МАКТАБГАЧА ТАЪЛИМ СОҲАСИДАГИ ИСЛОҲОТЛАР — ФАОЛИЯТИМИЗДАГИ ЮТУҚЛАРНИНГ БОШ ОМИЛИДИР
Мамлакатимизда мактабгача таълим тизимида амалга оширилаётган кенг кўламли ислоҳотлар ёш авлоднинг ҳар томонлама баркамол ривожланиши учун мустаҳкам пойдевор яратмоқда. Давлат сиёсатининг устувор йўналишларидан бирига айланган бу жараёнлар чекка ҳудудларда ҳам ўз самарасини бермоқда. Бизнинг Дўстлик маҳалласи ҳудудида жойлашган 7-сонли мактабгача таълим ташкилотимиз фаолияти мисолида ҳам ана шу ислоҳотларнинг амалдаги ифодасини яққол кўриш мумкин.
Муассасамиз 2010 йилда “Роҳат” номли мактабгача таълим муассасаси сифатида ташкил этилган. 2018 йилда боғча биноси тубдан реконструкция қилиниб, Амударё туман мактабгача таълим бўлимига қарашли 7-сонли мактабгача таълим муассасаси деб номланди. Янги бино махсус лойиҳа асосида 70 ўринга мўлжаллаб қурилган икки қаватли иншоотдан иборат. Муассасанинг теварак-атрофи тўлиқ ўралган бўлиб, ободонлаштириш ва кўкаламзорлаштириш ишлари мунтазам равишда олиб борилади. Бу эса болаларнинг хавфсиз ва соғлом муҳитда тарбияланишини таъминламоқда.
Бугунги кунда 7-сонли давлат МТТда 200 нафарга яқин бола таълим-тарбия олмоқда. 5 та асосий гуруҳ мавжуд бўлиб, ҳар бир гуруҳда 25 нафардан жами 125 нафар бола тарбияланади. Шунингдек, 2 та мажбурий гуруҳда 25 нафардан, жами 50 нафар бола қамраб олинган. Болажонларга 35 нафар педагог ходимлар таълим-тарбия беришмоқда. Шулардан 15 нафари тарбиячилар ва 9 нафари ёрдамчи тарбиячилардир. Тарбиячиларнинг 6 нафари олий, 3 нафари эса тугалланмаган олий маълумотли кадрлардир.
Мактабгача таълим ташкилотимизнинг замонавий биносида 3 та гуруҳ учун хоналар, ошхона, тиббий хизмат бўлими, омборхона, мусиқа ва спорт хоналари, болалар майдончалари ва айвончалар, спорт майдончаси мавжуд. Шунингдек, экин майдончалари ҳам ташкил қилинган бўлиб, бу болаларнинг табиат билан яқин мулоқотда бўлишига имкон беради. Муассасамиз замонавий мебель жиҳозлари, телевизорлар билан таъминланган. Гуруҳларда 5 та ривожлантирувчи марказлар ҳамда “Маънавият” ва “Спорт” бурчаклари ташкиллаштирилган. Буларнинг барчаси болаларнинг ҳар томонлама ривожланиши, уларнинг қизиқишларини уйғотиш ва ижодий қобилиятларини шакллантиришга хизмат қилмоқда.
Айни кунларда муассасамизда мактабгача ёшдаги болаларга таълим ва тарбия бериш, уларни соғломлаштириш, мактабга тайёрлаш, сифатли ва соғлом овқатланишини таъминлаш борасида кенг кўламли ишлар олиб борилмоқда. Педагог ва тарбиячиларимиз болаларнинг нафақат билим олиши, балки ижтимоий кўникмаларни эгаллаши, жисмонан чиниқиши ва маънан юксалиши учун имкониятларини тўлиқ сафарбар қилган ҳолда фаолият юритмоқдалар. Замонавий ўқув дастурлари ва инновацион педагогик технологиялардан самарали фойдаланаётган жамоамиз боғчамизни тумандаги намунали муассасалардан бирига айлантиришга интилмоқдалар.
Фурсатдан фойдаланиб, муассасамиз жамоаси ва барча ҳамкасбларимизни 1 октябрь — Ўқитувчи ва мураббийлар куни билан чин қалбимдан табриклайман! Юртимиздаги барча мактабгача таълим ташкилотларидаги азиз устоз ва мураббийларнинг, қадрли ҳамкасбларимизнинг мурғак болажонларни илм-фан оламига етаклаш, уларга дунёни танитишдек шарафли ва машаққатли фаолиятида куч-ғайрат тилайман!
Барно ХУДОЙБЕРГЕНОВА, 7-сонли МТТ мудираси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
