АМУДАРЁЛИК ЁҚУББОЙ АШИРОВ УРУҒЧИЛИК ЙЎНАЛИШИДА САНОАТЧИ ФЕРМЕРГА АЙЛАНДИ

Мамлакатимизда қишлоқ хўжалиги маҳсулотларидан юқори ҳосил олиш, озиқ-овқат хавфсизлигини таъминлаш, айниқса, пахтачиликни ривожлантириш давлатимиз сиёсатининг устувор йўналиши ҳисобланади. Ана шу мақсадга эришишнинг энг мақбул йўли — илғор инновацион агротехнологияларни амалиётга кенг жорий этиш, қолаверса, илм-фан ютуқларидан, тадбиркорларнинг янги-янги ғояларидан самарали фойдаланишдир.

Пахтачилик мамлакатимизда қишлоқ хўжалигининг муҳим тармоқларидан бири саналади ва бу соҳада катта малака, тажриба ва ўзига хос мактаб яратилган. Гарчи сўнгги йилларда озиқ-овқат хавфсизлигини таъминлаш, қишлоқ жойларда аҳоли бандлиги билан боғлиқ муаммоларни ҳал этиш мақсадида кўп тармоқли фермер хўжаликларини кўпайтиришга қаратилган чора-тадбирлар туфайли пахта экиладиган майдонлар 15-16 фоизгача камайган бўлса-да, омилкор деҳқонларнинг соҳага инновацион ёндашувлари натижасида мамлакатимизда пахта ҳосилдорлиги камаймади. Аксинча, илм-фан ва янги инновацион агротехнологияларни қўллаш пахта уруғчилик тизимини такомиллаштириш, меҳнат самарадорлигини ошириш ҳисобига ялпи пахта ҳосилини юқори кўрсаткичларга етказишга эришилмоқда.

Бу борада Амударё туманида ҳам ўзига хос тажриба мактаби яратилган. Хусусан, ернинг маҳаллий шароитидан келиб чиқиб, турли касалликларга чидамли уруғлик маҳсулотларини танлаш ва экиш орқали пахтадан ҳар йили юқори ҳосил олишга эришилмоқда. Айниқса, тумандаги "Ёқуббой Аширов" фермер хўжалигида пахта ва ғалла уруғчилиги йўналишида юқори натижаларга эришилмоқда.

Ўз фаолиятини 2009 йилда бошлаган Ёқуббой Аширов раҳбарлигидаги мазкур фермер хўжалиги 114 гектар ер майдонида деҳқончилик қилади. Янгиликларга интилувчан ва ҳамиша ўз фаолиятига инновацион ғоя ва ташаббусларни жорий этиш орқали пахта ва ғалла уруғчилиги соҳасида юқори натижаларга эришиб келаётган фермер тумандаги уруғлик пахта ва ғалла етиштирувчи қишлоқ хўжалиги корхоналари учун янада қулайликлар яратиш, шу билан бирга пахта ва ғалла ҳосилдорлигини оширишга муносиб ҳисса қўшиш мақсадида Хитой Халқ Республикасида бўлиб, хитойлик уруғшунослар фаолияти билан яқиндан танишди.

Шу билан бирга давлатимиз томонидан тадбиркор ва ишбилармонлар учун яратилган имкониятлардан самарали фойдаланган ҳолда 3 миллиард сўмлик имтиёзли кредит олди. Унга қўшимча 3 миллиард сўм ўз маблағи ҳисобига Хитой давлатидан пахта, ғалла ва бошқа донли экинлар уруғларини маҳаллий шароитда қайта ишлайдиган завод ускуналарини олиб келди ҳамда "Amu sara urug'lari" МЧЖ шаклидаги корхонага асос солди. Бу билан Ёқуббой Аширов саноатчи фермерга айланди.

Амударё туманида ягона бўлган мазкур уруғчилик корхонаси тумандаги фермер хўжаликлари учун сифатли уруғлик маҳсулотларини етказиб бериш орқали қишлоқ хўжалиги маҳсулотлари етиштиришда сифат ва самарадорликка эришишларига муносиб ҳисса қўшиб келмоқда.

Айни пайтда корхона жорий пахта йиғим-терим мавсуми олдидан тўлиқ қувват билан ишлашга шай қилиниб, уруғлик пахта етиштирувчи фермер хўжаликларидан янги пахта ҳосилини қабул қилиш ва қайта ишлаш, сара уруғларни ажратиб олишга тайёр қилиб қўйилди. Корхонанинг барча цехлари, айниқса, пахтадан сара уруғларни ажратиб олиш механизмлари бенуқсон ишлаши учун зарур шарт-шароитлар яратилди. Корхона ишчилари ва мутахассислари махсус тайёргарликдан ўтказилиб, уларга меҳнат қонунчилиги ва техника хавфсизлиги қоидалари юзасидан тушунча ва тавсиялар берилди.

Биз ижодий жамоамиз билан корхонада бўлганимизда уруғлик сифатини назорат қилиш ускуналари, лаборатория жиҳозлари, пахтани қабул қилиш, тола сифати бўйича тоифаларга ажратишга қаратилган барча тадбирларни тез ва самарали амалга ошириш имконини берувчи технологиялар ишлаш учун шай ҳолатга келтирилганининг гувоҳи бўлдик. Бундан ҳам муҳими, мазкур корхонада фақат қишлоқ ёшлари меҳнат қилишиб, замонавий технологияларни маҳорат билан бошқаришмоқда.

— Барчаси муҳтарам Президентимизнинг биз —­ қорақалпоғистонлик тадбиркорларга қаратаётган юксак эътибор ва рағбатлари туфайли, — дейди Ёқуббой Аширов мамнуният билан. — Ана шу эътибор ва рағбат туфайли туманнинг энг чекка ҳудуди — Юқори қишлоқ маҳалласига саноатни олиб келдик, бир неча маҳалла ёшларининг доимий ва мавсумий иш билан бандлиги таъминланди.

Айни пайтда корхона меҳнат жамоаси ҳудуддаги уруғлик пахта етиштирувчи фермер хўжаликларидан дастлабки ҳосилни қабул қилиб олишга тараддуд кўришмоқда.

РОБИЯ ЙЎЛДОШЕВА.