БОБУР НОМЛИ ОФЙ "МАҲАЛЛА ЕТТИЛИГИ" – АҲОЛИГА ЭНГ ЯҚИН КЎМАКДОШ

Шаҳардагидан фарқли ўлароқ, қишлоқ ҳаётининг ўзига хос жиҳатлари бор: ҳамма бир-бирини яхши танийди, тўй-у маърака, оилавий маросимлар ҳамқишлоқлар иштирокисиз ўтмайди. Қишлоқ аҳли бир-бирини қўллаб-қувватлаб, бир-биридан ўрганиб, билмаганларга ўргатиб яшашга одатланишган. Бобур номли овул Амударё туманининг аҳолиси зич ҳудудларидан бири бўлишига қарамай, ўзаро меҳр-оқибат туйғулари устунлигиданми, қишлоқнинг у чети билан бу чеккасида истиқомат қилувчи кекса-ю ёш худди яқин қариндошлар каби аҳил ва иноқ яшашади.

Қишлоқда 906 та хонадон таркибидаги 1285 та оилада салкам 5 минг нафар аҳоли истиқомат қилади.

БАНДЛИК ВА ТАДБИРКОРЛИК САМАРАСИ

Овул фуқаролар йиғинида фаолият олиб борувчи “Маҳалла еттилиги” аъзоларининг пухта ўйланган режа асосидаги саъй-ҳаракатлари туфайли аҳолини иш билан таъминлаш, камбағалликни қисқартириш, тадбиркорликни ривожлантириш орқали хонадонларда қўшимча даромад манбаини яратиш, айниқса, ёшлар тадбиркорлигини қўллаб-қувватлаш борасида самарали ишлар амалга оширилмоқда.

Фақат 2025 йилнинг ўтган даври мобайнида 208 нафар норасмий банд бўлган фуқаролар ўзлари фаолият кўрсатиб келаётган йўналишлари бўйича ўзини-ўзи банд қилган шахс сифатида рўйхатдан ўтказилиб, зарур шарт-шароитлар яратиб берилди.

87 нафар фуқароларга умумий қиймати 1 млрд 204 млн сўм миқдорида имтиёзли кредит олишларида ва оилавий тадбиркорлик фаолиятларини йўлга қўйишларида амалий ёрдам кўрсатилди. Натижада уларнинг барчаси чорвачилик, паррандачилик, хизмат кўрсатиш ва ишлаб чиқариш йўналишларида тадбиркорлик фаолиятларини бошладилар.

Ўзбекистон Республикаси Президентининг 2023 йил 14 сентябрдаги қарори ижросини таъминлаш мақсадида ўтказилган хатлов асосида 6 нафар фуқарога 550 млн сўмлик гаровсиз кредит маблағлари ажратилишида ёрдам кўрсатилди. Бу орқали 12 та янги иш ўринлари яратилиб, шунча фуқаро доимий даромад манбаига эга бўлдилар.

2025 йил давомида овулдаги 101 нафар ишсиз фуқаролар мавсумий ва доимий иш ўринларига жойлаштирилиб, бандлиги таъминланди. 21 та янги тадбиркорлик субъекти ташкил қилиниб, савдо-сотиқ, хизмат кўрсатиш, умумий овқатланиш шохобчалари фаолияти йўлга қўйилди.

Касб-ҳунар ўрганиш ва тадбиркорлик йўналишида ўқиш истагида бўлган 11 нафар фуқарога кўмаклашилиб, улар ҳам ўз оилаларига қўшимча даромад манбаларини яратдилар.

НАМУНАЛИ ТАДБИРКОРЛАР САФИ КЕНГАЙМОҚДА

Овулда яшовчи Хуршид Рейимов ва унинг турмуш ўртоғи Турсуной Жумабоевалар “Маҳалла еттилиги”нинг беғараз ёрдами билан ўз томорқа ерида ихчамгина иссиқхона ташкил этиб, кўчат етиштиришни йўлга қўйишди ва оила учун етарли даромад манбаига эга бўлишди.

Яқиндагина ўз тадбиркорлик фаолиятини бошлаган Турсунбой Қулимбетов эса имтиёзли кредит маблағи ҳисобидан замонавий мебель ишлаб чиқариш фаолиятини йўлга қўйди ва ўз яқинларини ҳам иш билан таъминлади.

Овул фуқаролар йиғини жамғармаси ҳисобидан аҳолига ер майдонларини ўз вақтида оқова сув билан таъминлаш учун суғориш асбоб-ускунаси олиб берилгани томорқа ер эгаларининг ердан унумли фойдаланишлари учун замин яратди. Овулдаги моҳир томорқачи Бекиммат Сафарбоев бу борада маҳалладошларига намуна бўлиб, унинг хонадони обод, ҳар бир қарич ери серҳосил, даромадга бой.

Нурпошша Юсупова эса имтиёзли кредит ҳисобига савдо-сотиқ йўналишида дўкон ташкил этиб, қишлоқ аҳолисининг арзимаган харид учун туман марказига бориб юришига эҳтиёж қолдирмади. Тикувчилик йўналишида фаолият юритаётган Иродахон Артиқова эса ўз ҳунари орқали доимий даромад манбаига эга бўлишдан ташқари, 6 нафар ёшларга ҳам чеварлик сир-асрорларини ўргатмоқда.

Овул ҳудудида бўш турган ер майдонларини махсус тизим орқали электрон савдога чиқариш орқали тадбиркорликни янада ривожлантириш чоралари ҳам кўрилмоқда. Биргина жорий йилнинг ўзида иккита лот электрон савдоларга чиқарилиши натижасида аукцион ғолиблари мазкур ер майдонларида кўчма савдо ва хизмат кўрсатиш объектларини ташкил этиб, ҳудудда тадбиркорлар сафи янада кенгайишига ўз ҳиссаларини қўшдилар.

“Маҳалла еттилиги”нинг ўзаро ҳамкорликда амалга ошираётган ишлари туфайли Бобур номли овул марказий гузари, кўчалар ва аҳоли хонадонлари кун сайин ободонлашиб, аҳоли турмуш фаровонлиги тобора юксалиб бормоқда.

РОБИЯ ЙЎЛДОШЕВА.