Амударё туман ҳокими “Таълим ҳомийси” кўкрак нишони билан тақдирланди

Таълим ва тарбия – ҳар бир жамият тараққиётининг пойдевори, келажак авлоднинг интеллектуал ва маънавий камолоти гаровидир. Шу йўлда юртимизда амалга оширилаётган кенг кўламли ислоҳотлар жараёнида таълим тизимини ривожлантириш, ўқитувчилар меҳнатини қадрлаш ва ўқувчиларга замонавий шароит яратиш йўлида фидокорона меҳнат қилаётган раҳбарлар алоҳида эътироф этилмоқда.

Шу ўринда Амударё тумани ҳокими Собир Хўжаметовнинг таълим соҳасидаги самарали фаолияти ҳам муносиб қадрланиб, у Ўзбекистон Республикаси Мактабгача ва мактаб таълими вазирлигининг “Таълим ҳомийси” кўкрак нишони билан тақдирланди.

Ушбу юксак мукофотни Қорақалпоғистон Республикаси Мактабгача ва мактаб таълими вазири Гулистан Кожабаева тантанали равишда топширди. Вазир ўз нутқида туман ҳокимининг таълим-тарбия соҳасидаги ташаббуслари, замонавий мактаблар қурилиши, ўқитувчилар учун яратилаётган шароит ва ўқувчиларнинг таълим олиши учун қулай муҳит яратилганини алоҳида эътироф этди.

Дарҳақиқат, сўнгги икки йил давомида Амударё туманида таълим тизимини ривожлантириш борасида кенг кўламли ишлар амалга оширилди. Жумладан, туманда 6 та янги мактабгача таълим ташкилоти қурилиб, болажонлар учун қулай ва замонавий муҳит яратилди. 31-, 46- ва 48-сонли мактаблар бинолари қайта реконструкция қилиниб, янги қўшимча бинолар барпо этилди. 59- ва 68-сонли умумтаълим мактаблари бинолари эса тўлиқ янгидан қурилди. 40-, 67- ва 48-сонли мактабларда замонавий ёпиқ спорт заллари ҳамда спорт майдончалари бунёд этилди. Шунингдек, 42-, 35- ва 60-сонли мактабларга жами 359 миллион сўм маблағ ҳисобига янги компьютер жиҳозлари олиб берилиб, ўқув жараёнлари рақамлаштирилди. Ушбу амалий ишлар туманда таълим соҳасининг сифат жиҳатдан янги босқичга кўтарилишига хизмат қилмоқда.

Туман ҳокими Собир Хўжаметов ўз нутқида ушбу мукофот бутун Амударё таълим жамоасининг фидокорона меҳнатига берилган юксак эътироф эканини таъкидлади. “ Таълим – бу юрт келажаги. Биз ўқитувчиларимизни эъзозлаш, болаларимиз учун замонавий шароит яратиш ва ҳар бир таълим муассасасини янгилаш йўлида изчил ишлашда давом этамиз”, – деди туман ҳокими ўз нутқида. 

Тадбирда туман Мактабгача ва мактаб таълими бўлими бошлиғи Ялғаш Шомуратов ҳам сўзга чиқиб, сўнгги йилларда туман ҳокимлиги ташаббуси билан таълим муассасаларида амалга оширилаётган инфратузилма янгиланишлари, ўқувчилар ва педагоглар учун яратилаётган шароитлар таълим сифатининг ошишига катта туртки бўлганини қайд этди.

Бугун Амударёда таълимга қаратилаётган эътибор – эртанги кун, ёш авлоднинг бахтли келажагига қаратилган энг муҳим сармоя, “Таълим ҳомийси” кўкрак нишони эса ана шу фидокорлик ва масъулиятли меҳнатнинг эътирофидир.

Чарос Арслонова, туман ҳокимлигининг Ахборот хизмати раҳбари.