АМУДАРЁДА ҚИШЛОҚ ХЎЖАЛИГИ ХОДИМЛАРИ КУНИ ТАНТАНАЛИ НИШОНЛАНДИ

Ўзбекистон замини азалдан қут-барака ўчоғи, деҳқонлари эса эл дастурхонининг бутунлиги учун тиним билмайдиган фидойи инсонлар сифатида қадрланади. Президентимиз Шавкат Мирзиёевнинг ташаббуси билан ҳар йили декабрь ойида мамлакатимизда "Қишлоқ хўжалиги ходимлари куни"нинг кенг нишонланиши соҳа вакилларига кўрсатилаётган юксак эҳтиромнинг ёрқин намунасидир. Ана шундай кўтаринки руҳ ва байрамона кайфият жорий йилнинг 24 декабрь куни Амударё туманида ҳам ҳукмрон бўлди. Туманнинг Қипчоқ овулида жойлашган муҳташам "Жайхун" тўйхонасида ташкил этилган тантанали байрам тадбири йил давомида далада тер тўккан миришкор деҳқонлар, чорвадорлар, сувчилар ва механизаторлар, аграр соҳа фидойилари шарафига бағишланди.

Тадбирнинг очилиш маросимида сўз олган Ўзбекистон Фермерлари кенгаши бўлим бошлиғи Меҳриддин Муҳаммадиев, Қорақалпоғистон Республикаси Жўқорғи Кенгесининг Аграр, сув хўжалиги, табиатни муҳофаза қилиш ва экология масалалари қўмитаси раиси Анвар Жуманазаров, Жўқорғи Кенгеси Раисининг маслаҳатчиси Муратбай Абдиров ҳамда Амударё тумани ҳокими Собир Хўжаметовлар йиғилганларни касб байрами билан самимий муборакбод этдилар.

Мутасаддилар ўз нутқларида бугунги кунда юртимизда аграр соҳани модернизация қилиш, энг сўнгги инновацион технологияларни жорий этиш, ер ва сув ресурсларидан оқилона фойдаланиш борасидаги ислоҳотлар ўз самарасини бераётганини алоҳида таъкидладилар. Хусусан, Давлатимиз раҳбари томонидан айнан Қорақалпоғистон Республикаси учун қабул қилинган тарихий фармон ва қарорлар ҳудудда деҳқончилик маданиятини юксалтириш ва аҳоли фаровонлигини таъминлашда муҳим омил бўлаётгани эътироф этилди.

Айтиш жоизки, якунланаётган 2025 йил Амударё тумани қишлоқ хўжалиги тарихида сермаҳсул йиллардан бири сифатида муҳрланди. Рақамларга мурожаат қиладиган бўлсак, туман меҳнаткашлари барча йўналишларда улкан зафарларни қўлга киритганига гувоҳ бўламиз.

2025 йил ҳосили учун тумандаги 348 та фермер хўжалиги томонидан 13 минг гектар майдонда ғўза парваришланди. Миришкорларимиз гектаридан ўртача 44 центнердан ҳосил олишни мақсад қилиб, қабул масканларига 57 минг 220 тонна "оқ олтин" топширишни режалаштирган эдилар. Омилкорлик ва тинимсиз меҳнат эвазига амалда 66 минг 250 тонна пахта хомашёси етиштирилиб, улкан хирмон бунёд этилди.

Ғаллачиликда ҳам натижалар қувонарли. Ризқ-рўзимиз бўлган буғдой етиштириш учун 270 та фермер хўжалиги ва қишлоқ хўжалиги корхоналари томонидан 4800 гектар ерга уруғ экилди. Режадаги 11 минг 130 тонна ўрнига омборларга 13 минг 768 тонна сифатли дон қабул қилиниб, дастурхонларимиз тўкинлиги таъминланди.

Шунингдек, "кумуш тола" ижодкорлари ҳам мавсумни ёруғ юз билан якунладилар. Туманда 4936 қути ипак қурти парваришланиб, режадаги 296 тонна ўрнига 296,1 тонна пилла ҳосили олинди.

Аҳолини мева-сабзавот маҳсулотлари билан таъминлаш – долзарб вазифа. Амударё туманида жами 1096 гектар боғ ва 66 гектар токзорлар мавжуд бўлиб, соҳани ривожлантиришга жиддий эътибор қаратилмоқда. Эскирган ва ҳосилдорлиги паст бўлган 14 гектар боғ ва 4 гектар токзорлар ўрнида янгича ёндашув асосида ишлар ташкил этилди. 2025 йил дастурига кўра 90 гектар интенсив боғ ва 10 гектар токзор барпо этиш кўзда тутилган бўлса-да, амалда 126 гектар интенсив боғ ва 16 гектар янги токзорлар яратилди. Бу эса келажакда экспортбоп маҳсулотлар ҳажмини ошириш имконини беради.

