Коррупция — давлат ва жамият тараққиётига таҳдид
Коррупция — бугунги кунда дунё миқёсида ҳал этилиши лозим бўлган глобал муаммолардан бири ҳисобланади. Ушбу иллат ҳар қандай давлат ва жамиятнинг сиёсий-иқтисодий, ижтимоий-маданий ривожланишига жиддий путур етказиб, инсон ҳуқуқ ва эркинликларининг поймол бўлишига олиб келади. Шу боис, унга қарши курашиш халқаро аҳамият касб этиб, жаҳондаги деярли барча мамлакатлар сиёсатининг энг муҳим ва долзарб масалалари қаторидан жой олган. Коррупцияга қарши курашиш масаласи мамлакатимизда ҳам кечиктириб бўлмайдиган энг долзарб, муаммоли масалага айланган.
Ушбу йўналишдаги ишларнинг муҳим бўғини сифатида кенг кўламли тарғибот-ташвиқот ишларини йўлга қўйиш орқали аҳоли онгида коррупцияга нисбатан муросасизлик туйғусини шакллантиришга алоҳида эътибор қаратилмоқда. Бу борада ОАВлари томонидан амалга оширилаётган чора-тадбирлар ўзининг ижобий самарасини бермоқда. Айниқса, давлат ва жамоат ташкилотларида, кенг аҳоли қатлами орасида журналистлар томонидан ташкиллаштирилаётган учрашув ва давра суҳбатларида коррупциянинг маънавий устунларни емириши, иқтисодий-сиёсий, ижтимоий-маданий ҳаёт учун улкан хавф туғдириши тўғрисида тушунчалар берилаётгани фуқароларнинг бу борадаги ҳуқуқий саводхонлигини оширишга хизмат қилмоқда.
Амударё телевидениеси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон бўлинмаси томонидан молиялаштирилган “Коррупция — давлат ва жамият тараққиётига таҳдид” номли грант лойиҳаси доирасида ҳам ваколатли давлат органлари билан ҳамкорликда эҳтимолий коррупция ва таъмагирлик ҳолатларининг олдини олишга муносиб ҳисса қўшиш мақсадида тарғибот-ташвиқот тадбирлари амалга оширилмоқда.
Хусусан, лойиҳа координаторлари ваколатли давлат органлари ходимлари билан ҳамкорликда Амударё туман Тиббиёт бирлашмаси ва унга қарашли бўлимларда фаолият олиб борувчи шифокорлар билан учрашиб, уларнинг хизмат хоналарига “Сизга хизмат қилиш — менинг вазифам, илтимос, пора таклиф қилманг!”, “Мен оиламни пора эвазига боқмайман!” “Мен коррупцияга қаршиман!” ёзувлари туширилган махсус лавҳаларни жойлаштирди.
Шифокорлар билан мулоқот жараёнида тиббиёт соҳасини коррупциядан холи тизимга айлантириш ҳар бир ходимнинг зиммасидаги масъулиятли вазифаси эканлигига алоҳида урғу берилди.
Шунингдек, грант лойиҳаси координаторлари Амударё тумани ҳокимлигида фаолият юритувчи давлат хизматчиларининг ҳам хизмат хоналарига ҳар бир фуқаро онгида коррупцияга нисбатан муросасизлик туйғусини шакллантиришга хизмат қилувчи махсус ёзувли лавҳаларни жойлаштириб, ходимлар билан коррупция иллатига қарши кураш самарадорлигини ошириш юзасидан самимий мулоқотда бўлдилар. Лавҳаларга давлат хизматчиларини ҳалолликка чорловчи ёзувлар туширилган. Қолаверса, давлат хизматларидан фойдаланувчилар агар зарурат туғилса махсус QR кодни сканерлаб, коррупцияга қарши курашувчи ваколатли давлат органлари билан боғланишлари мумкин.
Амударё телевидениеси таҳририяти томонидан амалга оширилаётган “Коррупция — давлат ва жамият тараққиётига таҳдид” номли грант лойиҳаси доирасидаги бу каби тарғибот-ташвиқот тадбирлари давлат органлари масъул ходимлари билан боғлиқ эҳтимолий коррупция ва таъмагирлик ҳолатларининг олдини олишга муносиб ҳисса қўшишга қаратилгани билан муҳим аҳамиятга эга.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
