Манғит деҳқон бозори атрофида савдо фаолияти тартибга келтирилмоқда
Амударё тумани ҳокимлиги ташаббуси билан аҳолига қулайлик яратиш ва бозор инфратузилмасини яхшилаш мақсадида Манғит деҳқон бозори ёпиқ биноси атрофида ўзбошимчалик билан ноқонуний тарзда савдо қилиб келаётган сотувчилар фаолияти тартибга келтирилиб, уларнинг қонуний фаолият олиб боришлари учун шароитлар яратилди.
Узоқ йиллар давомида деҳқон бозори ёпиқ биноси атрофида айрим тадбиркорлар ва савдогарлар турли ҳажмдаги қўлбола стол, эски сейф ва вақтинчалик бостирмаларда савдо қилиб келишган эди. Бу эса бозор атрофида тартибсизлик, тирбандлик ва санитария-гигиена талабларига мос келмаслик каби муаммоларни юзага чиқарарди. Қолаверса, бу ҳолатлар ёнғин хавфсизлиги талабларига ҳам жавоб бермас эди.
Мазкур муаммога ечим сифатида туман ҳокимлиги сотувчилар билан учрашиб, тушунтириш ишларини олиб борди ва барча қулайликларга эга янги савдо майдонини ташкил қилди. Шу сабабли ноқонуний ва талабга жавоб бермайдиган савдо нуқталарининг фаолияти тўхтатилиб, сотувчилар эски буюм бозори ҳудудида янгидан ташкил қилинган, барча шароитларга эга савдо нуқталарига кўчирилмоқда.
Янги ташкил этилган савдо расталари 400 ўринга мўлжалланган бўлиб, расталар таги ва йўлакларга бетон ётқизилган, устига эса мустаҳкам бостирмалар қурилиб, савдогарлар ва харидорлар учун барча қулайликлар яратилган. Бу эса, нафақат тартибли ва шинам муҳит яратиш, балки келгусида куз-қиш мавсумида юзага келиши мумкин бўлган ноқулайлик ва фавқулодда вазиятларнинг олдини олишга ҳам хизмат қилади.
Шунингдек, туман ҳокимлиги томонидан тегишли ташкилотларни бириктирган ҳолда махсус ишчи гуруҳ тузилди. Ушбу ишчи гуруҳ қисқа вақт ичида савдогарларнинг янги бостирмали бозорчага кўчирилиши, савдо жойларининг адолатли тақсимланиши ва зарур шароитларнинг яратилишини таъминлайди.
Ушбу ташаббус Мустақиллик байрами арафасида амалга оширилаётгани бежиз эмас. У шаҳар қиёфасини ободонлаштириш, савдо-сотиқ жараёнини тартибга солиш ва энг асосийси, шаҳар тозалиги ҳамда тартибини таъминлаш каби устувор мақсадларга хизмат қилмоқда.
Савдогарлар ҳам, харидорлар ҳам янги бозор майдонининг қурилиб, фойдаланишга топширилганидан мамнун. Сабаби, эндиликда савдо қилиш янада қулайлашиб, харидорлар учун ҳам тартибли, хавфсиз ва шинам муҳит яратилди.
Амударё тумани ҳокимлиги томонидан амалга оширилаётган бундай ташаббуслар савдо маданиятини юксалтириш, аҳолига янада сифатли хизмат кўрсатиш ва қулай ҳаёт шароитлари яратиш йўлидаги муҳим қадамлардан биридир.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
