КОРРУПЦИЯГА ҚАРШИ ТАРҒИБОТ ТАДБИРЛАРИ ЎТКАЗИЛДИ

Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Тараққиёт кўзгуси” газетаси таҳририятининг “Биз коррупцияга қаршимиз!” номли ҳамда “Амударё телевидениеси” таҳририятининг “Коррупция – давлат ва жамият тараққиётига таҳдид” номли грант лойиҳалари доирасида мазкур оммавий ахборот воситалари ҳамкорлигида тадбир ташкил қилинди.

Грант лойиҳаси иш режасига кўра давлат хизматларидан фойдаланувчиларга буклетлар ва флаерлар тарқатиш орқали улар онгида коррупция нисбатан муросасизлик туйғусини шакллантиришга ҳисса қўшиш мақсадида лойиҳа координаторлари туманнинг Навоий ва Ойбек номли маҳаллаларида бўлдилар.

Тадбир аввалида маҳалла фуқаролар йиғини раиси Азамат Хидиров иштирокчиларга нафақат давлатимиз тараққиёти, балки ҳар бир инсон камолоти, оилалар фаровонлиги учун жиддий таҳдид бўлган коррупцияга қарши курашиш бугунги кунда умуммиллий ҳаракатга айланганини таъкидлади ва маҳалла аҳлини ушбу иллатга қарши курашишда ҳамжиҳатликка чақирди.

Шундан сўнг лойиҳа координатори Робия Йўлдошева тадбир иштирокчиларига мазкур лойиҳаларнинг долзарблиги, лойиҳалар доирасида амалга оширилаётган кенг кўламли тарғибот-ташвиқот ишлари ва улардан кутилаётган ижобий натижалар хусусида сўз юритди.

Хусусан, лойиҳалар иш режаси доирасида умумтаълим мактабларининг ўқувчилари ўртасида ташкил этилган “Коррупциясиз жамият қурамиз!”, “Биз коррупцияга қаршимиз!” мавзуларидаги иншолар танловлари, овул ва маҳалла фуқаролар йиғинларида, давлат ва жамоат ташкилотларида ҳуқуқшунослар, депутатлар, имомлар ва нуронийлар иштирокида ўтказилаётган учрашувлар, давра суҳбатлари қамров даражаси кенглиги билан аҳолининг ҳуқуқий саводхонлигини оширишда ижобий самара бермоқда.

Фуқаролар билан мулоқот чоғида коррупцияга қарши курашиш фақат ҳуқуқни муҳофаза қилиш органлари ходимларининггина эмас, балки ҳар бир биримизнинг зиммамизидаги бурч ва масъулият экани таъкидланди. Шу билан бирга, манфаатлар тўқнашуви, порахўрлик, алдов, фирибгарлик йўли билан ўзганинг мулкини ўзлаштириб олиш кўринишидаги ҳуқуқбузарликлар ҳақида ҳаётий мисоллар келтирилиб, бу каби жиноятларга жазо муқаррарлиги таъкидланди.

Лойиҳа координаторлари аҳоли хонадонларига ҳам ташриф буюриб, коррупцияга қарши тарғибот ишларини олиб бордилар. Мулоқот жараёнида иштирокчиларга давлат органларининг коррупцияга қарши курашувчи ваколатли тузилмаларининг “Ишонч телефонлари”, “Call марказлари” ҳақида маълумотлар тақдим этилиб, коррупция ҳолатларига дуч келганда ушбу органлар мурожаат қилиш лозимлиги таъкидланди.

Бундан ташқари, лойиҳа координаторлари маҳаллалар ҳудудидаги мактабгача таълим ташкилотларига ҳам ташриф буюришиб, коррупция ҳолати юз беришининг олдини олиш, коррупцияга қарши курашишда жамоавий бирдамликни таъминлаш юзасидан муассаса ходимлари билан суҳбатлашдилар. Уларга, коррупция, манфаатлар тўқнашуви, фирибгарлик, таъмагирлик билан боғлиқ ҳолатлар содир бўлган тақдирда зудлик билан давлат органларининг ваколатли тузилмаларига тегишли “Ишонч телефонлари” орқали хабар бериш зарурлиги, ҳар қандай вазиятда хабар берувчининг шахсий маълумотлари сир тутилиши тўғрисидаги маълумотлар тақдим этилди.

Ўтказилган тадбирлар Навоий ва Ойбек номли маҳаллалар аҳолиси онгида коррупцияга нибатан муросасизлик туйғусини шакллантириш, бу иллатга қарши курашишда жамоавий бирдамликни таъминлашга қаратилгани билан муҳим аҳамиятга эга бўлди.

Робия ЙЎЛДОШЕВА, Маҳмуджон ШОМУРОДОВ, Равшан БАҲРОМОВ, лойиҳа координаторлари.