“ИЛК РИВОЖЛАНИШ МАРКАЗИ”: БОЛАЛАР УЧУН ЯНГИ ИМКОНИЯТЛАР МАСКАНИ

Мамлакатимизда инсон капиталини ривожлантириш, хусусан, мактабгача таълим тизими қамровини кенгайтириш давлат сиёсатининг устувор йўналишларидан бирига айланди. Зеро, боланинг дунёқараши, интеллектуал салоҳияти ва жамиятга мослашуви айнан мактабгача бўлган даврда шаклланади. Шу мақсадда Амударё туманида ҳам “Илк ривожланиш маркази” ташкил қилиниб, самарали фаолият юритмоқда.

Ушбу хайрли ташаббус Ўзбекистон Республикаси Президентининг 2024 йил 23 сентябрдаги “Камбағалликдан фаровонлик сари” дастурини амалга ошириш бўйича биринчи навбатдаги чора-тадбирлар тўғрисида”ги қарори ҳамда Вазирлар Маҳкамасининг 2025 йил 14 июлдаги тегишли қарори ижросини таъминлаш доирасида амалга оширилди.

Юқоридаги қарорлар асосида 2025 йил 28 июль куни Амударё тумани ҳокимининг тегишли қарори қабул қилиниб, Манғит шаҳри Олмазор маҳалласи, "Баркамол авлод" шоҳ кўчаси 25-уй манзилида туман Мактабгача ва мактаб таълими бўлими тасарруфидаги янги “Илк ривожланиш маркази” ташкил этилди.

“Илк ривожланиш маркази”нинг асосий вазифаси — шу кунга қадар боғчага бормаган, мактабгача таълим билан қамраб олинмаган болаларга тенг имкониятлар яратишдан иборат. Бу марказ шунчаки болаларни вақтинчалик назорат қиладиган жой эмас. Бу ерда боланинг жамиятга ижтимоий мослашуви, тенгдошлари билан мулоқот қилиш кўникмаси шакллантирилади ва энг муҳими — улар мактаб таълимига тайёрланади. Марказ фаолияти ҳар бир боланинг ёши, индивидуал қобилиятлари ва ўзига хос эҳтиёжларини инобатга олган ҳолда, уларнинг ҳар томонлама камол топишини таъминлашга йўналтирилган.

Ҳудуднинг эҳтиёжидан келиб чиқиб, марказ томонидан босқичма-босқич 240 нафар болажонларни қамраб олиш режалаштирилган. Ҳозирги кунда марказда 4 та гуруҳ шакллантирилган бўлиб, уларда 10 нафар малакали педагог-тарбиячилар фаолият олиб бормоқда.

Таъкидлаш жоизки, Президентимизнинг “Камбағалликдан фаровонлик сари” дастурига ҳамоҳанг равишда, марказга қабул жараёнида биринчи навбатда “Камбағал оилалар реестри”га киритилган, ижтимоий ҳимояга муҳтож оилаларнинг фарзандларига устуворлик берилмоқда. Бу эса ижтимоий адолат тамойилининг амалдаги ёрқин ифодасидир.

Янги марказда таълим-тарбия жараёнлари икки хил инновацион модель асосида ташкил этилган бўлиб, бу ота-оналар ва болалар учун катта қулайлик яратади. “Ўйин гуруҳлари” 3 ёшдан 6 ёшгача бўлган болалар учун мўлжалланган. Машғулотлар қисқа муддатли, яъни кунига 3 ярим - 4 соат давомида ташкил этилади. Бу вақт давомида болалар турли ривожлантирувчи ўйинлар орқали билим оладилар. Энг муҳими, тарбияланувчиларга енгил тамадди берилади ва барча хизматлар учун ота-оналардан бадал тўлови ундирилмайди. Бу — оила бюджетига сезиларли ёрдам деганидир.

“Махсус мактабгача таълим хизмати” модели алоҳида эътиборга лойиқ. Унда 2 ёшдан 7 ёшгача бўлган, алоҳида таълим эҳтиёжлари бор бўлган, яъни имконияти чекланган ёки саломатлигида муаммоси бор болалар қамраб олинади. Бунда педагоглар боланинг яшаш хонадонига борган ҳолда, индивидуал дастур асосида таълим-тарбия берадилар. Бу усул боланинг ўз уйидаги қулай муҳитда ривожланишига ва жамиятдан узилиб қолмаслигига хизмат қилади.

Амударё туманида фаолият юритаётган “Илк ривожланиш маркази” — келажагимиз эгалари бўлган болажонлар учун янги ҳаёт, янги имкониятлар эшигидир. Бу маскан нафақат болаларнинг сифатли таълим олишига, балки уларнинг соғлом ва баркамол инсон бўлиб вояга етишишига муносиб ҳисса қўшиши шубҳасиз.