-ҳунар ўрганиш имкониятларини кенгайтириш каби масалалар юзасидан қатор мурожаат ва таклифлар билдирилди.

Масъул раҳбарлар томонидан ҳар бир мурожаат алоҳида кўриб чиқилиб, мавжуд муаммоларни ҳал этиш юзасидан тегишли ташкилотлар билан ҳамкорликда амалий чоралар кўрилиши таъкидланди. Айрим масалалар жойида ҳал этилиб, қолган мурожаатлар ижроси бўйича мутасаддиларга аниқ вазифалар белгилаб берилди.

Бугунги кунда ёшларнинг билимли, ташаббускор ва фаол бўлиб вояга етиши мамлакатимиз тараққиётининг муҳим омилларидан бири ҳисобланади. Шу боис жойларда ёшлар билан очиқ мулоқотлар ўтказиш, уларнинг муаммо ва таклифларини ўрганиш ҳамда ҳар томонлама қўллаб-қувватлаш долзарб вазифа бўлиб қолмоқда.

Амударё туманида ташкил этилаётган бундай учрашув ва тадбирлар ёшларнинг орзу-интилишларини рўёбга чиқариш, уларнинг жамият ҳаётидаги фаоллигини ошириш ҳамда келажакда етук мутахассис, ватанпарвар инсонлар бўлиб етишишига хизмат қилади.

Таъкидлаш жоизки, бу каби учрашув ва очиқ мулоқотлар туманнинг бошқа маҳаллаларида ҳам изчил давом эттирилади. Бу эса ёшларнинг муаммоларини ўз вақтида ҳал этиш, уларнинг ташаббусларини қўллаб-қувватлаш ҳамда ҳар бир ёшнинг жамиятда муносиб ўрин эгаллашига замин яратади.

Чарос Арслонова, туман ҳокимлигининг Ахборот хизмати раҳбари.