Амударёда аҳоли ва қишлоқ хўжалигини рўйхатга олиш жараёнлари қизғин давом этмоқда

Айни кунларда юртимизнинг барча ҳудудларида бўлгани сингари Амударё туманида ҳам аҳоли ва қишлоқ хўжалигини рўйхатга олиш тадбирлари юқори уюшқоқлик билан давом этмоқда. Ҳар қандай давлатнинг иқтисодий ва ижтимоий тараққиёти, аввало, аниқ статистик маълумотларга, демографик кўрсаткичларга ва мавжуд ресурсларнинг ҳаққоний ҳисоб-китобига таянади. Шу маънода, 2026 йилнинг илк ойидан старт олган ушбу йирик кампания мамлакатимизда демографик жараёнларни чуқур таҳлил қилиш, меҳнат ресурсларини тўғри тақсимлаш, ижтимоий инфратузилма объектлари — мактаб, шифохона ва йўллар қурилишини ҳамда ҳудудий ривожланишни илмий асосда режалаштиришда муҳим пойдевор вазифасини ўтайди. Таъкидлаш жоизки, мазкур жараёнлар халқаро стандартларга тўлиқ мос равишда, энг илғор хорижий тажрибалар ва замонавий рақамли технологиялардан фойдаланган ҳолда ташкил этилаётгани билан аввалги йиллардаги тадбирлардан тубдан фарқ қилади.

Рўйхатга олиш ишлари жорий йилнинг 15 январидан 28 февралига қадар икки асосий босқичда амалга оширилиши белгиланган бўлиб, айни пайтда биринчи босқич ишлари қизғин тус олган. 15-31 январь кунларини ўз ичига олган ушбу босқичда фуқароларга қулайлик яратиш мақсадида замонавий ахборот технологиялари имкониятлари ишга солинган: аҳоли махсус ахборот тизими орқали масофадан туриб, онлайн шаклда рўйхатдан ўтиш имкониятига эга.

Иккинчи босқич эса февраль ойида бевосита жойларда, яъни “Маҳалла еттилиги” ходимлари томонидан уйма-уй юриб, махсус планшет қурилмалари ёрдамида саволномаларни тўлдириш орқали амалга оширилади. Бунда census.stat.uz портали ва OneID идентификация тизимидан фойдаланилаётгани маълумотларнинг аниқлиги ва шаффофлигини таъминлашга хизмат қилмоқда. Аҳамиятли жиҳати шундаки, барча жараёнлар геоахборот тизими асосида мониторинг қилинмоқда. Хусусан, республика бўйича 7,6 миллиондан ортиқ хонадон ва турар жойларнинг геоманзиллари шакллантирилиб, махсус мониторинг ускуналари орқали жараёнларни реал вақт режимида кузатиш имконияти яратилган.

Амударё тумани ҳокимлигида ташкил этилган махсус штаб аъзолари ҳам ушбу жараёнга жиддий тайёргарлик кўрган ҳолда, аҳоли ва қишлоқ хўжалигини рўйхатга олиш ишларини тизимли ташкил этиш, юзага келаётган саволларга тезкор жавоб бериш ва аҳолига амалий ёрдам кўрсатиш мақсадида узлуксиз фаолият олиб бормоқдалар. Рақамларга мурожаат қиладиган бўлсак, 20 январь соат 12:00 ҳолатига кўра, Қорақалпоғистон Республикаси бўйича жами 232 мингга яқин хонадон муваффақиятли рўйхатдан ўтган бўлса, шундан 23,5 мингдан ортиғи айнан Амударё тумани ҳиссасига тўғри келаётгани туман аҳлининг жараёнга нақадар масъулият билан ёндашаётганидан далолат беради. Бугунги кунга қадар мамлакат миқёсида махсус портал орқали 2,48 миллион хонадон ҳамда 31 мингта фермер хўжаликлари ва қишлоқ хўжалиги корхоналари рўйхатга олингани ҳам аҳолининг фаоллиги ошиб бораётганини кўрсатади.

Туманнинг барча ҳудудларида, жумладан, чекка овулларда ҳам ишлар жадал суръатларда ташкил этилган. Жумладан, Амударё туманининг Холимбег овулида яшовчи фуқаролар ушбу жараёнда юксак уюшқоқлик намунасини кўрсатмоқдалар. “Маҳалла еттилиги” аъзоларининг хонадонма-хонадон юриб олиб борган самарали тарғибот ишлари натижасида овул ҳудудидаги мактабда жойлашган штабда иш қизғин давом этмоқда. Фуқаролар ўз келажагига бефарқ бўлмаган ҳолда, саволномаларни онлайн тўлдиришда фаол иштирок этмоқдалар. Шу ўринда аҳоли хавфсизлиги ва маълумотлар махфийлиги масаласига алоҳида тўхталиб ўтиш зарур. Фуқаролар томонидан тақдим этиладиган барча шахсий маълумотлар қонунчилик талабларига мувофиқ қатъий ҳимоя қилинади ва улардан фақат умумлаштирилган ҳолда, статистик мақсадларда фойдаланилади. Бу эса ҳар бир фуқаронинг жараёнда хотиржам ва ишонч билан иштирок этиши учун ҳуқуқий кафолатдир.

Ушбу йирик тадбирни юқори савияда ўтказиш учун мамлакат миқёсида улкан тайёргарлик кўрилди. Республика бўйича 14 та ҳудудий ҳамда 208 та туман ва шаҳар штаблари тузилиб, жараёнга 60 минг нафарга яқин махсус тайёргарликдан ўтган ходимлар жалб этилди. Улар сафида 54 минг нафар “Маҳалла еттилиги” вакиллари, 2,6 минг нафар захира ходимлар, шунингдек, вазирлик ва идоралардан бириктирилган тренерлар ҳамда олий таълим муассасаларининг волонтёр талабалари борлиги бу ишнинг умумхалқ ҳаракатига айланганини кўрсатади. Аҳолини хабардор қилиш мақсадида юзлаб видеороликлар, минглаб тарғибот материаллари тайёрланиб, телевидение, ижтимоий тармоқлар ва жамоат жойларида кенг намойиш этилмоқда.

Хулоса қилиб айтганда, аҳоли ва қишлоқ хўжалигини рўйхатга олиш тадбирлари — бу шунчаки статистик маълумот тўплаш эмас, балки эртанги кунимиз, фарзандларимиз келажаги ва юртимиз равнақи учун муҳим дастуриламал бўлиб хизмат қилади. Шундай экан, азиз ҳамюртлар, Сиз ҳам онлайн тарзда аҳоли ва қишлоқ хўжалигини рўйхатга олиш жараёнларида фаол иштирок этинг!