Она тили – миллат ғурури, халқ руҳи
1989 йил 21 октябрь — Ўзбек тилига давлат тили мақоми берилган кун. Ушбу тарихий сана муносабати билан Амударё тумани Маданият бўлимида байрам тадбири бўлиб ўтди. Тадбирда маданият ходимлари, ижодкорлар, ўқитувчилар ҳамда ёшлар иштирок этишди. Тадбирни Халқ депутатлари Амударё туман Kенгаши кoтибияти мудири Мансур Ўразбоев очиб берди.
Мазкур сана халқимизнинг маънавий ҳаётида беқиёс аҳамиятга эга. Сабаби, миллатимизнинг ўзлигини, ғурурини ва бирлигини ифодалайган она тили — бу халқнинг юраги, унинг руҳияти ва тафаккур тарзидир.
Байрам тадбирда сўзга чиққанлар ўзбек тилининг тарихий илдизлари, бой мероси ва бугунги кунда уни ривожлантириш борасида амалга оширилаётган ислоҳотлар ҳақида фикр юритдилар. Таъкидландики, тил — бу халқнинг ўзлигини асраб қоладиган энг муҳим омил, у миллий маданият, адабиёт, санъат ва маънавиятнинг пойдеворидир.
Ўзбек тили тарих саҳнасида шаклланишида ва юксак даражага кўтарилишида буюк аждодларимизнинг ҳиссаси беқиёс. Хусусан, Маҳмуд Қошғарий ўзининг “Девону луғотит турк” асари орқали туркий тилларнинг бой луғавий хазинасини яратган бўлса, бу асар ўзбек тилининг илдизларини ўрганишда бебаҳо манба бўлиб қолмоқда.
Шунингдек, Ҳазрат Алишер Навоий ўзининг даҳоларча ижоди билан ўзбек адабий тилини юксак поғонага олиб чиқди. “Муҳокамат ул-луғатайн” асари орқали туркий тилнинг, хусусан ўзбек тилининг гўзаллиги, бой ифода имкониятларини исботлаб берди. Навоий асарлари бугунги кунда ҳам миллий ўзлигимизни англашда, тилимизга меҳр ва фахр билан қарашда бебаҳо мактабдир.
Заҳириддин Муҳаммад Бобур эса нафақат саркарда, балки шоир, тарихчи ва тил фидойиси сифатида ўзбек тилининг софлигини сақлаш, уни адабий тил сифатида ривожлантиришга катта ҳисса қўшди. Унинг “Бобурнома” асари ўзбек тилининг адабий имкониятларини амалда намоён этган улкан тарихий ва бадиий ёдгорликдир.
Бугунги кунда ҳам давлат миқёсида ўзбек тилининг нуфузини янада ошириш, уни халқаро майдонда муносиб ўринга олиб чиқиш йўлида кенг кўламли ишлар олиб борилмоқда. Тил сиёсатида эришилган ютуқлар, ўзбек тили алифбосини такомиллаштириш, уни рақамли технологияларга мослаштириш борасидаги саъй-ҳаракатлар – буларнинг барчаси тилимизни замон билан ҳамнафас ривожлантириш йўлидаги изчил ислоҳотлардир.
Президентимиз Ўзбек тили байрами муносабати билан халқимизга йўллаган табригида таъкидлаганидек, “фарзандларимизни она тилимизга меҳр қўйиб, унинг беқиёс бойлиги ва имкониятларидан баҳраманд бўлишга ўргатиш маънавий-маърифий тарбиянинг ажралмас бир қисмидир. Бу долзарб масала ижодкор зиёлиларимиз, таълим-тарбия, маданият, ёшлар, маҳалла, хотин-қизлар ташкилотлари, оммавий ахборот воситалари вакиллари фаолиятида доимо марказий ўринда туриши, бутун жамиятимизда умуммиллий ҳаракатга айланиши керак”.
Байрам тадбирида Маданият бўлимининг истеъдодли хонандалари томонидан ижро этилган куй ва қўшиқлар, саҳна кўринишлари ҳамда бадиий чиқишлар иштирокчиларга байрамона кайфият улашди. Дилтортар наволар, она тилимизни мадҳ этувчи қўшиқлар юракларга фахр ва ифтихор туйғусини олиб кирди.
Ўзбек тили — бу тарихимиз, бу маданиятимиз, бу бизнинг фахримиздир. Уни асраш, ривожлантириш ва келажак авлодларга безавол етказиш ҳар биримизнинг муқаддас бурчимиздир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
