Ёшлар куни – келажак пойдеворини мустаҳкамловчи муҳим қадам

Ўзбекистон Республикаси Президентининг жорий йил 24 февраль куни ёшлар билан ўтказган учрашувида белгилаб берилган устувор вазифаларга мувофиқ, ҳар пайшанба куни юртимизда “Ёшлар куни” сифатида қатор амалий ишлар ташкил этилмоқда. Бу ташаббус замирида битта эзгу мақсад мужассам — ёшлар муаммоларини бевосита жойларда ўрганиш, уларнинг таклиф ва ташаббусларини қўллаб-қувватлаш ҳамда ҳаётда ўз ўрнини топишига кўмаклашиш.

Шу муносабат билан 26 февраль куни Қиличбой овулида жойлашган, Ўзбекистон Республикаси Президентининг 2024 йил 14 февралдаги 60-сонли қарорига мувофиқ ташкил этилган хорижий тилларга ихтисослашган ўқув маркази фаолияти билан танишилди. Мазкур марказ ёшларнинг замонавий билимларни эгаллаши, айниқса, хорижий тилларни пухта ўрганиши орқали уларнинг рақобатбардошлигини оширишга хизмат қилмоқда.

Таъкидлаш жоизки, бугун Президентимиз томонидан ёшларга яратилаётган шароитлар кўлами тобора кенгайиб бормоқда. Хорижий тилларни ўрганиш, замонавий касб-ҳунар эгаллаш, тадбиркорликни бошлаш учун имтиёзли кредитлар, спорт ва маданият масканларининг барпо этилиши — буларнинг барчаси ёш авлоднинг баркамол бўлиб вояга етиши учун мустаҳкам замин яратмоқда. Айниқса, ижтимоий ҳимояга муҳтож, оғир тоифадаги ёки оталиққа олинган ёшлар билан манзилли ишлаш тизими йўлга қўйилгани эътиборга моликдир.

Ўқув марказида ана шундай тоифадаги ёшлар билан очиқ мулоқот ўтказилди. Унда туман ҳокими Собир Хожаметов, туман хавфсизлик хизмати бўлими бошлиғи Бахтиёр Абраев, туман прокурори Баҳрам Машарипов ҳамда туман ИИБ бошлиғи Тимур Дошумбаев иштирок этди.

Учрашув давомида 30 нафар ёшнинг мурожаат ва таклифлари тингланди. Жами 7 та мурожаатдан 4 таси жойида ижобий ҳал этилди, 3 таси эса тегишли тартибда ижрога йўналтирилиб, назоратга олинди. Бу эса ёшлар билан ишлашда очиқлик, тезкорлик ва масъулият тамойиллари устувор эканини кўрсатади.

“Ёшлар куни” доирасидаги тадбирлар ёшларнинг бўш вақтини мазмунли ташкил этишга ҳам қаратилди. Ҳудуддаги 83-сонли мактабда қўл жанги бўйича Ўзбекистон чемпионларини тантанали тақдирлаш маросими бўлиб ўтди. Бу каби эътироф ва рағбат ёшларни янада катта марралар сари руҳлантиради, соғлом турмуш тарзини тарғиб этади.

Шунингдек, 15-сонли мактабда шашка ва шахмат бўйича мусобақалар ўтказилди. Интеллектуал спорт турлари ёшларнинг тафаккурини ўткирлаштириб, стратегик фикрлаш кўникмаларини ривожлантиради. Раҳбарлар спортчи ёшлар билан самимий суҳбат қуриб, уларнинг ютуқлари ва келгусидаги мақсадлари билан қизиқдилар.

Қайд этиш керакки, бугунги кунда Президентимиз ташаббуси билан амалга оширилаётган кенг кўламли ислоҳотлар самарасини ёшлар ҳаётида яққол кўриш мумкин. Таълим, бандлик, тадбиркорлик, спорт ва маънавият йўналишларида яратилаётган имкониятлар ёшларнинг эртанги кунга ишончини мустаҳкамламоқда.

Зеро, ёшлар — мамлакатнинг стратегик ресурси, тараққиётнинг ҳаракатлантирувчи кучидир. Уларни қўллаб-қувватлаш, муаммоларини ҳал этиш ва салоҳиятини рўёбга чиқариш йўлида амалга оширилаётган ҳар бир ташаббус Янги Ўзбекистон келажагига қўйилган мустаҳкам пойдевордир.

Чарос Арслонова, туман ҳокимлигининг Ахборот хизмати раҳбари.