Хотин-қизлар фаоллиги – жамият тараққиётининг калити

Бугунги кунда мамлакатимизда хотин-қизларни ҳар томонлама қўллаб-қувватлаш, уларнинг бандлигини таъминлаш, ижтимоий фаоллигини ошириш ва тадбиркорлигини ривожлантириш борасида кенг кўламли ишлар амалга оширилмоқда. Ушбу эзгу ташаббусларнинг амалий ифодасини Амударё тумани Оқ олтин овули мисолида ҳам кўриш мумкин.

Бу ерда давлатимиз тараққиёти йўлидаги ислоҳотлар ижросини таъминлаш йўлида “Маҳалла еттилиги” меҳнати ва ташаббуси туфайли қатор ижобий натижаларга эришилмоқда. Жумладан, овул фуқаролар йиғини хотин-қизлар фаоли Моҳира Якубованинг фидойилиги, масъулияти ва чексиз шижоати туфайли бугун кўплаб оила ва аёлларнинг турмуш тарзида ижобий ўзгаришлар сезилмоқда.

Моҳира Якубова ўз касбига меҳр қўйган, ташаббускор, масъулиятли ва фидойи ходим. Унинг фаолияти нафақат маҳалладошларига, балки бошқа ҳудуддаги ҳамкасбларига ҳам ибрат бўлиб хизмат қилмоқда. У нафақат маҳалла ҳаётида фаол, балки туман ва республика миқёсида ўтказиб келинаётган турли кўрик-танловларнинг ҳам фаол иштирокчиси бўлиб келмоқда.

Яқинда ўтказилган “Энг намунали хотин-қизлар фаоли” республика кўрик-танловининг туман босқичида “Оқ олтин” ОФЙ хотин-қизлар фаоли Моҳира Якубова фахрли биринчи ўринни эгаллаб, республика босқичига йўлланмани қўлга киритди. Бу нафақат хотин-қизлар фаоли учун, балки бутун “Маҳалла еттилиги” учун катта шараф бўлди.

Оқ олтин овулида бугунги кунда, 1327 хонадонда 7568 нафар аҳоли истиқомат қилади. Шундан 3778 нафарини хотин-қизлар ташкил этади. Ана шу катта ижтимоий қатлам ҳаётини яхшилаш, уларнинг муаммоларини ҳал этиш ҳамда бандлигини таъминлашда сўнгги йилларда катта силжишлар кузатилмоқда.

Хусусан, “Аёллар дафтари”нинг 6-босқичига “Маҳалла еттилиги” қарори билан 174 нафар хотин-қиз киритилган бўлса, уларнинг қарийб ярми — 96 нафарига амалий ёрдам кўрсатилган. Маҳаллада 136 нафар ишсиз хотин-қиз аниқланиб, шундан 96 нафари касбий лаёқатидан келиб чиқиб, тадбиркорлик, ҳунармандчилик ва касаначиликка жалб қилинган. Ташқи миграциядан қайтган 14 нафар аёлдан 6 нафари паррандачилик ва чорвачилик каби соҳаларга йўналтирилиб, уларнинг бандлиги таъминланган.

Шунингдек, 2 та ҳолатда оилавий низолар аниқланиб, шундан биттаси маҳалла фаоллари ва ҳамкор ташкилотлар кўмаги билан ҳал қилинган. Ёрдамга муҳтож 36 нафар хотин-қизларнинг муаммолари ўрганилиб, 12 нафарининг масаласи амалий ёрдам бериш орқали ижобий ҳал этилган. Пробация назоратида турган 7 нафар аёл ҳам касбий лаёқатидан келиб чиқиб, иш билан таъминланган.

Маҳаллада хотин-қизларни иқтисодий фаолиятга кенг жалб қилиш мақсадида ҳунармандчилик, тикувчилик, чорвачилик ва паррандачилик йўналишларида лойиҳалар йўлга қўйилган. Айниқса, миграциядан қайтган аёлларни ижтимоий ҳаётга қайтариш бўйича амалга оширилган ишлар диққатга сазовор.

Масалан, жорий йил бошида хориждан қайтган 3 нафар хотин-қизга паррандачилик фаолиятини бошлаш учун мақсадли кредитлар олишда амалий ёрдам кўрсатилган. Бу орқали улар нафақат мустақил даромад топиш имконига эга бўлдилар, балки ўз оилаларининг иқтисодий барқарорлигига ҳам ҳисса қўшмоқдалар.

Оқ олтин овулида нафақат хотин-қизларнинг бандлигини таъминлаш, балки қадимий ҳунарларни асраб-авайлаш ва келажак авлодларга етказиш борасида ҳам катта ишлар қилинмоқда.

Гиламдўзлик – ота-боболаримиздан авлоддан-авлодга етиб келаётган энг қадимий ҳунарлардан биридир. Бу борада овул фахри, моҳир ҳунарманд Тўлғоной опа Худайбергенованинг меҳнати алоҳида эътиборга лойиқ. У гилам тўқиш сирларини ота-боболаридан ўрганган бўлиб, мактаб давридан бошлаб бу санъатга меҳр қўйган. Мактабни тамомлагач, отаси ва акаси Тўлғоной опага катта гилам тўқиш дастгоҳини ясаб беришган. У эса бу ускунани ҳозирги кунгача авайлаб сақлаб, уйидаги барча гиламларни ўз қўли билан тўқиган. Энг қувонарлиси, Тўлғоной опа нафақат ўзи ҳунармандлик қилмоқда, балки бугунги кунга қадар кўплаб шогирдлар ҳам тарбиялаб етиштирди. Келинлари ва неваралари ҳам Тўлғоной опанинг ёнида, катта қизиқиш билан гиламдўзлик сирларини ўрганмоқда. Бу эса қадимий ҳунарнинг йўқолиб кетмаслиги, балки янги авлодлар қўлида янада ривожланишини таъминламоқда.

Оқ олтин овулида олиб борилаётган ишлар, хусусан, Моҳира Якубова каби фидойи фаолларнинг ташаббуслари нафақат бир маҳалла, балки бутун туман миқёсида хотин-қизлар ҳаётида ижобий ўзгаришлар ясамоқда.

Бугун жамиятимизда аёлларнинг ўрни тобора ортиб бораётгани, уларнинг нафақат оилада, балки ижтимоий-сиёсий, иқтисодий ҳаётда ҳам фаол иштирок этаётганини Оқ олтин овули мисолида ҳам яққол кўриш мумкин.

Чарос Арслонова, туман ҳокимлигининг Ахборот хизмати раҳбари.