Прокуратура ходимлари кутубхонага аъзо бўлишди
Маънавий-маърифий ҳаётни ривожлантириш, аҳолининг китобхонлик маданиятини ошириш бугунги куннинг энг муҳим вазифаларидан биридир. Ўзбекистон Республикаси Президентининг 2019 йил 7 июндаги қарори бу борада янги босқични бошлаб берди. Ушбу қарорга мувофиқ, республика бўйлаб аҳолига ахборот-кутубхона хизмати кўрсатишни такомиллаштириш мақсадида тизимли ишлар амалга оширилмоқда. Ана шундай эзгу мақсадлар билан Амударё туманида ҳам янги Ахборот-кутубхона маркази ташкил этилган эди. Туманнинг Ойбек маҳалласи, Қипчоқ кўчасида жойлашган мазкур марказ қисқа вақт ичида туман аҳолисининг маърифий эҳтиёжларини қондиришга хизмат қилаётган маърифат масканига айланди.
Жорий йилнинг 27 август куни Амударё туман прокурори Баҳром Машарипов бошчилигидаги прокуратура ходимлари Ахборот-кутубхона марказига ташриф буюришди. Ташрифдан асосий мақсад нафақат кутубхонанинг фаолияти билан танишиш, балки китобхонликни кенг тарғиб этишга ҳисса қўшишдан иборатдир. Меҳмонлар кутубхонанинг бой китоб фонди, хусусан, Президент асарлари, Ўзбекистон тарихига оид китоблар ва янги адабиётлар билан яқиндан танишдилар.
Туман прокурори Баҳром Машарипов китоб ўқишнинг инсон ҳаётидаги ўрни ҳақида алоҳида тўхталиб ўтди. Таъкидланганидек, китоб инсон дунёқарашини кенгайтиради, унинг ҳуқуқий саводхонлигини оширади ва шахсий камолотида ҳал қилувчи роль ўйнайди. Прокурорнинг бу каби фикрлари кутубхонага ташриф буюрган китобхонларни янада руҳлантирди ва уларда мутолаага бўлган иштиёқни янада кучайтирди.
Ташриф якунида прокуратура ходимлари кутубхонага аъзо бўлиб, ўзларини қизиқтирган китобларни ўзлари билан олиб кетдилар. Бундай ташаббус жамиятнинг бошқа соҳа вакиллари учун ҳам ибратли намуна бўла олади.
Айтиш жоизки, Амударё тумани Ахборот-кутубхона маркази бугунги кунда катта ҳажмдаги фондга эга бўлиб, унинг китоб фонди 65 минг 138 нусхани ташкил қилади. Бундан ташқари, марказнинг фаол фойдаланувчилари сони ҳам тобора ортиб бормоқда. Ҳозирги кунда 5 минг 74 нафар китобхон кутубхона хизматларидан фойдаланади. Бу абонентларнинг 2 минг 438 нафарини эркаклар, 2 минг 636 нафарини эса аёллар ташкил этади. Бу кўрсаткичлар туманда китобхонликка бўлган қизиқишнинг юқори даражада эканлигини кўрсатади.
Ушбу ташриф, хусусан, давлат органлари вакилларининг китобхонликни тарғиб қилишдаги фаол иштироки мамлакатимиз раҳбарининг маърифатга бўлган эътибори ва ҳурматининг натижасидир. Зеро, китоб ўқиш – жамиятни янгилаш ва тараққий эттиришнинг энг самарали йўлидир. Китобхон инсонларнинг дунёқараши кенг, фикри теран бўлади, бу эса ўз навбатида жамиятнинг умумий интеллектуал салоҳиятини оширишга хизмат қилади.
Қолаверса, давлат органлари раҳбарлари ва ходимларининг китобхонликка шахсий қизиқиши ва бу борада ташаббус кўрсатиши жамиятнинг бошқа қатламлари учун ҳам ибратли намуна бўлади. Одамлар уларга эргашишга интилади, чунки бундай инсонлар жамият томонидан ҳуқубузарлар ва жиноятчиларни жазоловчи шахслар эмас, балки қонунни ҳимоя қилувчи маърифатли ва маданиятли шахс сифатида қабул қилинади. Бундан ташқари, ҳуқуқни муҳофаза қилувчи органлар ходимларининг китоб ўқишга, айниқса, ҳуқуқий адабиётлар, тарихий ва ижтимоий-сиёсий асарларни ўрганишга эътибор қаратиши уларнинг касбий фаолияти самарадорлигини ҳам сезиларли даражада оширади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
