ДХХ ЧЕГАРА ҚЎШИНЛАРИДА КОРРУПЦИЯГА ҚАРШИ ТАРҒИБОТ ТАДБИРИ ЎТКАЗИЛДИ
Жорий йилнинг 5 март санасида Ўзбекистон Республикаси Президентининг Коррупцияга қарши курашиш Миллий Кенгаши йиғилишида берган топшириқлари асосида ишлаб чиқилган “Йўл харитаси” барча соҳаларда коррупцияга қарши курашиш фаолиятининг асосий мезонларини белгилаб берди.
Мазкур “Йўл харитаси”да белгиланган вазифалар мазмун-моҳиятидан келиб чиқиб, прокуратура органлари томонидан соҳага оид фаолият мувофиқлаштирилиб, мунтазам равишда назорат тадбирлари, кенг аҳоли қатламлари ўртасида тарғибот-ташвиқот ишлари олиб борилмоқда.
Бу борада Амударё туман прокуратураси томонидан тизимли ишлар йўлга қўйилган. Айниқса, туман прокурори Б. Машарипов раҳбарлигида идора ва ташкилотлар раҳбарлари, ишчи-ходимлари иштирокидаги коррупция ва таъмагирликнинг аянчли оқибатлари, унга нисбатан жазонинг муқаррарлиги бўйича ўтказилаётган тарғибот-ташвиқот тадбирлари, туман ҳудудида амалга оширилаётган қурилиш-таъмирлаш ва реконструкция ишларининг сифатли бажарилиши юзасидан жойига чиққан ҳолда амалга оширилаётган кенг кўламли назорат ишлари аҳоли онгида коррупцияга қарши муросасизлик кайфиятини уйғотишда муҳим аҳамият касб этмоқда.
Ўтказилаётган тадбирларда прокуратура ходимлари томонидан коррупциявий ҳолатларнинг давлат ва жамият тараққиётига жиддий таҳдид, кишилар онгини заҳарловчи иллат эканлиги тўғрисидаги тарғибот ва ташвиқот варақалари ҳам тарқатилаётгани аҳолининг ҳуқуқий иммунитетини мустаҳкамлаш имконини бермоқда.
Ана шундай тарғибот тадбирларидан бири Давлат Хавфсизлик хизмати Чегара қўшинларининг Амударё тумани ҳудудидаги ҳарбий қисмда ҳам ўтказилиб, унда ҳарбий зобитлар, айни пайтда муддатли ҳарбий хизмат бурчларини ўтаётган аскарлар иштирок этдилар.
Тарғибот тадбирида Амударё туман прокурорининг катта ёрдамчиси Шаръяр Жолдасов мамлакатимизда тобора кенг миқёс касб этаётган коррупцияга қарши курашиш борасида амалга оширилаётган ишлар, бу борадаги қонуний асослар ҳамда Президентимизнинг Коррупцияга қарши курашиш Миллий Кенгаши йиғилишида берган топшириқлари асосида ишлаб чиқилган “Йўл харитаси”да белгиланган вазифалар хусусида батафсил маълумотлар берди.
Шу билан бирга, коррупциянинг энг кўп тарқалган кўринишларидан бири – манфаатлар тўқнашуви оқибатида юзага келаётган қонун бузилиш ва ҳуқуқ бузарлик ҳолатлари Амударё туманида ҳам кузатилаётгани, бунга жазонинг муқаррарлиги ҳақида сўз юритиб, коррупцияга қарши курашиш фақат ҳуқуқни муҳофаза қилиш органлари ходимларининг эмас, балки жамиятнинг барча аъзоларининг бурчи эканлигини таъкидлади.
Тадбир давомида коррупциянинг салбий оқибатлари ва унга нисбатан жазонинг муқаррарлиги ҳақидаги видеоролик намойиш этилди. Видеоролик намойишидан сўнг тадбир иштирокчилари коррупцияга қарши курашиш бўйича ўзаро фикр алмашдилар ҳамда барчани давлат ва жамият тараққиёти учун жиддий таҳдид, маънавиятимизни ичдан емирувчи иллат – коррупцияга қарши курашишда бирлашишга даъват этдилар.
Коррупцияга қарши муросасизлик руҳида ўтган тадбир давлат органлари ва ташкилотларида очиқлик ва шаффофликни таъминлаш, ҳар бир ходимда хизмат интизоми ва масъулиятни кучайтириш, жамоатчилик билан доимий ҳамкорликда профилактик ишлар олиб бориш, ҳар қандай коррупциявий ҳолатнинг олдини олиш бўйича иштирокчиларнинг ҳуқуқий саводхонлиги ошишини таъминлашда муҳим аҳамият касб этди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