Халқимиз дастурхонини гўшт ва сут маҳсулотлари билан узлуксиз таъминлаш мақсадида чорвачилик тармоғида ҳам ижобий ўсиш суръатлари кузатилди. Тумандаги 53 та чорвачилик субъекти ва аҳоли хонадонларидаги саъй-ҳаракатлар натижасида йирик шохли қорамоллар бош сони 175,6 мингга етиб, ўтган йилга нисбатан 100,7 фоизга ўсди. Шундан сигирлар сони 48,9 минг бошни ташкил этди.

Натижада, гўшт етиштириш ҳажми 11,9 минг тоннага, сут етиштириш ҳажми эса 39 минг 227 тоннага етказилди. Эътиборли жиҳати, қишлоқ хўжалиги корхоналарида гўшт етиштириш ўтган йилга нисбатан қарийб 18 фоизга, сут ишлаб соғиб олиш ҳажми эса қарийб 20 фоизга ошди.

Чорвачиликнинг бошқа тармоқларида ҳам рақамлар ўсишни кўрсатмоқда. Жумладан, қўй ва эчкичиликда майда шохли моллар сони 113,4 минг бошга етказилди. Тумандаги 9 та паррандачилик субъекти ва аҳоли хонадонларида парваришланаётган паррандалар сони 1 млн 170 минг бошдан ошди. Йил давомида 48 миллиондан зиёд тухум етиштирилди.

Асаларичилик йўналишида эса 3 та ихтисослашган субъект ва ҳаваскорлар асаларичилар томонидан 176,3 тонна асал йиғиб олинди.

Энг катта ўсиш суръатларидан бири балиқчилик соҳасида қайд этилди. 84 та балиқчилик хўжалиги томонидан 2071 тонна балиқ овланиб, ўтган йилги кўрсаткич 124,1 фоизга бажарилди. Айниқса, фермер хўжаликлари балиқ етиштиришни 2,3 баробарга оширгани таҳсинга лойиқ.

Соҳани ривожлантириш фақат рақамларни ошириш эмас, балки наслчиликни яхшилаш ва инвестицияларни жалб қилиш билан ҳам ўлчанади. 2025 йилги туман дастурига асосан умумий қиймати 138 млрд 510 млн сўмлик 17 та лойиҳа тўлиқ ишга туширилди.

Хусусан, наслчиликни яхшилаш мақсадида "O‘rta-qala chorva mollari" ва "Авазбек Ғайрат" масъулияти чекланган жамиятлари ҳамда "Илҳом Шоҳрух" фермер хўжалиги томонидан Россия Федерацияси, жумладан Доғистон Республикасидан жами 1000 дан ортиқ зотдор қорамоллар олиб келинди. Шунингдек, рақамлаштириш жараёнида 50 та хўжаликдаги 4 мингдан ортиқ қорамоллар идентификация қилиниб, "Chinor" ягона электрон базасига киритилди.

Тадбирда сўз олганлар Президентимизнинг қишлоқ хўжалиги ходимларига йўллаган байрам табригидаги муҳим фикрларни яна бир бор ёдга олдилар: глобал иқлим ўзгариши ва сув танқислиги шароитида озиқ-овқат хавфсизлигини таъминлаш учун фақат замонавий билим, тажриба ва инновацион ёндашув зарур.

Байрамнинг энг ҳаяжонли қисмида фидокорона меҳнати билан барчага ўрнак бўлаётган соҳа илғорлари тақдирланди. Жами 170 нафар аграр соҳа вакилига туман ҳокимлигининг ташаккурномалари ва қимматбаҳо совғалари топширилди. Уларнинг сафида 15 нафар фермернинг "Илғор фермер" кўкрак нишони билан мукофотлангани уларнинг машаққатли меҳнатига берилган юксак баҳо бўлди.

"Жайхун" тўйхонасида янграган куй-қўшиқлар, дилрабо рақслар байрамга ўзгача шукуҳ бағишлади. Амударёлик деҳқонларнинг бугунги ютуқлари эртанги кун учун мустаҳкам пойдевор бўлиб, элимиз дастурхони тўкинлиги ва юртимиз фаровонлигига хизмат қилиши шубҳасиз.

Ғуломжон Ешниёзов